係fb度見到文迪個status, 係[in a relationship], 我又多個朋友拍拖囉. 但我都冇聽佢講過, 究竟我哋仲係朋友嗎? 或許係因太忙先冇同我講, 連菜菜都鄧佢開心, 應該知道係咩事, 好似只有我唔知, 加上佢哋一個已經結婚, 一個拍緊拖, 對仍係單身既我距離越來越遠, 開始唔認識大家咁, 希望只係自己諗多左...
我對蕃薯既感情呢....或許到呢度為止要結束, 愛上一個唔鍾意自己既人, 原來真係咁痛苦. 以前同佢有段開心既回憶, 行過tm毎處地方, 都會回憶起同佢開心既日子, 但又好快失去, 心內難受得很, 希望自己以後唔再踏足呢個地方, 忘記同佢發生過所有既事, 甚至話完全冇認識佢仲好. 但都唔可以咁講既, 佢令我認識到男女相處的方法, 了解我既缺點, 令我係人生路上改變好多, 可惜既係我同佢始終係有緣冇份. 起初我覺得我哋技能及性格可互補不足, 但原來我哋既思想, 行為有好大既差距, 甚至佢話唔知點同我溝通....其實我都覺得你都係收埋自己, 唔係講太多自己既事我聽, 我唔鍾意你同女仔朋友玩得咁密, 同其他女仔影相都唔影我, 同埋不願同我發展一直拖住我....好在我都係讀埋呢個sem, 以後唔使再因為你而傷心及煩惱, 唔知點解, 以前我一諗起同佢分開會哭, 而家竟然冇左呢種感覺, 自己應該覺得慶幸吧?
雖然一下子好似冇左三個好友, 但我有一班好支持我既同事及老闆娘, 佢哋終於知道左我同個anthory果件事之後, 佢哋一直教我做人既道理, 一直安慰及支持我, 不停引我笑, 話見到我開心就好, 多謝你哋, 你哋令我內心好過好多, 連老闆娘都話幫我改返個新名, 叫做Misuki(美好), 希望我之後既生活一直都係美好~我想逐個多謝佢哋~
老闆娘: 佢係改變我既重要人物, 佢要我學習自己品行修養, 改善自己品味及性格, 令我注意到自己既缺點, 有時仲同我講心事, 教我做人既道理. 有時仲送好多野比我, 對我真係好好, 但有時我一錯野會比佢鬧到飛起><
candy: 有時佢口直心快會傷到我, 但佢其實好好人, 好有耐心教我, 會問我同蕃薯既情況, 好關心我, 係個大好人. 就係佢知道我開心時也會開心, 我同佢都ok好傾^^
mooji: 佢好鍾意串住黎話我, 當然係講笑果隻, 而且都係口直心快, 但都係個好人, 教我好多做人道理架~
阿珍/珍姐: 其實我多數叫佢阿珍多, 係candy及mooji, 同埋大陸員工都叫佢珍姐, 自己已經聽憤, 我有時比佢哋兩個笑住黎話我時, 佢總係會幫住我, 多謝你^^
除左呢四名重要人物外, 仲有係fb度認識左兩個女仔朋友, 同佢哋都幾好傾, 近排同佢哋傾多左心事, 就係我係收買朋友認識既stacey及王由美, 成日要你哋聽我傾, 真係有我講冇你哋講, 總之真係多謝你哋, 同埋sorry囉~
睇黎我既人生又充滿希望, 又搵到自己既路, 就係唔再韻呢科, 讀返會計或時裝設計, 自己要搵定目標, 加油囉^^
welcome to my world...
My model life since Nov 09~
My sweet life w/ bf joejoe since Dec 09^^
今日maya堂畫左盒餅, 呢堂要痴d封面落去, 真係好鬼難呢, 好在有蕃薯幫忙. 我見到盒面隻鴨好得意, 自己忍唔住影左張相~
我姪仔隻沖涼鴨!? 我見到佢玩過啦~
後面冇咁得意添!?
上完maya堂之後開始拍片, 但阿駿佢地果組似乎組員之間冇咩默契, 連份劇本都有兩個版本, 而且有少少出入, 最後都係沿用最初果份好了. 睇左自己個角色後, 竟然唔係我之前做開果個女主角, 而係其中一個閒角, 係做劇中阿駿既女友, 仲要一副睇唔起劇中文迪角色既樣!? 吓!? 點解轉左角色都唔知架? 而且又係做奸角? 我而家個樣好似奸角咩?
大家傾左好耐點拍, 似乎都有排傾....我等左成兩至三個鐘都仲未出場, 當然有d唔耐煩啦, 但鬼叫我自願幫人咩, 冇計啦! 好在雲妮有部ipod, 可以播下歌聽, 有d兒歌好耐都冇聽過呢, 我, 文迪及雲妮三人邊聽邊等佢地拍完. 已經成十一點, 我也好少係學校咁夜都未走, 一於去影下學校夜景先~
學校既夜景有另一番味道, 都幾靚啦(十一點未熄燈前)
最後佢地終於拍完幾幕, 剩下好多螢光捧道具, 大家都玩得好開心呢, 加上夜晚既學校黑哂, 更加好玩~
終於到左十一點, 學校全部燈都熄哂~真係好黑啊><
開左閃光燈先影到文迪及berry, 睇佢地玩螢光捧都幾開心呢~
夜晚影既燈光特別靚呢!!
終於離開學校, 見到天上全部都係星星, 勁靚的說! 文迪竟然識睇係咩星座, 太勁啦! 我只係見到好多星星...大家似乎睇到唔捨得走, 都係早d返去休息下吧, 我好累呀!!
最近有好多份功課要交, 等我而家總括一下先, 包括audio既錄音劇, 琴晚已經錄完, 欠剪片及加上音效; 仲有video既功課, 同樣都係拍完, 欠剪接及配音. 仲有就係英文個drama及maya畫圖, 真係完全冇郁過....突然咁多野做都有架!!
不過我哋呢組都好, 起碼完成部分, 有d組都仲未拍好段片, 可能係大家冇時間吧. 加上人數唔夠, 要去周圍組搵人拍, 我都好開心得到文迪及阿光既邀請, 可以係佢地套劇之中做下閒角, 咁都唔錯啊! 幫下朋友手都唔錯, 而且自己又可以做到, 又開心既話, 都冇所謂啦! 最後決定左聽日晚上會幫阿光拍戲先, 下星期一就幫文迪佢地, 睇黎呢幾個星期一定好充實及開心. 同時也可令我逐漸忘記蕃薯. 因之前成日都同蕃薯一齊, 忽略左其他同學, 希望可以同佢地關係好d吧!
聽日就要拍戲, 自己都好緊張呢! 要加油囉!!
好在阿sir星期四有堂, 我哋先可以借錄音室錄音. 本來想打電話比波特或阿聯, 因我盡量都避免接觸tracy, 但唔好彩地我冇佢哋兩個電話, 於是只好打比tracy問佢地係邊. 一返到學校, 波特及tracy一早返到學校, 佢地研究緊劇本, 我比意見時, 佢哋都覺得我意見唔好冇用到, 自己一次又一次比佢地ban, 心內都冇哂隱, 好在一直同文迪sms, 我先至冇咁悶, 話題都係環繞住我就黎走呢件事, 包括對蕃薯既感情, 拍戲後及對tracy的感覺, 係我覺得tracy搶走我同佢地成班人做功課時果種開心, 及唔知佢係咪鍾意蕃薯先至嬲佢, 但我知佢之前上電腦堂時都好用心問我識唔識, 及一齊畫畫果段時間, 同佢都幾開心既. 只係因為蕃薯而嬲左佢, 我有時都質問自己, 我自己係咪鍾意蕃薯鍾意到不能自拔? 仲有兩個星期就唔會同佢一齊返學, 係時候忘記佢, 但唔知點解卻剛相反, 我反而更鍾意及唔捨得佢....
最後阿聯都到學校, 我哋終於開始錄音, 首先去錄音室, 途中有個阿sir帶埋鎖匙去開門, 點知開極都開唔到既!? 開左兩三次之後先至開到, 就好似TVB台慶開門拿樓時個場景, 哈哈~唔知之後仲有冇機會黎個錄音室, 趁而家冇咩人影下相先~
錄音室門口~終於可以入到黎啦!
另一個錄音室~睇黎我都再冇機會用, 用黎interview既
經過既錄音室器材 (interview錄音室用)
呢個係錄音室, 也係我哋即將錄音既地方~
我哋錄音既金錄音室內部~
講返我哋今次故事內容, 就係波特飾演既阿傑及tracy飾演既阿zoe係對情侶, 因一次交通意外令到兩人陰陽相隔, 但zoe既靈魂因唔捨得阿傑而留在世上..... 係呢個故事中, 本來唔太重視女友既阿傑知道女友死左後, 更加珍惜佢, 可惜既係已經太遲, 最後阿zoe都係要走. 係阿傑身邊出現既有佢無良既老闆(竟然由我黎演, 因我夠惡!?), 仲有zoe既有陰陽眼既婆婆(都係由我演), 黃綠醫生(蕃薯)....角色仍然都係以波特及tracy為主...我同阿聯就負責錄音吧!
雖然話我幫手錄音, 但主要都係阿聯錄音多, 你睇佢個樣幾pro~
大家約好左七點, 但咁耐都未見蕃薯, 同佢冇咩關係既我本來都唔理佢, 但我都係唔忍心完全唔理佢, 於是我send左個sms比佢, 但佢都冇覆, 後來阿聯及波特叫我打電話比佢我先至打, 原來佢係返學途中, 大家都叫佢幫手買野食, 因tracy太肚餓, 連肚子打鼓聲都聽到!? 蕃薯都買左野食黎, 大家食完野之後再錄音~
哈哈~大家都努力錄音呢! 可惜佢地冇影我錄音既樣呢=.="
錄音都可順利完成, 係十點之前都可交返個房比阿sir, 同另一位陪住我哋錄音既阿sir講開讀大學問題, 指ive同海外大學開果個degree, 蕃薯似乎好有興趣, 我也幫佢問左d資料, 關我咩事牙! 自己又唔係讀, 睇黎自己又多事啦....
呢堂係audio, 上埋呢兩堂, 呢科就已經完結. 睇黎其實都唔係好多野教左, 估唔到又咁快完, 呢兩堂唔會再教書, 而係要我哋分成幾組去錄一套廣播劇之類既野, tracy一早已經返到學校打劇本, 個故事係為波特平反, 因係我地套鬼片內, 佢做個花心既男仔, 大家都講笑話佢係花心, 波特話自己專一麻, 於是就為佢作個故事: 就係講佢同個女仔拍拖及同居, 講個女仔即使車禍中死左, 佢仍然深愛住佢...當中也有好多角色, 包括尖酸刻簿既老闆, 黃綠醫生, 兩個珠寶店店員, 女朋友既婆婆....好多角色, 好好玩~最後分配既角色如下:
阿聯: 珠寶店店員
蕃薯: 黃綠醫生, 另一位珠寶店店員
我: 尖酸刻簿既老闆(夠賤, 似我), 女朋友婆婆
睇黎我果兩個角色都幾難呢, 個老闆其實都唔知點演, 佢地話要夠惡, 但我把聲點扮都唔惡啦! 我反而扮左個好串及好賤格既老闆出黎, 連阿聯都話賤, 我自己也覺得自己竟然可以咁賤....另一個係個婆婆, 佢係可以見到死左既孫女既人, 講真扮婆婆把聲真係幾難, 又冇咩點聽過, 要一直狂用婆婆聲講野=.="
自己驚比佢地見到我影佢地, 所以冇用閃光燈影相....我哋練習既地點
本來我哋跟住一隊既後面, 但阿SIR話搵唔到我地, 於是阿光及阿駿果隊人打左我哋尖. 波特見到之後反應特別大, 即刻叫佢地快d錄完, 自己即刻霸住個位, 蕃薯見佢地大家唔願意讓步, 於是話下次先錄, 我同tracy都幫口講, 最後阿sir話聽日可以借個房比我哋錄, 加上阿光又出黎道歉, 呢件事應該算數吧? 後來我先睇fb先知, 原來阿駿同阿ling一組時係咁過分, 睇黎波特唔止係因呢件事嬲阿駿, 仲有其他原因既....
放學之後, 我又同蕃薯兩人單獨一齊!?唔係掛! 你地班野係咪特登架? 我哋都好似以前一樣ok好傾, 突然問我會唔會同埋阿駿及波特去幫tim sir拍片, 只要可以見到佢既話就去, 我覺得佢地一定會問tracy去唔去, 不過我先應承啦, 因tracy都仲未知邊日會去, 同埋蕃薯講明26-28日佢唔知去唔去得, 我叫佢如知唔去得既話先同我講, 因我想返去大陸玩下~好想去散下心, 唔記得所有唔開心既野. 之後再休息一排及讀埋個degree. 可能好耐都冇同蕃薯傾計, 我哋一直傾, 佢都覺得我讀會計或時裝設計會好d, 我都係咁認為. 我哋講出大家合作做功課等等既野, 佢話佢自己係英文方面真係唔得, 等如我唔識電腦一樣, 我話我哋睇黎都幾好, 可以補到大家既不足, 可以既係....我哋已經冇咩機會再合作, 不過曾經合作過已經好好, 同你呢年黎合作得好開心, 多謝你!!
文迪都好有我心, 一早返學同我辦退學手續, 原來退學都幾麻煩下, 首先係要同系主任用書面形式通知退學, 令自己唔會收學費單. 而且仲有一張退學表格, 但我而家仲唔可以填住, 因為我而家仲有第二年既科目仲未讀完及知結果, 要sure果兩科係合格先真係可以遞表. 點解連退學都咁麻煩架? 又唔可以即刻退, 激氣! 同左蕃薯sms, 結果佢都冇覆我...
但唔緊要啦, 仲有兩個星期見面, 之後都應該唔會再見到蕃薯吧? 既然以後唔會再見, 佢無論理唔理我, 同邊個拍拖都好, 唔關我事啦! 其實我都懷疑佢同tracy係咪拍緊拖, 但答案係咩都好, 我唔想知道, 也會再理...畢竟我同佢都只係好友.
今日上video堂, 阿sir 教左樣好得意既野, 就係用所謂既路軌拍段片出黎, 真係好pro呢~個cam man楂住部機, 下面有兩個人推住, 旁邊有個楂住個mon, 收音咪...真係好利害, 簡直係大開眼界!!
大家都好專業呢~蕃薯楂機, 波特及聯推架車, 仲有其他人負責燈光及收音~
主角咪係雲妮及galan囉~佢地都演得幾ok架^^佢地兩人既即場爆肚簡直正!!
大家都爭相影底佢地兩個~唔知點解影佢地大家會咁開心..
下一幕轉到去樓上canteen拍攝, 由下一組同學去楂機啦! 但蕃薯睇黎佢都係好鍾意拍野, 連支燈都唔放過, 點都要楂一楂, 仲帶住對紫色手套, 仲同我講話好襯, 其實我好鐘意你...既紫色衫及手套, 仲話如果連條褲都係紫色就好^^
蕃薯件紫色衫~sorry, 係另一班同學楂機先岩(汗)仲有文迪啊~
阿sir話女仔應該試下楂機, 但都冇女仔去試, 女仔果然係怕羞d啊. 雖然我地冇份楂機, 但睇住雲妮及galan既精彩演出, 加上一大班同學拍得唔開心, 已經心滿意足, 估唔到臨走時仲可以見到d咁開心既片段~
放學時大家都走哂, 連一向同蕃薯一齊搭車既聯都走左去第二度搭車, 只係剩返我同蕃薯, 都唔知道同佢講咩好, 心想住希望快d有車同快d去地鐵站算. 點知蕃薯突然問我係咪真係唔讀? 我見佢一直冇覆我, 以為佢懶得理我, 點知佢竟然問我呢d? 我好sure答佢係, 因我想做個執業會計, 佢都知條路有排行, 叫我加油之餘, 也叫我唔好玩咁多fb, 唔係會沉迷, 估唔到佢又幾關心我既喎, 可能係我就黎走吧?
本來琴晚佢同我食飯都幾開心, 唔單止係同佢, 同佢媽媽一齊都好開心, 以為一切都會延續落去....但個天點會比我咁開心? 今朝早佢sms, 佢都冇覆我, 我猜想佢只不過係太忙, 唔得閒覆我吧?
直到夜晚, 我終於忍唔住係msn度話佢, 好討厭佢對我忽冷忽熱, 鍾意我時就痴到我實一實, 唔鍾意我時可以理都唔理我, 可以一句野都唔講, 甚至連msn內既所有對白也毫不保留, 我做咩要因為你而令自己咁痛苦!? 為一個唔鍾意自己既人值得嗎? 我可以一直忍受佢對我態度完全改變, 變成一個完全唔認識既人咁嗎? 答案係唔可以.
加上我唔知點解, 突然對會計好有興趣, 可能係因我爸連佢之前至愛既碧桂園都想賣吧? 我唔忍心見到佢冇左自己至愛及終老既地方, 如果我有錢既話, 佢就唔使咁做, 加上我係公司開始得到老闆娘賞識, 佢要我改哂公司全套會計系統, 由搵軟件, 夾價, 購買軟件, 實行....全部由我自己一手包辦, 老闆奻娘似乎幾滿意, 而且我也有滿足感外, 自己開始忘記蕃薯, 因太忙都冇時間同佢sms, 全程專注工作, 我覺得會計唔再係苦悶, 而係享受及忘憂, 我越黎越鍾意呢行, 好想再發展落去, 於是我做左個對自己黎講可能係狠心既決定, 就係讀埋呢兩個星期就唔讀, 開始讀返個會計學位.
起初我同自己講過, 話自己一定唔會讀, 到最後呢? 咪又係要走回起初既路, 但我唔後悔, 因ive比左好多好既回憶我, 除左tracy令我唔開心外, 仲有係蕃薯, 我同佢跟本都冇拍過拖, 鍾意及想同佢一齊, 但最後都冇可能, 對佢仲有少少留戀, 可能係因佢都有比d開心既回憶我, 令我更了解自己...可惜我同佢都係有緣冇份....我半夜訓唔著, 於是send左個sms比文迪及蕃薯, 希望兩人同我一齊去辦退學手續吧....
六點終於到左蕃薯屋企再拍片, 希望今日可以全部拍哂啦~今日所拍既全部都係我做哂主角. 本來應該開心先係, 但蕃薯竟然比左張tracy既劇照我, 仲話整左幾個鐘, 我都係主角, 唔見佢同我影劇照及執相, 真係令我幾嬲. 我呢個主角仲做呢做咩? 但也要忌住怒火, 拍埋佢先算...
首先係補拍設第一幕, 講述我同女鬼tracy上裝, 大家先傾下點拍....
決定哂點拍之後, 開始講解點拍...
呢一幕唔係太難, 好快就拍完, 但蕃薯為求迫真, 於是要影我打緊字個樣, 唔知我係咪對住鏡頭太緊張, 我成日都打錯字, 成日發出咚咚的聲響, 加上我係login msn時, 我竟然唔記得左自己個密碼, 開一個新account時又亂七八嘈, 係大家面前獻醜, 真係唔好意思><
之後拍我上樓梯去tracy屋企果幕, 推門入屋時要開燈及四周圍望, 我都拍左好多次, 都係失敗, 可能係自己個腦又再次塞左, 真係冇用. 好在最後都可以成功拍埋果幾場戲. 我記得其中有一幕我同波特扮情侶, 其實佢都帶到我入戲, 都拍得幾開心, 佢話第一張影得唔好話再拍過時, 我覺得真係好似情侶, 只係一take過就得. 文迪話蕃薯好似嬲嬲地之類, 我唔太記得, 類似啦...我就話佢唔會嬲啦, 我同佢又唔係情侶, 況且佢都唔鍾意我, 最後只係一笑置之...我當時心想, 我真係從未試過
拍扮情侶呢幕原來係個故事結局, 講出波特分手係因為我呢個第三者, 最後講我見到tracy之後會日早暈左, 當我清醒返時, 原來已經比tracy上身, 一直向前走, 就係特登要人估果個結局, 隻女鬼真係報左仇殺左個前男友, 定係放過佢呢?
最後終於拍完, 已經成十點幾, 文迪及tracy先離開, 波特原本想去食飯, 但最後都話趕唔到尾班車又走左, 只係剩下我一個冇飯食, 起初蕃薯都問佢媽媽有冇送, 但最後都係決定同我出去食飯, 太好了~(感動) 係食飯時, 佢依然都係坐係我隔離, 仲係佢媽面前話好累, 個頭挨住我!!??? 吓!? 佢媽媽係度架喎, 佢唔怕佢媽媽誤會我地係情侶嗎@@我哋叫左毎人一碗粥, 三碟野食share, 食完之後以為佢會送我去搭車, 不過見佢咁累就算啦^^
係屋企冇野做,自己化妝走去試過造型後,自己竟然走左去煮飯,煮飯時仲無聊影左張相...
有個傻婆煮緊飯=.=", 至於煮緊咩? 就係唔太好睇先冇影出黎...
今日下午同姑姐去左旺角買左假髮去拍片,順便去行埋街,由於趕時間返學, 姑姐同我行左唔係好耐就要佢走,唔好意思呢,等我做哂所有功課之後一定會再行街,第時行耐返d補數^^
返學前send sms問蕃薯係邊,佢已經到左葵芳,佢話等埋我,係小巴站見.呢個星期同左佢返兩次學,好開心呢><
返到學校果然又係比人話,可能係我哋太耐冇一齊返學吧,先係tracy話打左好多次電話比我,但都冇聽,其實我真係一個call都冇收過,而且仲係我打電話問你買左拍鬼片用既白色連身裙未,不過算啦, 有樣野佢都講得岩, 就係我係重色輕友多, 我自己真係好衰啊!
見到阿光手上有盒糖,我一見到紫色就發顛, 一直問阿光拿, 原來果盒係....紫心蕃薯糖!?唔係掛?點會係蕃薯黎架? 但我都好奇食下既...糖上有張透明既紙包住, 大家都仲研究緊張紙食唔食得, 最後既結果係張紙其實係食得既~
\
又愛又恨既一盒糖~全部係紫色係正, 但味道就....
終於到左返學, 也係大家最開心既時候, 因我哋全組既人都好期待呢份功課, 就係拍鬼片, 也即係我哋份video功課~好快地買左飯盒後, 我哋開始拍片. 大致上講下個故仔先, 係講我係網上認識左一個網友女鬼tracy, 佢約左我出黎見面, 但只係聽到佢電話及見唔到佢, 最後我去搵佢先知係女鬼. 由於時間唔夠, 我哋要快d去拍先得~
大家拍攝之前都似乎準備充足呢~先準備所有拍攝儀器先^^
阿聯整緊部攝影機~
波特試緊駁支咪!? 其實我都冇留意佢做咩=.="
再試下呢兩件重要物品有冇問題先, 有問題就死得!
蕃薯幫tracy化下妝先~又唔見佢幫我化既? 哈哈~
我哋既劇本軟件版~
本來想搵藍球場拍戲, 點知有幾個細佬打緊藍球, 最後走到去停車場上面既藍球拍. 途中同蕃薯媽傾起計黎, 傾街坊嘈音之類,估唔到都幾好傾呢, 傾到佢地成班都殊我地=.="最後終於到左, 先拍其中一幕, 就係我係藍球場上搵tracy, 但搵唔到, 只係收到佢個電話...
佢地努力set機呢, 但我後來先發現, 冇人影底我拍戲果幕既? 我果幕聽電話其實第一take已經好, 但蕃薯佢地想玩多d動作, 如邊行邊講電話, 間中要停係度....又要有演技, 又要唔過鏡頭, 當我有情緒拍時, 已經冇街燈, 加上tracy遇到果類[朋友仔], 結果要中途離開, 其實第一段片已經唔錯!
室內(蕃薯屋內) : 波特及tracy演既情侶吵架~
大家都煩惱緊點拍呢幕吵架, 以及之後故事去向~
蕃薯整既假血, 好似真, 勁恐怖~係用黎化tracy個鬼妝><
tracy坐係度做咩? 扮緊割脈之後死左既姿態~
開始拍攝果幕呢, 好緊張呢~
真係好似真既一樣, tracy演技好勁啊~!!
拍完呢幕之後, 文迪突然打電話黎, 果陣已經係三點幾, 文迪打電話黎要探我地班!? 我哋當時真係好驚嚇, 夜媽媽得佢一個女仔黎, 驚佢會有危險, 再加上佢唔係同我地一組, 我同蕃薯媽都驚佢有咩事就唔抵. 所有人都叫佢唔好黎, tracy甚至打埋比darren佢地陪文迪黎, 但佢堅持到冇人可以阻到佢呢, 最後佢都係答左車黎到tm
文迪落車後見到我哋拍攝中, 那時拍既係我聽tracy話, 係7記買完飲品之後去搵佢. 係我買飲品時, 女鬼tracy係牆角望住我, 而且仲打堆綠光果隻, 真係恐怖啊!!有一次我唔知佢地拍緊tracy, 我竟然行過左遮住鏡頭, 又要拍多次, sor牙><
之後要去到馬路上拍, 夜晚都幾多車, 幾危險, 要大家睇住有冇車黎, 要冇車先可拍攝啊!! 拍既係我開始上到tracy所住既大廈上, 我拿住剛係7記買既飲品一直係馬路上行, 由蕃薯拿住攝錄機拍, 我係行既途中只係望一望後面, 感覺到有野係我後面, 之後一直行. 過程ok, 冇再take 2, yeah!!
那時已經四點幾到, 就拍呢日既最後一幕, 就係去搵tracy途中, 見到一個鬼看更阿銘, 佢阻止我唔好去, 但我堅持搵我朋友要上去, 我呢幕可能係太眼訓, 開始冇咩精神, 因我差既演技而要成日都NG, 拍左成六七次先可以拍好, 大家好對唔住~~~!!! 
阿銘既鬼看更造型look勁正~尤其佢隻無影手, 哈哈~
最後因阿聯要返早班, 我哋全隊可以休息一下訓下, 那時我一定係最開心^^拍左咁多幕, 終於有得訓啦! 睇黎波特都好眼訓, 佢係屋既另一邊訓左, 剩下既組員及文迪除左有時間睇返D相外, 仲有影底其他人休息個樣=.="
我話之佢地, 一於訓個夠本!!
哈哈~波特仲累過我...
tracy唔係真係訓既? 睇黎佢好like隻加菲~
阿銘都仲可以玩online game!? 唔係掛?
蕃薯睇返我哋所有既拍攝片段!
我哋各人休息一會後, 大家去附近酒樓飲茶~大家都未試過咁早飲茶, 睇黎都唔係食太多野呢!! 蕃薯叫左個臘腸蒸雞飯, 令到我又好想食, 好在佢幫我叫, 可惜我唔食臘腸, 最後比左蕃薯食....大家越叫越多食物, 擺係枱上差d食唔哂><
個樣都幾得, 但味道就麻麻....
食完野之後, 我哋各自回家休息. 但仲未完成, 我哋仲有幾幕未拍, 要係星期日既六點再拍, 諗起都頭痛, 訓下覺先!
首先要多謝mooji先, 佢因近排公司冇野做, 走左去玩摺紙, 佢摺左聖誕樹比毎個同事, 仲可以選擇埋顏色. 最後我選左銀及藍色, 可能係感覺上呢兩隻色會襯d掛! 至於紅色呢我又唔鍾意, 金色又覺得太俗, 於是咪選擇兩隻睇落去比較舒服既顏色~
哈哈~真係幾靚啊!! 總之學下點摺啦~
全日公司都冇野做, 真係悶到我死, 我不停地上網及玩facebook, 整到我對住個電腦都覺得好煩及悶, 成日去望下幾時放工, 時間過得好慢, 過一個鐘都覺得好慢....原來冇野做真係咁痛苦, 因我之前果四日都不停做野, 覺得時間過得好快. 唔怪之得多數人都話有野做仲好啦!
之後candy佢地計畫買布甸食, 由於我冇錢, 再加上我近排肥左要減肥, 所以都係唔食, 佢地最後買唔到布甸, 變左買芒果蛋糕, candy同mooji都好衰, 特登話個蛋糕勁好食, 仲係我面前食, 好衰><不過佢地都係玩o者, 你地引唔到我既, 我只好影左張蛋糕既相, 黎個[望榚止餓]^^
個樣都唔係咁好味o者~都係我媽生日果個好味d, 哈哈~
終於放工了, 可以返屋企~諗起聽日去拍片就開心哂, 期待聽日拍片中^^
終於唔使返學, 以為可以輕鬆一下,但一諗起老闆娘交帶我, 要我設計一條收腹褲及一套內衣套裝, 的確係個好大的考驗. 我只係跟老闆娘學過少少點畫收腹褲, 我都冇咩點練習, 點樣可以設計條收腹褲?而家仲要我學畫內衣套裝!? 簡直係越級考驗.....我都唔知點算好, 好在有我哋公司既經理阿珍, 我終於有人help啦! 點解佢叫經理呢? 因老闆娘幫佢整左張卡片, 有埋佢個職責, 所以我哋咪咁叫佢, 呵呵~
終於開始畫下, 經過阿珍既教導, 同埋佢一直幫我執下個圖, 我途中真係對住個excel發呆, 因我哋公司係用excel黎做各項設計, 我都摸左好耐先知可以控制到d線條, 而且覺得好似illustrater, 不過excel就比佢麻煩好多, 但原理相同. 最後係辛苦努力之下完成我畫既第一條收腹褲~
用既顏色唔太好, 本來用肉色, 但我又唔鍾意....加上個設計都係麻麻, 我同事candy仲話好核突><
比個同事話完之後, 我的起心肝, 再跟阿珍學習設計內衣套裝, 所謂既內衣套裝係一個bra及一條underwear, 兩者都比收腹褲難畫好多, 我單單畫個bra都用左成大半個鐘, 難畫既係bra既杯形狀, 最花心機都係果部分, 如果個杯型唔似就根本唔係bra, 冇左個承託作用. 仲有條短褲都係難畫, 好在有阿珍一早畫好既圖, 我只係改少少就ok~最後都可以完成, 感動><
阿珍都讚我個bra畫得似, 而且佢及candy都話我個bra都畫得幾靚~終於有人讚我啦, 好開心~
唔知點解我一諗起用黑色喱士, 可能係我真係太愛有喱士既內衣, 好想加好多喱士落去. 至於粉紅色係因我覺得佢同黑色襯之外, 因我覺得粉紅既內衣其實好靚^^而家只好等老闆娘睇下, 唔知可唔可以過到關呢?
唔理其他人點睇我既作品, 我係設計內衣既過程之中覺得好開心, 除左要識用excel畫圖之外, 仲要有設計既靈感, 點樣搵呢? 就係睇唔同巴既雜誌, 換句說話黎講係可以光明正大睇雜誌, 而且仲可以睇埋時裝, 因日本時裝雜誌之中, 內衣及時裝係不可分割, 可以做到自己鍾意既野的確係開心^^而且也諗唔到, 原來excel係可以畫畫, 簡直係難以置信...
一到左呢日, 就會有雙層意義, 第一係tvb台慶, 不過呢個同我冇咩直接關係, 因呢日也係我媽生日. 可惜既係, 我今日仲要返學, 唔可以同佢一齊慶祝, 唔可以一齊切蛋糕, 同埋影相...好在我爸有影到相, 我先可以放學返去睇睇~
媽媽同姪仔係個生日蛋糕面前合照先~
阿媽個生日蛋糕~係芒果, 唔係, 應該係什果蛋糕^^
一齊切蛋糕囉~我估我係現場見到一定會好開心^^
返到屋企之後, 當然比面阿媽, 食埋佢地留返比我既件半蛋糕, 我都唔知點解係件半架! 總之點都會食埋佢啦~仲有一句: 媽媽, 生日快樂^^
黎緊份video功課係應用所有既拍攝技巧去拍攝一段片, 大家似乎都有哂idea, 連劇本都有埋, 真係要拍攝一段鬼片, 因人手不足, 只有兩名主角, 分別係女鬼及一個同女鬼通訊既女生, 最後一致通過, 應該話係tracy寫劇本時一早已經定左, 由tracy演女鬼, 我就做個女生. 當中有兩個配角, 分別係殺女鬼既男友及鬼看更, 蕃薯竟然自願做女鬼男友時, 我突然內心一酸, 雖然話我同佢都有對手戲, 因我會比女鬼上身, 但始終都係覺得唔開心.....至於鬼看更, 都係由阿銘做好了, 其實我對呢個角色都幾有興趣, 多過想做個女生.
至於故事係咩, 都係等星期六我哋拍攝時, 之後會有幕後花絮及拍攝過程post上黎呢度^^希望拍片時唔好有咩意外就好, 因會係tuen mun拍, 聽蕃薯講果度有好多鬼故, 而且我哋係鬼故, 仲要係夜晚, 似乎真係玩得大左d啊=.="
阿sir要我哋影底拍攝既地方, 蕃薯都已影左相, 睇起黎真係有d恐怖呢....
雖然馬路上有車, 但都已經好恐怖>< 
夜晚既遊樂場, 連我都唔知人同我哋段片有冇關係, 都係睇下我哋導演tracy及蕃薯決定吧!
蕃薯講過最恐怖既輕鐵站旁, 睇黎真係幾恐怖呢...
其實只係睇個場景已經好擔心, 我哋拍鬼片真係唔怕嗎? 都係之前所講, 希望冇事啦! 都係唔好諗咁多, 第時先算! 返到屋企之後, 爸媽煮左琴日阿爸同朋友係深圳釣返黎既龍等魚, 佢哋炆得好好味啊, 而且又我至愛既冬菇及豆卜, 勁正!! 哈哈, 睇黎我唔肥都唔得=.="
真係炆得好好味, 原本打算唔食晚飯既我都忍唔住食哂呢盤~