去求簽囉^^

今日約左tracy 去左黃大仙度求簽. 我同tracy本身都有野想問下, 我自己本身呢, 就想問同蕃薯既關係, 應該係我自己既愛情去向. 加上我咁大個女都未求過簽, 於是好想試下. 我媽媽係我出門口時講話要係年尾還神, 自己都唔知係咩黎, 不過我估好好玩吧!?

大家一早到左黃大仙, 我哋兩個果然係準時既人^^以我媽媽提及過要買生果去求簽及拜神, 於是我哋兩個先去百佳買左四個大平果. 點知入到去見到好多人

黃大仙廟門口呢~都有幾多人去架><

入到廟前有好多寶碟賣呢~都成二十五元套, 但係原來只可以帶香入去燒, 其他物品都要扔哂=.="

排左一陣隊, 終於入到廟內, 果然係非常人多呢.....大家先去到指定既點香區點左香先, 之後就同其他人爭先恐後去拜神, 上香及求簽. 由於毎個人都帶住d香, 香灰鄧到毎個人身上都係, 仲有刺眼及刺nose既[香]味, 真係好辛苦呢><

大家唔理三七二十一, 一於上左香先算=.="

終於上完香, 可以去求簽囉, 真係好想影底, 但原來果個地方唔準拍攝, 真係可惜呢. 首先當然又係要排隊先, 入到求神處時, 果邊既負責人會比毎人一個簽筒, 之後可跪在黃色類似cool旬既物體求簽. 自己心想要求什麼, 如事業, 姻緣, 自身(健康). 然後搖動簽筒, 毎次只可以有一支簽, 之後用野記底自己所求既事項及簽號碼, 再去到附近搵解簽人. 我同tracy竟然求到同一支姻緣簽!? 好得意呢, 而我另一支簽係求自身既^^好想快d知道簽文呢, 都係快d去搵人解簽先^^

行左好多間, 真係花多眼亂呢~tracy話之前佢媽媽都搵人解簽, 有個人都解得幾好, 可惜佢已經去世, 而果個解簽人仲有兩個姐姐, 但解簽就麻麻, 都唔知搵邊個人好呢....行左好多間, 終於搵到間個老婆婆個樣都幾老實, 又好似幾可靠, 於是搵左佢幫我哋兩個解簽啦!

全個地方都係解簽, 有d店舖就好多人, 全個門口都係, 有d就冇人幫襯....

自己求既兩支簽, 左面係自身三十四簽, 右面係姻緣五十五簽^^

我果兩支都唔錯呢, 兩支都係中簽~已經好好啦~自身果支簽文係咁樣既:

第三十四簽 -人古大舜耕田
大舜雖耕在歷山
心常孝順兩囂頑
田中之象同家象
善惡分明即此問

據解簽果人講話我本身心地善良, 好孝順及勤力. 而且得到祖先保佑自己, 呢年身體會好好, 但唔好食煎炸食物. 同埋我係個內外都顧及到既人, 邊個男人娶我就有福氣. 其實自己都未拍拖, 都冇人要啦, 呵呵~不過聽到呢個簽文意思都幾開心既. 女人始終都係like聽大話, 尤其係好既大話^^

另一支係求姻緣, 同樣也係中簽, 簽文係咁:

第五十五簽 -吳隱之投沉香
浦號沉香遺藎佷
渡江猶憶古人心
可憐當日辭官去
雖有馨留不易尋

意講我既感情不宜急進. 之後解簽人問我係咪有個好熟既異性, 我心想蕃薯都應該熟吧!? 於是答左有. 佢就話你地可以慢慢發展!? 之後再講話個男仔會鍾意第二個, 而我就會同一個有錢, 有型及好叻既男仔一齊~其實佢都講得有d準, 雖然佢同我講冇女友, 同埋近排佢對我冷淡咁多, 少左同我傾計, 唔係好理我. 不過唔緊要, 反正我都想離開佢, 或者離開佢會比較開心~佢已經解答到我心目中既問題, 自己真係開心左好多^^

之後我同tracy去左許留山食dessert, 我哋都叫左我哋既至愛-芒果啊! 聽埋頭先既簽文, 自己如釋重負, 成個人都開心哂, 連食野都好味d, 呵呵~

我既多芒小丸子~芒果果肉 + 芒果雪巴 + 小丸子~

tracy既芒果dessert. 唔記得左係咩=.="

食完野之後, tracy想去觀塘買去考台灣大學入學試既書~我也跟埋佢去呢! 好在佢都可以買到舊書^^之後去左附近既舊區影相, 因果度之後會拆, 而且自己又少去, 一於影底佢留念先~

舊既樓宇~好耐都冇見過呢>< 舊既招牌~

臨時小販市場!? 好得意呢~

行完觀塘之後, 幫我爸爸買六合彩呢~買完六合彩後自己都累呢, tracy又約左朋友食飯, 返屋企休息下吧^^

我至愛的.....

我呢次唔係講人, 而係講食物....係一樣好簡單既食物, 而且也唔係咩貴既野, 而係用方包蒸煎堆. 其實呢隸樣食品有個小故事 : 我以前毎個新年都會同屋企人返到我係大陸間大屋渡假, 本來我唔食煎堆, 以前好多大陸黎親人會成日送煎埋比我哋, 結果成日都食唔哂, 麻麻覺得好哂, 於是落樓下士多買一磅方包, 之後連埋煎埋一齊蒸. 果樣其實都唔係太好睇, 但一食落去又幾好味, 尤其係煎堆連埋方包食, 真係好鬼好味. 自此之後我就迷上食.

但係我讀預科, 即五年前, 我已經冇再返大陸, 過年都留係香港, 而且也冇咩親戚, 冇地方可以拜年外, 也冇再收到煎堆呢樣食物, 所以我一直再冇食過

直至今日, 我媽媽早期返過大陸, 拿左d煎堆返黎, 仲話整方包蒸煎堆!? 我兩眼即刻發哂光, 好似搵到獵物一樣, 而且仲拿左個相機黎即刻影相~方包蒸煎堆既盧山真面目, 登登~

樣子不太討好, 但真係好好味, 我一個人都食左三大舊^^

終於可以飲茶~

今日終於可以出門口,好野~~!!我哋屋企果然鍾意飲茶,今朝又一早去飲茶.我而家晚晚都成二點幾先訓,當然眼訓啦,但總比成日係屋企既好~

一早去到酒樓,等左好耐都冇位,有d比我哋更遲黎既竟然有位,果度d侍應一尾叫我哋係度等,但等左好耐仍然冇位,甚至我哋問佢有冇位都唔理我哋,果陣我真係好嬲,點解比我哋更遲黎既人,而且人數比我哋多都竟然有位,仲要比人冇禮貌對待,自己真係把鬼火,叫姑姐佢哋去第二間飲,因我覺得禮貌既服務係必要....但姑姐都冇走,最後終於有位入去食飯...

雖然間酒樓d服務係差d, 但裝修幾靚既~呢個係我坐既位頭頂盞燈~

果度既食物唔太多種類, 而且又好貴, 都唔知叫咩食好. 最後都只係叫左少少野食就算....就算叫左果d食物, 味道都係麻麻地...

所謂既點心拼盆~有千層馬拉榚, 粉果, 蝦餃, 帶子餃....全部都係麻麻地好味=.="

一d都唔流沙既[流沙奶黃包]=.="

金菇炒伊麵~味道好啖啊=.="

毎樣送都唔係咁好味, 拿拿聲食完之後同我妹拿回鄉證, 但要等好多人先可以換呢....於是我同妹兩個人去左賣遊戲機既店舖upgrade我部psp(因我部psp 版本太舊, 有好多新game玩唔到, 而且自己upgrade又麻煩, 所以只好去店整), 一共要五十元呢....而且仲要唔係我至愛既日文, 而係中文繁體字, 不過冇所謂啦, 可以趕得切玩近呢幾日出既'tales of" RPG, 好開心~改完機之後即刻返屋企打機先^^

赤口

根據中國傳統習俗，當日容易與人發生口角爭執，為防招惹口舌是非，各人均不出外向親友拜年，只留在家中祭祀神明，故赤口日亦稱為「小年朝」。

所以我今日都冇出到街, 只係屋企休息一下, 打下機. 我真係犯賤, 而家有成日比我打機, 我竟然覺得好悶, 好想出去行下, 散下心.....不過又唔知其他人願唔願意出門口><影左少少無聊野同大家分享一下~

自己, 妹妹及佢個朋友近排迷上玩fb既pets society, 大家都著住紅色旗袍, 手指指住果隻係我妹妹, 中間大蝴蝶果隻係我既傻兔, 仲有我妹妹朋友果隻帶住大花既~

屋企大堂樓下既桃花及其他花, 睇黎其他花都開始謝囉=.="

屋企樓下大堂既lift口~

果然無聊到極~好想快d過左呢日...

去飲早茶

琴日好在一早返左屋企, 唔係今朝飲茶一定會眼訓死. 早上九點已經要出門口, 爸爸楂車到我姑姐屋企附近慈雲山中心飲茶. 我同媽媽先落車拜下麻麻, 之後再同一早搵好位既爸爸, 妹妹, 細佬, 弟婦, 姪仔, 二叔及嬸, 及堂妹會合, 我哋幾個人果然係機不離手, 一於去到酒樓照打~

打機果邊我唔影啦, 只係影其他親人~由左到右: 爸爸, 二嬸, 二叔&姪仔, 堂妹, 姑姐~

特別影左個生蛋瘦肉粥, 真係正到冇人有, 仲有其他點心都ok好味^^

連我自己都唔知點解會影既腸粉=.="可能好味掛.....

飲完茶之後, 大家係商場行左一陣, 可能係大家都唔想咁肥吧!? 今早經濟差吧? 商店裝修唔係太靚, 惟一叫靚少少既只有呢部分....

覺得牛仔Q版好得意啊~

行完商場之後探婆婆, 最衰都係自己掛住打機, 竟然冇影到婆婆, 都冇咩點同婆婆傾計, 覺得自己真係太過分!! 仲有去左舅父屋企拜年, 我仍然機不離手, 自己真係過分, 比舅父話我成二十幾仲掛住打機, 其實我都唔想, 只係我一直都冇得save, 聽左表妹彈左古爭之後, 我哋直接返屋企. 自己真係冇隱, 不過至怕親人問起我有男友或幾時結婚, 好在都冇問到^^

蕃薯去左同其他人係佢屋企影相, 自己竟然唔開心, 同埋有少少咁多掛住佢. 不過我都唔係佢女友, 冇權話咩開唔開心既...

去蕃薯屋企拜年!?

先同大家講句恭喜發財先, 祝大家身體健康, 咁先可財源廣進, 一團和氣. 女既最重要係青春常註, 單身既希望可以快d搵到另一半, 記住果另一半係要愛自己, 專一及照顧自己, 咁當然包括埋我啦, 呵呵~至於有拖拍或結左婚呢, 就要長長久久~

今早一早見蕃薯msn度on左, 佢竟然叫我去佢屋企!? 我問佢打機嗎? 佢話未決定, 總之佢去屋企. 咁我咪即係要買野? 今日大年初一, 冇理由唔買野吧? 於是問佢鍾意食咩, 佢話近期唔太鍾意食choco, 想食餅乾多d. 不過冇理由只係買野比蕃薯, 唔買野比自己人架, 於是我快快打扮好, 準備去買野及屋企度拜年~係打扮期間, 蕃薯問我出左門口未, 佢好似比我更心急呢, 呢次真係皇帝唔急太監急, 都唔知佢咁心急做咩鬼=.="

終於去到tm, 我到附近惠康買禮品, 真係好多款食物選擇呢, 都唔知選擇邊樣好@@藍灌曲奇度度都有得買, 好似太cheap, 於是我買左灌原價九十幾元既溫沙曲奇比佢, 咁當然只係半償先買啦, 另外買左盒蛋卷比婆婆~至於我呢個為食既自己呢, 就買左一盒choco~

去到蕃薯屋企拜年, 真係好緊張呢, 話哂初一第一次去其他人屋企度拜年(因之前去麻麻屋企拜年先, 但因麻麻及爺爺已去世, 所以只有初二拜年). 去到佢屋企度, 先講句恭喜發財先啦! 之後係佢屋企咪打機囉, 新年流流玩埋d流血殺人game, 真係大吉利是過佢, 真係前世囉><

蕃薯媽比既利是~多謝蕃薯媽! 應該問埋蕃薯幾時可以比埋利是我, 呵呵~

未食晚飯之前, 我已經好肚餓, 蕃薯媽開左泡谷比埋我食, 我也忍唔住食左幾粒, 但我果陣仲咳緊. 點知蕃薯竟然話我咳, 仲食泡谷咁話我, 結果我只係食左少少.....係喎, 我做咩咁聽佢話架!!!??但我都忍唔到口, 自己拿左剛係惠康買既choco食, 咁當然有問蕃薯媽食唔食啦, 之後到我拿時, 竟然拿唔出粒choco, 比蕃薯拿左出黎, 仲餵埋比我食!? 嚇得我自己即刻係佢手上拿返粒choco食返. 男女果然係唔可以太熟, 唔係好易引起誤會, 但自己竟然有d開心, 自己果然有病=.="

之後我打電話比媽媽, 話說我媽叫我打電話比佢, 話比佢知今晚返唔返屋企食飯, 我也應承佢今晚會返. 其實本來想同佢地兩母子出去食返餐, 但初一邊有店舖開!? 於是蕃薯媽及佢都話煮埋我份飯. 噢~初一去拜年竟然要主人家煮埋飯我食, 真係唔好意思><當中蕃薯媽竟然煮埋我同蕃薯相同份量既飯, 我真係咁大食嗎?

好簡單但好好味既一餐送, 有帶子炒蛋及生菜腐皮卷, 腐皮卷更係蕃薯至愛, 我唔好意思食多舊....

食完飯再休息一陣, 睇埋佢打機及傾下計就走. 呢日都幾開心既, 第一次去其他人屋企度拜年, 原來係咁好玩, 好想去埋其他人屋企度拜年, 希望第二年可以去下唔同人屋企啦, 呵呵~

打掃屋企(年三十)

今日真係邊度都唔使去囉><我媽媽一早叫我幫手打掃....我先望下個屋企, 原來真係咁鬼亂, 惟有先從我間房執起吧~

原來我真係買左好多衫, 真係成個衣櫃都裝唔哂, 我都扔左好多衫, 果然係浪費, 下次都係唔好買太多衫囉. 由於我間房太多傢私, 光係抺都用左成個鐘時間先抺完, 尤其係木門縫既塵, 呢樣先最難抺. 當然要執好我d漫畫, 除左我床前個漫畫櫃外, 仲有衣櫃下面兩個櫃都係擺漫畫, 對住我床前既係我成日睇既漫畫~

全部執好哂之後就要清潔洗手間, 我屋企有兩個洗手間, 全部都要抺哂, 真係抺個半死....首先分好清潔類別: 分別係浴缸及洗手盆, 玻璃鏡(佔全個洗手間既一半), 同埋窗, 因呢三樣野用唔同清潔劑清潔. 抺左兩個洗手間, 我既餓又累, 於是我走到自己房間打機及等食飯, 其實都唔算係食飯既, 只係食左少少野, 食完後又要再清潔鞋櫃及客廳櫃, 六點幾打邊爐, 我既清潔生涯就完囉><

食完飯之後, 蕃薯先打電話問我做咩野, 原來佢同阿聯係黃金買game, 又問我食左飯未, 你太遲約我囉~下次早d約我啦^^

去蕃薯屋企 + 食團年飯(年廿九)

*****去蕃薯屋企**************

話說佢知我鍾意打機, 本來之前我話討厭打機, 但最後都係江山易改, 本性難移, 始終都係愛打機!?近排佢就成日都同我講想打機, 但佢永遠都唔會直接叫我去佢屋企, 可能係大家都知咩事掛, 佢一講好想打機, 即係係佢屋企打機, 我都唔明既, 打機呢d個人野做咩叫人去佢屋企呢? 不過算啦, 鬼叫我同你老友咩. 但今日唔得呢, 我要食團年飯, 但佢話只見得幾個鐘都唔緊要, 見我快d去佢屋企, 佢使唔使咁急啊? 最後都搭巴士去佢屋企....

去到佢屋企, 見佢玩devil may cry 4, 即係有一次去佢屋企度, 睇到夜晚都唔捨得走果隻game, 佢終於爆左機, 恭喜哂! 見到個故事及畫面勁正, 睇黎搵日都要表現下我d打機功力先, 哈哈~佢又唔記得上次玩果關條路點行. 喂! 你打架叻冇用架, 要記得埋d路麻=.="

睇完打機之後, 佢哋兩母子食飯, 我問佢哋食左團年飯未, 佢哋只有兩個人, 幾時去食都得, 而且諗住出去旺角食團年飯, 問我黎唔黎. 算啦, 我已經應承左屋企人, 而且仲係打邊爐, 都係你地去食啦~下次先再同你哋食飯, 呵呵~

*****食團年飯**************

蕃薯帶左我去車站, 我自己等巴士返姑姐屋企, 我都話至怕坐巴士, 我一上車就訓, 訓到落車為止....落左車到黃大仙, 真係凍到死, 吹到我個頭都痛埋. 都係快d返姑姐屋企吧!

一去到等左一陣就可以打邊爐, 一共有三個湯底, 分局係清湯, 皮蛋莞西及沙爹湯底, 仲有好多送: 肥牛一定唔少得, 仲有羊肉, 魚皮餃, 豬頸肉, 各式肉丸.....好多好多款, 真係食唔哂, 我想拿相機出黎影相時, 點知個相機竟然冇電!? 錯過左影底美食呢>< 食食下野, 可能姪仔太開心呢, 竟然笑到嘔哂之前媽媽餵比佢食既食物, 真係可惜呢. 好在姪仔最後都冇咩事~ 我細佬由於要返工, 冇黎到食飯, 所以我哋食完飯之後, 爸爸楂車車弟婦到我細佬返工既地方搵佢, 也即係旺角, 我就一直抱住姪仔, 睇黎佢訓得好好呢, 覺得抱住bb呢個感覺好好~

公司提早收爐 + 行花市 + 唱k^^

*****提早收爐**************
一返到公司,老闆娘及各同事先打掃公司,當然包括我都要清潔啦~我負責抺野多,當中candy係洗微波爐隻玻璃碟時,唔小心係廁所度打爛左,整到成隻手都係血,我同mooji都發覺,於是mooji就負責包傷口,我就要做埋其他清潔工作,好在candy最後都冇事^^

終於清潔好,而且仲貼埋揮春,之後老闆娘話想買糖果及花擺係公司,而candy話換年榚,但佢整親隻手又點去呢? mooji又唔想去,於是只有我同埋老闆娘及珍落去吧(即係又做阿四去搬野=.=") 老闆娘買糖及瓜子時,毎樣都計住,貴既就唔買,一係話唔好食....我只好唯唯諾諾,佢唔放心阿珍一個人去買野,於是我自己去排隊,佢就去搵阿珍.我就因前面果個男人買左野,之後又話退貨,又話換野,整到我排勁耐!!

排完之後已經見到老闆娘買花,估唔到佢同買糖時完全唔同,只係一盆蝴蝶難都買左成九百元!?仲要買多六盆小紅掌~結果我就拿糖果,珍拿蝴蝶難,老闆娘俸六盆小紅掌~ 返到公司即刻怖置個門口, 整到成個花莆一樣, 呵呵~我哋仲影左好多相~

我哋公司個門口~我哋公司好似賣花=.="

candy比老闆娘影~等我都影返份先^^

阿珍及mooji既合照~又係老闆娘影既~

本來係candy幫我影緊架~點知mooji係度扮貓=3=

當然唔少得老闆娘~佢都要影返張相既, 呵呵^^

影完相後, 我哋全公司人去食飯囉~其實頭先買糖及花之前先去左訂定年榚先, 我哋會係晏d落去酒樓飲茶, 順便拿埋年榚之後就可以走啦! 好野~我哋只係叫左四人大餐, d野都幾好食, 而且價錢唔太貴~總之大家食到好飽~
我都想食雞啊~可惜我咳呢....

好在都有其他野食得~包括油菜, 中間果碟龍蝦伊麵~

仲有d肉好滑既龍鄧啦, 青瓜海節~同埋又係我唔食得既燒鵝....

*****行花市**************

食完飯之後就放工, 只不過係兩點幾, 我先返我爸公司訓一陣, 之後約好tracy係銅鑼灣sogo等, 我差d訓到過哂時間, 結果遲左少少....同tracy先到就行左陣街, 係sogo見到有人扮吉列豬排, 勁得意~

我都好想企係塊豬排隔離影相, 但太多人呢.....難得見到自己同類=.="

一間好有特色既店舖~全部都係賣過年物品^^

行左一陣街, teddy終於黎搵我哋兩個, 之後一齊係麵, 點知tracy食緊麵期間見到一條虫, 間野咁污糟架!!最後都換左一碗比佢, 但邊有心機食呢!? 而我叫果碗波菜麵都係麻麻地好食....

其實我係未叫過波菜麵先會去試下, 除左麵外都有好多芽菜, 唔通呢個真係健康食品黎嗎?

食完野之後再同阿聯集合, 大家一齊向維園進發!! 沿途見到好多人拿住好多得意物品, 有大粒昸吹氣金莎, 櫻花風車等等, 我見到都好開心, 好想即刻入去買呢^^最後我都買左兩樣野比自己~

牛年櫻花風車~我本來以為係桃花, 點知原來係櫻花, 好失敗啊><"

年吉公仔~d吉軟綿綿, 好得意, 個盆有d硬~總之全個都有公仔既感覺!!

見到有好多花, 而且仲好平, 可能今年天氣比較暖, 所有花都提早開吧...本來想買桃花, 但都已經一早開哂囉.....好在teddy陪我係桃花地方行左一轉, 總算都有店過桃花吧?估唔到花市真係咁多人呢..

真係人山人海呢~我哋都係行左一陣就唔行, 估唔到都仲可以同人迫左二個鐘!!

睇黎d人好努力炸庶汁呢....但似乎好少人幫襯....><

睇下我買完風車之後幾串!! 其實只係唔覺意比阿聯影到....

都係遮住自己個樣好了!! 自己咁樣衰費時比人睇><

*****唱k**************

睇黎大家都玩唔夠, 仲要去唱k!? 先去左CEO neway問價, 竟然要成二百元? 真係痴線囉, 最後我哋行多幾個街口, 去到普通neway唱k, 都唔平架, 要成百五元, 仲唱左幾個鐘^^

好鍾意間k房既設計~估唔到字都可以整得咁靚^^

唱完k之後佢哋去食車仔麵, 我就唔食囉, 驚再食會肥...成點幾先同阿聯係銅鑼灣度搭車出旺角, 等左好耐巴士, 見到果架巴士已經full左, 我同阿聯覺得再等唔係辦法, 而且見到有架紅色van出旺角, 於是沿住van仔一直搵, 最後都可成功上車~去到旺角時搭van返屋企時, 竟然要成三十五元!?我先發覺自己唔夠錢, 於是再去ATM拿錢, 點知我再次返去搭車, 除左勁排長龍外, 仲要成四十元!? 哇~我一打個轉返黎貴左五元!? 但都冇辦法啦, 只有呢架車可以返屋企....結果我成三點幾先至返到屋企, 上左一陣網之後就訓左

和同事去食飯

我哋成班同事一早講開話想去深井食燒鵝, 約好左今晚就去食, 當然唔話比老闆娘知啦! 我哋好期待快d放工, 一齊去食燒鵝. 但candy似乎比較麻煩d, 鬼叫佢住將軍澳咩, 但佢真係好想食下燒鵝, 話就算搭車麻煩都要去~

放工之後, 大家開開心心搵巴士搭去深井, 點知阿珍似乎唔想去食燒鵝, 因佢驚去到咁遠, 唔識路返屋企? 最後我哋決定左去花園餐廳食据排, 因阿珍老公識得人係果間餐廳度做, 於是大家一齊接左架的士去了=.="

果間餐廳係旺角, 只知係女人街, 但女人街咁長, 點知係邊度呢? 我哋搵左好耐, 係我以前返工附近有一間, 阿珍話係呢間,點知問左其實侍應之後又唔係果間, 於是再係花園街行左一陣, 最後我哋係街內又搵到一間, 最後終於搵到珍老公認識果個人~好野! 我都好肚餓, 即刻叫左個牛排食下先~

阿珍及mooji叫既海陸空餐~其實海係蝦, 陸係豬排, 空係雞排!? 唔明空點解係雞=.="

我叫既西冷牛排(四成熟)~估唔到我咳都仲夠膽食, 真係唔知死><同事見到我食咁生都好驚訝

終於叫飲品, 珍老公個朋友仲問我要唔要多杯凍choco, 我都唔好意思再叫, 加上我果陣都咳得幾利害下, 都仲冇介口=.="最後埋單時, 毎個餐都平十幾元, 真係勁抵啊!!!

食完飯之後就返屋企, 但珍唔知點行返去佢太子果間屋企, 結果我同candy就同佢行返去太子, 之後再搭地鐵各自回家^^

做返個女仔~

今日放工之後無聊走左佢睇蕃薯既相簿, 見到佢update左好多女仔fd既相落去, 我唔會去評論佢ｄ朋友靚唔靚, 因佢d相都會執過, 總之個個係相中都係靚女. 只係自己突然有種感覺, 覺得自己都係女仔, 點解佢搵其他影都唔搵我影? 係咪佢d女仔朋友比較係女仔性格, 自己唔係, 比人感覺好男仔頭呢? 所以唔搵我去影? 我開始變得好討厭相機及model呢個字眼, 因覺得同自己距離好遠, 恨佢點解唔會影我, 最多只係搵我去打機, 我唔係男仔, 我都好想好似佢d女仔fd咁, 去佢屋企度唔係打機, 而係影相....

除左討厭相機及model字眼外, 仲有好討厭打機, 可能係因打機而令我一直都冇男友, d人覺得我係男仔吧!?毎次見到佢d女仔朋友影左相出黎, 自己越覺得自己唔係女仔, 尤其係果個cici, 蕃薯成日都搵佢影相, 話係蕃薯既專用model, 諗起都激氣呢><"

究竟點解我會鍾意打機? 我估大慨係因為自己係屋企好悶吧, 而且打機中玩到一隻遊戲, 搵到隱藏野, 可增加自己既成就感吧, 但始終都係遊戲, 唔係真實, 人不應該毎日活在虛幻之中, 永遠封閉自己吧? 越見到遊戲世界既美好, 越會和現實比較, 覺得現實好殘酷, 我以前也為遊戲世界著迷, 而家長大了, 唔會再著迷......

現實之中, 我打機可以連飯都唔食, 放假時日又打夜又打, 甚至連返學拿成績表都可以忘記. 同時也因為打機而同屋企人吵架, 佢哋話我太沉迷, 成日咩都唔做, 我打機果種沉迷程度簡直係恐怖. 也因為打機, 學少左打扮, 咁大個人先叫做識化少少妝果隻, 連個妝都化唔好, 成二十幾歲先走去學化妝, 覺得自己太失敗呢.....也因以上毎個原因, 自己開始想去戒打機, 好想過返d正常生活, 做返個普通既女仔呢~

老闆娘的手信

老闆娘琴日係日本返黎香港, 終於返到公司, 佢本來心情唔係太好, 見到佢塊面都黑哂, 可能係比人澳親吧? 我哋幾個都唔敢同佢講野, 不過珍及candy一定要同佢接觸, 而candy因有個款號外箱出錯比老闆娘話, 總之大家都有d驚驚地, 都係繼續工作! 突然老闆娘唔知又咩事, 心情好左好多, 而且仲拿左幾盒係日本買既五盒染劑出黎比我哋選擇. 見到有好多顏色呢....有栗子啡, 少少紅紅地及金色, candy佢地都選擇左啡色及紅紅地, 只剩下金色, 只有我及老闆娘未選擇, 我選擇左盒比較深既金色, 比盒淺金比老闆娘, 但諗下咁又唔係太好, 都係比老闆娘先選擇吧!

點知老闆娘一句:[我只係染栗子色, 我唔染金色], 結果兩盒都比哂我, 自己有d唔好意思, 原本毎人一盒既而家我有兩盒, 不過又唔係我貪心, 都係同事全部選擇哂, 我都係冇得選擇, 咁就算啦, 呵呵~不過老闆娘會比我返工時染金色嗎?

其實我真係幾想染金色, 但個頭咁金, 返工好似怪怪地....

仲有老闆娘叫我哋可以拿佢買既染劑去佢阿哥間髮型屋度, 叫佢哥哥幫佢染, 但我哋點會咁做呢? 話哂間髮型屋係佢哥哥, 如果我哋真係拿呢盒野比佢染, 又好似唔太尊重佢哥哥, 即係比佢哥覺得佢既染劑唔好用, 唔可靠. 呢D事我哋邊度做得出, 都係返屋企搵親人幫自己染仲好呢^^

出job當旅行~

其實我一直都鍾意出job, 因可以周圍行下, 唔使係公司咁悶之外, 同時也唔使比老闆娘點我做野. 除非我去得太耐, 佢哋先會打電話比我, 如果平時既話都幾自由既~

呢次我去到美孚既節局交公司既差响等費用, 毎次我都會行過一個公園, 果度既景色都幾靚既~公園周圍唔係地鐵站, 就係高樓大廈, 個公園就係市中心度既位置, 所以平時都幾多人行架, 而且我也好鍾意見到植物, 所以如果天氣唔係太熱既話, 行一次都無妨. 而天氣熱既話, 就會用地鐵站口直接過去, 因我一曨就會暈, 真係麻煩呢~

呢日我帶左相機去影下相, 十足旅行一樣呢^^真係好想快d放工, 係度行下都唔錯架~

郵局對外既植物及樹, 似乎有d新既花黎左喎~

公園其中一部分~呢個係水池~

比較鍾意既一個地方: 涼亭 + 小池及花~全部加埋好似一幅畫^^

和liz佢地食飯囉~

由於我咁遲先約大家去食飯, 令到大家唔係太知集合時間及地點, 帶比大家好多麻煩, 係今日先知道詳情, 唔好意思~要先道歉下><

都係約定係mk見啦, 有咁多餐廳, 而且又唔太貴. 約好左五點係旺中地鐵站等, 大家都幾準時, 只係liz及嘉華有d事做遲左黎, 冇所謂啦, 菜菜, 寶妮及我三人先去搵位吧! 睇黎我哋三個對之前去開果d cafe開始覺得厭呢, 想換下新地方, 結果我哋發覺朗豪坊附近有間樓上cafe, 佢廣告上既食物好似幾吸引, 於是走左上去搵定位先~

全間餐廳以紅色為主題. 用黑白色做枱及椅, 睇起黎都幾舒服~

酒吧及蛋糕櫃既外貌~

但食物方面就麻麻地好食, 而且價錢都偏向貴.....我哋一早去到, 寶妮又覺得肚餓, 於是佢先叫左個下午茶餐食住先~

熱狗及加五元既蒜萵包....個熱狗未食過, 唔知好唔好味, 但個蒜蓉包就...又林又唔好食, 我睇都係算了吧=.="


liz及嘉華未黎食飯時, 寶妮拿左呢個新UNO比我哋玩, 我同菜菜因未見過呢個野而有d驚奇, 估唔到又真係幾好玩既^^

後來佢哋終於黎到, 睇黎我哋大家都好肚餓, 都係先叫食物吧! 不過未叫食物之前發生左段小插曲, 就係liz叫熱水時, 竟然係杯有冰既水!? 到底係咪熱水黎架?

唔係掛!? 熱水變冰水!? 梗係即刻叫人換左佢啦...><

我杯熱津子choco及個餐湯呢~杯choco都幾好味既^^不過個湯, 蒜蓉包及一件cake個餐係唔包既, 要比多二十元先可享用, 呢間咩餐廳黎架!!

我叫既白汁龍利柳~真係好得啖, 整到我要落鼓油去食先至夠味=.="

liz叫既茄汁鴨胸天使麵~佢話d茄汁味道太濃, 但我鍾意喎><

嘉華叫既牛柳粒意粉~睇落去又好似幾好味~

菜菜叫既肉醬意粉~可惜我自己唔太like食肉醬, 我估味道唔錯吧!?

後來我同寶妮唔多夠飽呢.....於是我哋叫多個咖哩吉列豬排飯, d豬排都炸得幾脆既....

我哋既飯後蛋糕~藍莓芝士蛋糕及choco蛋糕, 我當然鍾意芝士蛋糕多d啦! 而且仲係藍莓^^

當然唔少得大家既合照啦~睇黎個waiter都影得唔錯呢~

菜菜個大肚look~其實都唔多覺係大肚呢......佢keep得好吧! anyway, 希望BB可以肥肥白白^^