我都好想老闆娘加我人工, 比多d錢我, 可惜唔係呢. 而係佢係放工之後幫我化妝. 我自己又衰既! 又唔係完全帶哂d化妝品出街, 結果冇粉底液, 乾粉..., 更加冇洗面用品, 可能你地會問, 點解會係公司化妝架? 而且仲係老闆娘幫自己化, 問我係咪撞親個腦. 計我話呢話我d人先short, 真係珍珠都冇咁真!!
老闆娘先叫我用佢擺係公司支洗面奶及茶左cream先, 整到要係廁所度落妝, 好在個廁所只有一個間隔, 而且又冇人出入, 冇人見到我個落妝核突樣^^
洗完面後, 老闆娘即刻施展佢的化妝本領, 冇粉底液唔緊要, 可以用住遮蝦膏, 雖然唔可以盡蓋我面部缺點, 但都ok既. 途中講到我條眉好幼, 後面果部份更係冇, 佢地叫我去紋眉, 但我驚出面果d店舖會紋得好衰, 如果衰左咪一世唔見得人!? 與其係咁, 我寧願自己畫, 而且眉色又唔太粗, 可以畫啡色及黑色都得, 可以話係惟一優點吧? 畫完眉後, 再畫返胭脂, 唇彩, 個基本妝已經完成!
之後老闆娘再幫我set埋個頭, 只係用兩條普通橡巾, 一個長尾夾, 已經set 好左個頭!? 佢果然係好叻牙, 估唔到化妝set頭都難唔到佢. candy即刻拿個電話黎幫我影相, 仲同mooji講話佢地都化妝返公司, 我都想見下你地化妝樣~我都唔好意思哂老闆娘時間幫我化妝, 於是話請佢食飯, 佢話等我結婚先請佢, 我話都係唔好啦, 都係普通請一餐算吧^^
老闆娘幫我set緊個頭啊~
終於化完個妝~後面咁亂既地方係我張工作枱=.="
遲左四十五分鐘先走, 好在公司同學校距離好近, 唔係遲太多, 蕃薯佢又同我sms, 佢話自己就返到, 我誤會左佢意思, 以為佢係葵芳地鐵站, 點知佢已經返到學校, 呢個成日遲返學既人仲比我更早到學校!? 以為有得同佢一齊返學, 不過是但啦, 一開始都知冇可能.
中途發生左件唔開心既事, 應該話我都唔知點解唔開心, 我見到tracy突然坐係蕃薯後面(因佢之前唔係咁坐), 本來都冇野既, 但之後阿sir話有個video 的project時, 佢講到好似全部由佢話事, 阿駿及蕃薯都認同佢意見, 蕃薯仲問阿sir可唔可以打破原定既五人一組, 改為六個人? 阿sir話可以, 不過要做好d, 我都心知不妙啦, 咁即係要同tracy一組!? 我唔知點解勁唔想, 可能係我唔buy佢個idea, 佢話咩拍鬼片, 我對呢d無興趣, 覺得好似好低b, 於是我就問下文迪有冇興趣同我一組, 估唔到我哋既意見幾一致, 都係認同拍以女仔為題目及用抽象的手法去拍攝, 總比鬼屋好吧!?
其實仲有一個原因我唔想同tracy一組, 除左覺得佢咩都話哂事咁, 仲有佢竟然同蕃薯好似近排好好, 成日同佢傾得有說有笑, 我見到佢地咁樣好嬲. 而且之前可能多數只有我一個女仔同佢地班男仔一組, 唔鍾意突然多個女仔係度....呢d都係我私心, 不過當然都係拍片的題材唔滿意既比較多, 於是我同佢地講話分開組, tracy問我係咪怕個內容, 我當然唔係, 只係有其他原因, 就係唔想同你一組, 但邊講得出!? 蕃薯都好爽快同我講話bye, 而且仲話唔洗六個人一組. 佢以前都叫我同佢一組, 而家竟然咁對我!? 我呢個時刻好鬼死憎tracy, 甚至一句說話都冇同佢講!! 我企在路中心, 佢都幾開心踏我博頭, 叫我唔該借借時, 我呢刻真係好想fing開佢隻手!!同埋我同自己講, 之後d科我唔可以再比佢同d男仔一組!!尤其係蕃薯
之後我去左文迪同berry聽書, 佢地都好好, 讓半邊椅子我坐, 我驚令佢坐得唔舒服, 同我睇唔到白版, 於是坐返上前聽書. 我見到蕃薯同tracy坐得好梳時, 我個心不知幾開心, 原來我自己係咁恐怖, 我即刻坐係蕃薯後面(表示抗議吧?) 蕃薯照常扮恐龍聲話我, 最後仲幫我影左張相話我係怨婦, 其實我心情唔好咪因為果隻tracy!!
又係佢手痕痕幫我影既相....當係老闆娘為我化妝的其中一個紀念^^
之後波特同我講, 佢話原本想我做storyboard果部分, 估唔到我竟然唔同佢哋一組, 佢好似有點失望呢....我應承佢英文會同佢一組, 其他科都係, 我只係唔想佢地同tracy一組!! 估唔到我真係可以咁憎一個人, 甚至一返到屋企即時delete佢個msn, 原來女人的妒忌心真係好可怕.....
夜晚臨訓前同蕃薯sms, 話我對佢可有可無, 之前成日同我一組, 而家又唔理我...而且同tracy好似好左咁多, 又得到佢一句 [無情情又唔知講左去邊, 會令我覺得好討厭]. 你而家唔係一直都唔理我, 唔重視我咩? 我冇話佢, 自己訓覺!
welcome to my world...
My model life since Nov 09~
My sweet life w/ bf joejoe since Dec 09^^
琴日仲因為fb上冇得見我呢位好友stacey而唔開心. 仲膽心之後會唔會毎日都見到佢. 係我玩收買朋友時, 見到佢係我留言版上留左言 [facebook admin 終於俾返個account 我喇~~~ T_________T]. 吓!? 到底佢講咩? 發生左咩事呢? 於是我再去inbox睇睇. 原來佢話個原因係佢o係收買朋友post 得太多link, fb話係 spamming, 將我個accuont disable o左, 我即刻send email 俾fb admin 道歉... 佢地今朝先開返俾我咋, 不過佢地話要小心, 係最後一次機會, 如再犯, 就永遠冇o左個account~原來唔可以係收買朋友之中po太多link架, 呢個真係唔知, 因我除左起初玩fb時po左d link去人地個留言版之後, 就一直冇po過, 但也有好多人黎買我或我d貨, 可能係我d貨又平又靚掛, 吸引左好多有錢或普通人黎買我野, 因我好鬼弧寒, 唔願意比太多錢買貴野, 又唔想自己d錢剩下好少.
其實我本人都幾鐘意玩中英文既收買朋友, 因我可以識到唔同既朋友, 又或者可以同唔同既人傾下計,可以冇咁悶麻. 我覺得兩者之間既唔同係, 中文版d人比較保守d, 但佢地相對地會比較好人及好傾, 可能係用廣東話既關係吧? 英文版呢....d人多數係外國人, 所以佢地洗錢會比較豪, 但好少會同你傾計及比較冷淡, 可能呢d就係中西文化的差異吧? 慶幸可以玩到呢兩隻game^^
中文版的account, 影得唔太好!? 託其他朋友既福, 我既身價已經升到一百八十萬^^
英文版身價就好差囉, 同中文版一樣!? 我見好多朋友就有幾百萬啦><
同佢都係傾下大家的愛情經歷及想法, 我哋既想法都幾似, 可能因為咁先可以做到朋友, 加上從未見面, 可能咁先會透露多d自己內心說話. 係佢口中知道好多陽光男孩多數係基!? 唔係掛!? 我仲想搵過陽光男孩做我男友架, 唔好封我條後路啦(吓!? 自己講咩)好過要舊對我冷淡及唔太好既蕃薯, 除左stacey外, d人仲要話我同佢外表襯, 咪玩啦!! 我想殺人啦><
仲有佢問我想唔想我做返佢隻pet, 我當然想啦, 但佢又要買返佢個主人, 成六百幾萬, 冇辦法啦, 惟有希望佢會有錢買返我吧!
琴晚玩得好夜,所以今日毎人都好晏先起身,懶懶行去梳洗後,開始食我哋個杯麵早餐!? 之後我哋去玩埋射箭,個弓比我想像中更重呢,而且又要帶住護腕.教練大約教左我哋既射箭方式及姿勢後, 我哋一行十人分兩批開始進訓練. 雖然成績麻麻, 而且仲整親手,但覺得好好玩~好想再玩耐d,可惜時間好快過....
呢個已經係我最好既成績黎啦~射中外框 + 個紅心, 一共有五支箭=.="
玩左大約一個鐘後又返到營屋收拾東西, 食埋個午飯就走, 餐午飯真係...不願置評, 先講送菜先, d款式又普通, 味道好淡及份量比較少, 但我太肚餓既關係已經食左碗幾飯, 因我知道今晚先有得食飯, 惟有食住先><之後我哋坐旅遊巴士回程, 又坐巴士, 地鐵...用左成三個鐘先返到屋企, 真係好累!
但我都照玩fb, 見到我的好友stacey突然唔見左人, 冇哂佢係收買朋友上的對話, 而且又冇左佢個樣, 好在我同佢係inbox傾計的說話仍然係度. 但唔知點解覺得自己好似突然冇左個好朋友, 覺得好唔開心, 同埋覺得少左個傾心事的對象, 好似有d失落呢, 唔知佢因咩事突然冇左個account, 之後仲有機會見到佢嗎? 希望會啦.....睇黎自己真係好倚賴人, 自己未夠獨立, 究竟自己幾時先可以堅強, 自己面對所有困難, 唔使只係把自己唔會開心既事同人講呢? 而係去真正解決困難?
終於去camp, 而家唔係應該開心嗎? 做咩仲苦著臉? 蕃薯唔使你為佢慶祝生日咪算囉, 仲好啦! 唔使哂錢買野比佢, 況且佢又有咁多人同佢慶祝, 使咩我牙!? 都係開開心心去camp吧啦!
準時去到我哋成班老友鬼鬼既約定地方 -何里活中心百佳門口等, 我果然係著到唔係去camp咁=.="先去百佳掃貨吧, 除左我既早餐加午飯(燒味飯)外, 仲有一大堆入camp的零食, 薯片, 蛋糕, 同埋我哋至愛既杯麵....仲有燒烤及必需品等等, 買下買下全架車裝滿好多野...
呢度只係一小部分而已...之後買多左好多野!!
掃完貨之後, 我同寶妮去恒生取錢, liz, 嘉華及酸梅拿住一袋二袋搵我地, 之後再去坐巴士入西貢. 估唔到都幾多人去, 巴士站又熱, 我又肚餓, 好鬼難頂><好在liz佢地話坐上層最後果排比我開餐, 唔該哂你! 終於上左車, 我地立即衝到後排食飯, 嘉華佢有點肚餓, 於是我把飯盒分三分之一比佢. 係車上食飯真係好騎呢, 係車上鄧下鄧下, 真係好驚個飯盒fall落地下冇得食, 於是我哋以最快速度食完個飯盒^^
我哋呢個camp內所有的食品及用品, 有四袋呢~係唔係有點誇張呢?
開飯盒儀式~睇我個"猴擒"樣, 成個餓鬼投胎=.="
睇下我食得幾開心呢~點解唔等我開左飯盒先影相?
係canteen門外的活動表, 也係決定我哋今日兩日玩咩活動的關鍵, 但願可以玩得d野吧!
我哋先到canteen辦理入營手續, 果然係全部爆棚, 真係坐無虛設, 等左好耐先可以拿key入營. 我哋特別留意營地位置, 因有d營屋距離玩的場地比較遠, 我叫佢做[發配邊彊]位. 結果我哋的營屋係...唉, 同發配邊彊差唔多, 最多只係近個燒烤場地=.="雖然唔係太鍾意, 但都要去個營屋吧!
好在一早食左個飯盒, 入到西貢之路仲鄧, 好似過山車一樣, 多得途中有文迪, 蕃薯及嘉輝同我傾. 文迪及嘉輝都唔奇, 因佢哋係都係關心我既朋友, 但蕃薯呢? 其實我又唔係嬲佢唔比我同佢慶祝生日, 只係我突然唔想同佢再講任何一句說話, 不過唔知點解, 架車一去到西貢, 就突然想同佢分享自己既去camp經歷, 見佢又好快覆返我就同佢傾下. 終於去到西貢, 我地仲要去到運動館外排隊坐專車入麥理浩夫人渡假村, 也就係我哋呢次camp既終點站. 真係唔知幾耐冇黎過囉? 大家先係門口影相吧!
其實都冇咩正式的門口, 呢個木牌也係到左麥理浩夫人渡假屋的證明吧!?
當然唔少得團體照^^
全部人入canteen辦理入營手續, 果然係好多人, 仲有好多家庭一定大細一齊入營, 只有我哋幾個係朋友, 好似有點怪怪. 嘉華及酸梅努力排隊辦手續及拿key. 我哋特別緊張個營社位置, 因我哋好想係營入玩多d野, 驚不幸地抽中距離玩的地方比較遠既地方, 我也笑說果d地方係[發配邊彊]. 結果係...唉, 同發配邊彊差唔多啦, 最多都係比較近個燒烤場, 雖然唔係太鍾意, 但都要去間營屋度擺底自己物品先...
先係營地之前影張大合照吧!
終於到左我哋個營啦~!
我哋個營屋45號~好鬼隱蔽架, 不過都好既, 唔使D人行過時望入去^^
我哋營屋一共分兩間房, 呢間係其中一間, 係個大房, 我哋全部人都係度訓~
營屋內第二間房~係個雙人細房, 突然幻想會同蕃薯一齊黎!?( 係度up咩牙?)
撼好東西後, 我哋一齊出外搵野玩, 我哋行左五分鐘度先到玩既地方, 可惜我哋去到果d玩的地方時, 全部都比人book哂, 而毎個玩的場地約一個鐘到一round, 我哋只可玩一樣遊戲. 但我哋玩咩呢? 我哋周圍去搵, 什麼射箭場, 羽毛球場, 繩索...已經比人玩哂, 到最後我哋決定玩繩索, 見到有個女仔玩到好似好辛苦及出哂汗, 在旁既教練叫佢努力撐落去, 睇落去好似好辛苦呢, 唔知係咪好難玩呢? 上一班人玩完之後, 到我哋入去啦, 做完熱身運動之後開始! 佢地咁多個人都叫我第一個玩先, 好驚!
起初玩到第一關都唔怕, 但過左呢關就....
當我玩第二關時, 因我畏高, 已經唔知自己講咩, 所以我竟然鬧班朋友, 邊個叫我玩第一個? 個教練幫左我口, 叫佢地唔好叫我上去玩先. 不過當然係講笑, 其實我冇心鬧佢地, 只係自己太驚衝口而出, 對唔住牙, 大家><
呢一關我真係冇玩到, 係交叉繩索, 係睇liz及酸梅互相幫大家玩幾開心. 仲見到我已經玩緊另一關
我終於玩到呢關啦! 呢關真係難玩到暈, 幾經辛苦我先玩到, 真係好難平衝呢>_<"
呢關易玩好多, 我見有d遊樂場都有, 好快就過左囉~
最後一關啦~呢個都幾好玩! 我好like 琴梯呢個過程, 唔知點解呢?
我哋玩到成身汗, 又辛苦, 但好開心. 可惜換黎既係成十幾處蚊爛, 真係痕到死! 去營屋休息下後, 一早去霸爐燒野食, 原來一早已經定左位, 早知唔使咁早去啦=.="本來想影相之時, 個相機...又冇電!?又錯過左重要時刻之一!!! 燒烤既食物唔太多, 而且味道又啖, 只有茶左蜜糖的味道, 惟一我比鍾意食既有魚旦, 好彈牙~唔知係邊度可以買呢? 燒烤途中大家傾計, 好開心呢^^
燒完野食之後本來想去觀星台去觀星, 點知個觀星台冇開!? 夜晚唔開幾時開牙? 只可企係觀星台附近睇星星, 綠油油的郊外風景之中, 少左街燈, 仰頭望天上星星, 星星發出微弱的光, 真係好靚! 觀星後漫步回營屋, 大家借左UNO及層層疊玩, 玩完後由嘉華另一名朋友阿詩教化妝, 我好努力地學, 我終於學識化基本妝, 覺得好開心呢, 甚至仲影左相, 可惜係部電話內....不過唔緊要啦, 可次再化靚d先影啦^^
幾個女仔玩得好開心, 成三點幾先訓, 真係好累呢.....聽日再繼續玩^^
放到公司, 老闆娘問我食唔食早餐, 我平時買個包一返工就即刻食, 當然食左啦, 估唔到佢竟然請我食早餐, 我都有點呆左, 最後都係因自己為食而拿左佢兩件迷你三文治, 一件係藍莓醬, 一件係花生醬~兩件都好好食. 之後佢又比左個三文治盒我睇, 個盒好得意架, 老闆唔知係咪見我好鍾意, 佢竟然比左個盒我, 我都覺得唔好意思, 想比返錢佢, 佢又話唔使, 我又唔好意思拿左個盒, 連candy都笑話我貪心...比大家睇下個盒先:
全個三文治盒個樣, 其實唔平凡架><
個三文治盒由兩部分組成 ~ 啡色其實係盒蓋, 白色係個盒~
個盒其實可以摺埋及伸開既, 而且仲好易收埋, 估唔到呢?
終於整好左個三文治盒~
臨放工時, 多謝mooji比左半件腿蛋治我食~仲有姑姐同我妹及我去左行陣街, 比我妹及我毎人一包夾夾糖我地, 仲有三個人毎人一件格仔餅, 真係勁好食呢, 結果令到極討厭公司的麻煩同事及工作既我妹開心好多, 令今日收獲豐富既我倍添開心, 但姑姐佢係咪真係開心呢? 平時公司又多野做, 加上讀law的煩惱, 令佢需要減壓, 返到佢自己屋企又可搵邊個傾呢?
唔知係咪我今日太開心, 個天又黎拿走我其中一樣野呢? 今日蕃薯生日, 係佢生日前我曾經講過話想同佢一齊過或送生日禮物比佢, 佢都話生日正日會心情麻麻及話會自己一個係屋企呆, 於是我冇再問佢. 點知佢今日有人約佢, 請佢食飯, 佢就即刻去, 同樣都係我請, 但佢竟然應承人而推左我, 太過分啦! 即使佢之後話我知就黎返屋企, 坐緊車....我都已經冇再理佢, 自己係msn上off埋, 當佢返到屋企時, 佢sms問我冇on, 我都已經訓左覺, 唔想再理佢. 以前話到我幾重要, 點知最後唔使我陪佢慶祝生日, 甚至之前話做功課都冇話組我, 原來佢只係得把口講下, 都係唔好再相信佢, 自己已經唔想再理佢, 唔想再同佢傾計....
今日係facebook上睇到呢段野 :
[17歲的婉玲不只樣子甜美,而且勤奮好學,樂於助人,深受家人、老師、同學疼愛,她又能歌善舞,所以引來不少狂蜂浪蝶的追求,可是她都一一婉揮這些追求者,因為好已經有了心上人~~~
就在那個男孩和她表白的那天,巧合被一個心儀婉玲的男老師目睹過程,他心有不甘便生了歪念,一天放學後,男老師故意叫她留下來幫他整理班會的事,當所有同學都離開校園,只剩他和婉玲時,他強行把婉玲拖拉到一間空置的課室把她強姦了~~~
完事後,那個男老師一個人離開,婉玲一個人失聲痛哭,她感到生無可戀,萬念俱灰之下她爬上了桌子,把領呔綁在天花板的風扇上,就這樣吊頸死了~~~
事情發生後,男孩無心戀世,也在家中燒炭自殺死了,而男老師卻消遙法外~~~]
我覺得果個婉玲好似自己, 我指既只係一直拒追求者, 因自己內心有個心上人. 其實我覺得咁做好偉大, 即係話自己唔會移情別戀同埋尊重愛情, 不過應該只限於另一半都鍾意你吧? 好似我咁, 只係專一鍾意個唔鍾意自己既男仔, 也只會為自己帶黎痛苦, 成日因為佢哭, 佢多數都唔知, 即使佢知, 佢又可以做d咩野呢? 後來我發覺左, 即使自己真係鍾意個男仔都好, 都要欣賞下第二d男仔, 可能你會發覺有一個男仔可能對你會更加好, 更加關心你. 最近我發現有個男仔叫家輝, 也係呢個blog度多次提及過, 佢除左可以解悶, 成日同我傾計外, 也會有時擔心下我, 我先知道我係想要個人重視我, 關心我. 我都叫自己觀察耐d佢, 因網上認識既都係信唔過, 電話又只係傾得果一至兩次....對佢唔係真係好好感, 應該而家只係欣賞佢吧? 或許, 有呢個朋友都唔錯呢^^
至於個男仔會唔會自己心上人而死呢...我又唔可以話個男仔蠢, 只係佢用情至深. 但我覺得個女仔死左, 係咪一定要跟埋佢一齊死呢? 我覺得應該要代個女仔努力生活落去, 可能我覺得死後都唔知係個咩世界, 就算大家一齊死, 也唔代表死後可以係埋一齊, 不如實際開心生活仲好. 比我係婉玲, 我一定唔會忍心見到自己心上人為自己而死, 可以既話會默默守護佢.
不過講到底, 一定係個男老師唔岩啦, 點解呢個世界咁唔公平? 應該話呢個世界跟本唔公平, 咩野好心有好報, 我覺得佢又唔係完全呃人, 又唔係全對, 只係用黎嚇下人, 令到佢地唔好傷害人吧? 我覺得個女仔反而可以指證個男老師, 即使要自己出庭作證, 令到個女仔諗起傷心回憶, 但總比令到個男老師消遙法外, 因佢覺得自己咁做唔使承擔後果, 會變本加厲, 令更多人受害....
呢件事也令我反思, 究竟愛情係什麼? 一直愛個人, 從一而終係冇錯, 也係好多情人的夢想, 唔通一齊左又想分手咩? 咁不如唔好一齊!! 我覺得件事中的三位人物愛既方式係錯左, 婉玲及佢男友對對方專一一定冇錯, 但呢件事上要唔要死呢? 我覺得兩人努力及勇敢面對全件事, 互相支持大家先係重要; 而個老師也係睇唔開, 見到自己鍾意既人唔一定要擁有, 唔使一定要默默祝福對男女, 比我自己也做唔到, 最多只係離開, 去搵另一個鍾意自己既人, 就算佢得到個女仔肉體又點? 人地個心唔係自己度, 無論做幾多野都冇用...
自己做咩有咁大感慨呢? 可能係感同身受吧!?
放工如常返學, 突然蕃薯同我講佢話就黎到, 我起初都不以為意, 坐左小巴返學校. 點知蕃薯打電話黎, 佢話自己黎緊, 做咩唔等埋佢一齊返學咁蠢!! 吓!? 估唔到你突然約我返學, 好耐都冇試過啦, 點知你係咪真係同我返學啊, 加上我撞到阿ling, 所以咪坐左小巴先囉, 又話我蠢!?真的是....最後我應承左佢, 話返到學校等, 同埋我把自己買左既小丸子比佢啦, 佢都答應左, 我惟有邊食邊等^^
同阿ling係學校食野時, 見到berry及文迪返, 我把自己既小丸子分給他們, 之後蕃薯又返, 我比埋最後果粒比佢食, 大家食完野之後就去上堂. 不過果間野d小丸子真係幾唔係太好食, 下次最多買返d好食既比你地啦^^
教左關於audio的知識, 包括錄音室內各項設備, 最為人熟悉的錄音咪啦, 混音設備, 錄音設備....仲有聲音的定義. 毎樣設備係電視上見過, 以為自己唔會有機會見到及接觸, 因自己又唔係呢行工作, 又冇朋友認識, 加上呢類設備最少都要幾萬元一件....諗左好多冇機會見到呢d設備的原因, 估唔到學校有呢類設備, 而且仲可以親身去接觸及感受. 最衰都係蕃薯話我係恐龍叫壞d咪=.="估唔到全個錄音室真係好型, 共分兩個房間, 出面果個係負責比其他工作人員錄音, 混音, 聽所有錄音之內容; 入面真係比表演者錄音, 毎件物件都好得意呢, 令到自己驚嘆, 而且又有開心的感覺!?
呢科有個project要做, 就係三至四個人一組合作整個電台節目, 阿sir話多數人會演drama, 蕃薯即刻同波特講話同佢一組, 佢都冇講話同我啦, 唔知係唔係因為冇返學時同佢sms講d令佢嬲既野而佢唔想同我一組呢? 後來阿聯話[三人一龍]一組, 我同佢又冇否認唔係一組, 都係第時先算吧!
黑格比係個颱風黎既, 係呢年內行得最快既颱風, 好多人, 尤其係打工仔, 包括小女子在內, 都好期待呢個颱風, 希望打個八號風球, 有多一日假可以休息一下. 但事與願違, 我地返工時都只係三號風球, 好多打工仔都好失望地返到公司, 繼續工作!!好在我地公司唔係太多野做, 全部同事都係公司度hea, 集中都係講我比蕃薯影果幾張靚相, 又話相中人唔係我, 外表好假, 佢地講話佢地執一執都可以好靚, 其實呢個已經唔係咩新話題, 但佢地講左好多次, 自己終於開始嬲, 叫佢地唔好再講, 其實自己都唔應該對住佢地發脾氣既, 佢地只係心直口快, 有果句講果句, 佢地都係冇心既....好在佢地既大方, 佢地冇嬲到我, 仲一齊留意住天氣報告...
聽到candy個老公係大約三點度有內幕消息, 話個風會係四點會掛, 於是令我地毎半個鐘留意電台報導, 但都係講話會係四點至八點會掛八號風球, 我哋一次又一次失望, 由三點聽到四點半, 仍然都係果個答案, 仲未掛八號!? 究竟個天係咪玩我地架? 大約四點半到, 突然收到老闆娘一個電話, 佢話我地冇咩事要做, 可以離開公司啦! 真的假的? 而家仲係三號風球, 佢竟然比我地走? 我地當然開心到飛起~立即執好野即刻走囉^^
我開心到把呢個消息通知左三個人, 包括我既好姐妹文迪, 原來佢唔知六點之前會掛八號風球, 仲話已經出左街!? 好在佢都可以係六點前返到屋企; 另一位係蕃薯, 不過佢一直都冇覆我, 只係見佢早左係msn度上網; 仲有一個對我好好既男仔, 讀心理學果個嘉輝, 佢一直send短訊話我知天氣最新情況, 我邊返屋企, 邊個佢sms, 突然有個人對我咁好, 好開心呢~返到屋企之後, 我又再同唔同人傾計, 我突然覺得自己真係唔同左, 以前覺得除左同蕃薯外, 其他男仔我都冇咩點理, 但放開左之後, 我開始同多左男仔傾計, 而且仲關心左佢地, 如嘉輝好耐都未返到屋企我會問候下, 仲少夜晚出街食飯令到自己發燒, 我會叫佢食藥及休息多d, 我同仲少傾左幾句之後, 佢終於休息...我開始感受到有人對我好及關心我的, 特別係嘉輝, 佢話驚天氣轉涼, 多件衫旁旁身, 之後又驚我東亞有戶口, 提我去拿錢(雖然只係流言), 但我真係覺得好開心, 有個男仔咁關心自己, 唔知點解自己會有少少戀愛感覺? 可能只係我錯覺啦, 因冇男仔對我咁好^^
希望之後唔會有太多戀愛枝節啦...但我唔係下定決心唔再談戀愛嗎?
又係返學日, 呢堂係英文, 真係好希望係上次個阿sir教返, 可惜呢次係個miss教呢, 佢都好後生, 應該係比我大少少, 我覺得佢都有少少串啦, 而且講英文都講得幾快, 我差d跟唔到啊=.="我d英文真係退步左 咁多嗎?
仲有今日竟然記錯左返學時間, 以為返六點半, 所以六點二十已經返到學校, 但又見到只有好少同學返學, miss又未黎, 諗諗下又唔對路, 點解夠鐘上堂都冇人呢? 後來先諗起七點返學, 唔怪之得啦, 我又開始覺得肚餓, 早知就買野食, 仲可以係學校度食埋野啦><結果我只好係課室呆呆地等, 聽到波特及阿聯又講相機, 自己又冇興趣, 惟有伏係張枱度訓下覺.
中途休息時, 素素琪突然係個袋內拿左d物品食黎, 原來佢之前去過台灣, 買返d手信比我地牙, 係我至愛既魚條及唔鍾意既鐵蛋? 做咩鍾意同唔鍾意既野都係埋一齊架? 不過唔緊要啦, 有得食就好^^除此之外, 仲有佢買左d書籤比我地班部分女仔, 阿ling, 文迪, berry及我都毎人有一張, 多謝你牙~我好鍾意張書籤, 仲望足成堂~
個女仔個樣好似我, 又係見到靚仔姣姣的, 再加埋見到鍾意既野, 我一定會發顛, 好似佢攬住隻狗仔一樣^^
放左學之後, 我地成班同學如常坐埋同一班車, 今日有好多人坐車, 好在都仲有少少位, 我比蕃薯早上車, 只有最前及最後排既位, 佢叫我坐最後排, 同我一齊坐. 在車上講起生日會既事, 佢問我帶住個假髮熱唔熱, 而且仲話話我星期日果日都幾好睇, 我竟然覺得好開心及有點怕羞, 家陣怕咩羞? 可能係比人讚覺得開心吧!? 仲同我講話佢係生日會, 甚至係全日都冇食過野, 咁咪同我一樣!?我都係果日冇咩點食野, 而且連著件衫都差唔多, 又係摺起半隻袖的恤衫. 我地事前都冇夾過, 點會咁岩架!!?不過你讚我都要同你講聲多謝, 仲有素素琪份手信, 真係多謝哂你地^^
呢日蕃薯一定好開心, 因有好多人同佢慶祝生日, 有成二十幾個同佢慶祝. 佢因為有八個朋友唔去佢生日會而唔開心, 都唔緊要啦, 有好多人同你慶祝, 已經比其他人好啦^^仲有呢, 我會著得靚d同你慶祝架, 唔好唔開心啦^^
自己影相係咁差啦, 加上我間房立立亂....我真係個女仔黎嗎?
我提早左兩個鐘出門口, 想去買返頂好睇d的帽, 點知最後唔係買帽, 而係買左個袋. 之後再和同學仔及蕃薯, 同埋蕃薯d朋友會合. 蕃薯其中個朋友幾無禮貌, 明知我帶住個假髮, 竟然直接問我果個係咪假髮, 唔知佢有心定冇心啦, 但都唔應該直接問人麻, 真係一點也唔識尊重人, 我也好討厭呢d無禮貌既人, 可能佢係妒忌我扮得又靚又潮吧!? 女人的妒忌心真可怕(講笑)所以我一直都再冇同佢傾計話!
最經辛苦(吓!? 你有辛苦過嗎?), 蕃薯d朋友已經霸左個角落啦, 我哋只可去近toliet那邊, 不過果邊可以上網, 唔緊要啦^^
我哋全班同學玩得好開心呢~
點會變左相機同盟既? 呢個係我哋既角落><
阿聯幫我影既獨照, 竟然影到頭先果個冇禮貌既女仔(怒)!! 啡色個袋係我頭先買既^^
唔知點解我今日無胃口, 唔係太想食野, 我只拿左一次食物之後都冇再拿過...好在阿光佢地有拿多D返黎比大家share, 仲有文迪個酥皮燉奶, 好正~
阿光比心機一砌既小食, 其實佢冇預埋我, 我就拿左佢一塊哈哈笑薯塊^^
睇黎蕃薯呢位人兄幾受歡迎, 好多人都搵佢影相, 而佢都忙住應付d朋友, 自己連食野既時間都冇, 真係可憐呢...
我連佢d朋友咩名都唔知, 只知短髮果個成日痴住蕃薯影相及玩, 又叫蕃薯同佢合唱(本人覺得佢唱得好難聽), 甚至仲叫蕃薯抱起佢. 唔知點解我會有d怒及唔開心!?
呢張相本來係班唉牙同學想只有我同蕃薯坐係前面, 我哋兩個多番捱讓後, 蕃薯果兩個fd坐埋一齊影相先願意影呢張相. 係同其他女仔就答哂博頭, 對我就咁樣, 我好失禮你咩? 我都想有個靚仔係我旁邊同我影!!
哈哈~你都幾貪心, 一次過切哂兩件餅=.="
大家開開心心, 乾杯~~
玩到十一點幾, 同學仔都開始走人囉, 本來想等埋蕃薯, 但佢又要同人飲酒, 蕃薯叫我早d返去, 仲話到左屋企send 短訊比佢, 仲有佢係我前面同後面答住我博頭同我講多謝黎佢既生日會, 又唔見佢答其他同學既?佢地都有黎啦....最後同阿駿及阿光離開, 我自己一個仕坐小巴返屋企...
終於返學啦, 我自己其實有D緊張, 因除左蕃薯之外, 其他人都未見過我個新look, 尤其係自己個短髮樣, 唔知會唔會比人笑呢? 返到學校果然比同學笑下, 佢哋話我似web tech個老師rosita!? 可能係同佢一樣有個短捲髮掛!? 結果我比全部同學笑足我全程, 由返學至放學, 甚至食飯都係
今日教既係computer graphic, 阿sir都有d幽默感, 大約教左我地什麼係電腦繪圖, 3D 及2D的分別, 仲會透露會教maya, 自己真係好想學, 下個星期我要同朋友去camp, 冇得上堂添! 好在只係上lecture, 但自己對呢科真係好有興趣, 唔想miss任何一堂, 但之前應承左人, 冇辦法啦....
上完堂之後, 大部分同學分別有文迪, 蕃薯, 阿聯, 波特, 阿駿, 阿光及我七人先去深水步買書. 講到呢度首先要多謝文迪, 佢為左陪我, 竟然推左佢朋友的約, 要佢同我一齊悶, 但也因為佢, 我全程先唔會悶. 蕃薯真係靠害, 明知我唔like相機, 仲要我同佢地一齊食飯, 想悶死我咩!!??講返去深水步先, 最後咩都買唔到, 只係葵芳地鐵站比蕃薯影左我一張相
估唔到是但比佢影張相都幾ok, 好似有種茫茫人海之中找到你的感覺, 找我既人當然唔係蕃薯, 而係我既真命天子吧?
去完深水步之後, 再去旺角同阿聯買相機, 尤其係我同文迪都已經覺得好悶, 到最後阿聯終於買到機, 佢地選左好耐, 又成日試機, 都試左好耐呢, 好在阿聯最後都買左部相機^^
枱面有部新相機, 係買呢部嗎?
買完相機後, 阿光及阿聯先走. 我哋終於可以去食飯啦~其實我哋食飯既地方只有一個, 咪又係沙爹王. 或者真係要改一改個名, 應該叫[白咖哩王], 因我哋成日都去果度食白咖哩.....我哋一叫完野食, 佢地三個男仔又玩相機=.="我哋都見無聊, 就周圍影下相
餐廳外的街景~
佢地係度玩相機, 波特影佢地影佢地兩個, 我又影佢地三個~
文迪, 蕃薯及阿聯叫既食品~全部都係白咖哩飯!?
我既白咖哩雞排米線, 好味><
食完飯之後佢地又睇相機, 我同文迪都等到悶悶地, 於是我哋兩個趁佢地睇緊野時走左, 以前就話係佢女友, 同佢一齊去睇相機, 買相機, 一直等佢睇完為止, 但而家我同佢咩關係都冇, 極其量只係好d的朋友, 我已經唔使再陪佢, 自己覺得悶, 鍾意走咪走. 文迪佢幫左我好大忙, 令我下定決心離開佢, 唔好再返轉頭, 不但係唔同佢睇相機, 連感情都一樣, 唔好再返轉頭!! 波特打電話比文迪, 文迪等我地一齊入閘之後先聽波特電話, 令我唔可以返轉頭搵蕃薯. 後來上左車, 先知道蕃薯佢都有打電話比我, 我因不辭而別而同佢講sorry, 佢話做咩走都唔話佢知. 呢個只係小事, 第時我會真係離開佢, 讀第二個course啦, 文迪其實做得對, 而家習慣分開, 都好過第時分開, 唔使再因為唔捨得佢而傷心難過
唔知係咪黎緊個秋冬興格仔呢?我早係兩個星期之前已經入左d一件粉紅色及一件綠色格仔衫,但自己都好似仲未夠,仲想買多d格仔,但自己邊穿得哂咁多格仔衫,但自己都控制唔到,不斷上網搵.搵左好相,自己都好想要呢d衫,但自己又唔見有得買既?
呢件我真係幾like, 唔太多格仔都好靚^^
我都好想要一條格仔裙~本來有一條黑色, 但只係直身, 唔係百摺. 幾年前興既野而家又興返!
條頸巾既簡單又型, 係我至愛物之一, 如果覺得格仔裙有d裝可愛, 唔想穿, 用頸巾都幾好架!
我一直都幾想要既格仔袋, 但似乎未見到有得買, 傷心><
聽日終於返學, 呢個幾月既假期也會結束!! 放假都放到悶哂, 有得返學都唔錯既, 好耐都冇見過所有同學, 包括埋佢在內啦. 一於著返件格仔衫先~
我突然覺得自己琴日好白痴,話咩要寫自己對佢的感覺,自己可唔可以忘記佢,同佢冇任何關係等等. 今日突然驀然回首,覺得自己唔應該再為佢傷心難過,或者話唔會再為佢做任何野.但話哂自己真正愛過,又點會一下子唔記得,又點會唔悲痛? 愛情只係人生的其中一部分,又點可以只係執著呢方面? 仲有好多既人我要珍惜,好多既野要去做,就算自己冇愛情,又或者愛情經驗少,都唔係咩大不了既事,都係寧缺勿濫既好. 好多人認為個女仔冇拍拖,一定係佢唔靚女,身材唔好,唔識打扮,所以先唔會有男仔鍾意.我唔認同呢個講法,實在太表面,如果個男人只係鍾意我外在,我寧願唔要.我覺得只係個女仔係佢人生路上仲未遇到對象,外表固然重要,但如只有外表,個人性格係極度差,難以相處,令人討厭,又有咩用呢?
至於寧缺勿濫,我覺得即使拍拖拍得多,有好多愛情經驗,理應係比其他未拍拖既人優勝,係同愛人相處方面應該會比較成熟,但點解最後都分手收場,係茫茫人海之中仍然找尋情人呢?如果一個人毎次拍拖之後,都知道自己缺點所在,之後好好檢討及改善,可改善之後拍拖時同情人的關係.但講就易,自己本身又點知呢? 除非個前情人親口同自己講,但分手時都失去理性啦,咩都聽唔入耳,惟有要個人事後冷靜及檢討先得.個前情人同自己講都好d,有d因為第三者,愛上或鍾意另一位,個前情人就咁走左去,咩野都冇留底,咩都冇講,自己只好恨個第三者,女既話佢係狐狸精,男既話佢撬牆腳,但其實係咪出自個人本身,係因佢自己問題而被第三者承虛而入呢?....我覺得愛情實在太麻煩,短短呢兩段又講唔到d咩,加上自己又被一段感情深深傷害過,令到自己萬念俱灰,覺得自己一直愛佢,但佢又唔愛自己先會有想離開,忘記佢呢個想法.與其話離開,不如話自己應該搵個自療既方法啦,令我有呢個想法的係一個心理治療師素黑的文章:
大部份人都不知道自療的驚人效應。
大部份人都忘記了自愛才是最大的能量。
找到自我改善的命門，才是最實在，最成功的人。
原來，每個人都有自療的能力，只要妳你掌握自己，抓緊身心命格的正確方向，自己也可以治療自己，成為自己的主人。
找我治療的客人和讀者，來自香港、中國大陸、台灣、馬來西亞，還有美加和澳洲等地的自困女男。
治療不是我的事業，是我體味和學習尊重生命的門檻。我一頭探進去，和迷失的人一起尋找通往愛的一道光。
治療原是自我修行。尋求治療，也是修行的一步。我給妳你的，是靈性的啟導(spiritual enlightenment)，和專業的整全治療(holistic healing)。我，只是一個願意聆聽和陪走一段的路人。治療只停留在借助他力改變自己或命運的話，最終不是徹底的，永劫回歸夠妳你受幾世。
妳你認同這種自療的態度的話，我會見妳你，和妳你走一段。
但我自己又冇咩錢去睇佢, 自己一直細味及了解佢文章,明白當中的意義,希望可改變自己既諗法,性格及增強自己的內心修養,令到自己思想,語言,行為更成熟,去迎接另一名真心愛我,待我好及真正比到我精神上需要的男子,我相信呢名男仔無論係外表,性格,思想及財政上!?都蕃薯更加好~
大家唔知有冇睇到溏心風暴2的家好月圓呢?其中一部份講到鐘家欣演既角色于素秋佢愛上bosco, 後來bosco結婚,佢自己仍然愛住bosco,好難忘記佢,於是林峰演既角色管家仔叫于素秋毎日寫個病歷報告比佢,講于素秋的心事及感受.
我好鍾意佢呢部分劇情.係現實中,我雖然話蕃薯做我好友而未能做情侶,覺得冇所謂,但我其實自己仲好想同佢一齊,當知道冇得同佢一齊時,我個心真係覺得好難過, 好想忘記蕃薯,於是我都學于素秋咁,把自己唔開心既事寫底,仲比埋自己分數,惟一和劇情唔同既係,我冇一個好似管家仔咁好既男人係我身邊一直支持我...不過唔緊要,我仲有對我好既家人,朋友及同事,無論發生咩事,佢地都會支持我,呢段痛苦時間一定可以好快就過去^^
今日仍舊同佢sms,當然只有我hi佢,佢左冇耐就要做野.其實自己已經叻左,以前佢唔同我傾,我會狂同佢傾計,而家已經冇啦,佢唔同我傾都唔緊要,我要努力工作.不過最衰自己係msn見佢上網時,自己又主動搵佢傾計,我係想忘記佢麻,仲同佢傾計做咩呢?所以呢度扣左好多分數,所以都係比自己40分啦, 剛好及格
今日我做左樣好蠢既事, 我特登走問佢我哋係咩關係, 佢話至討厭人地問佢呢d事. 於是我同佢講出自己的內心感覺, 什麼[之前我真係太依賴你, 成日痴住你, 可能係同一組的關係吧. 同你一齊合作都幾開心, 我見你同波特都合作得幾好, 不過你地英文真係要加油囉!], [我同你講真話, 係因為我覺得好友不需要隱瞞. 我覺得最近大家都坦白左, 開始明白對方, 係我最開心既事^^], 係真架, 佢比我起初認識佢果陣, 真係對我坦白好多, 開始知道大家既事, 只係我成日胡思亂想, 先會令大家唔開心.
最後佢突然同我講出我哋既關係 : 我同你而家係比朋友要好好多的...你係一個對我好重要的人, 而且仲講左兩次. 其實我都覺得佢係我重要的人, 但又講唔出點解重要. 其實你一直對我好好, 係我自己真係唔知? 定假裝唔知呢? 你咁講會令我唔捨得走架><唔係情人, 做得到朋友應該開心先係, 但點解仲唔開心呢? 點都開心埋呢四個月, 唔好再發佢脾氣, 再胡思亂想話佢, 唔好比佢知道我就黎走黎呢件事, 就一直開心及珍惜埋呢段時間^^
至於自己理想方面, 我突然明白左愛情唔係人生之全部, 我自己會向理想進發, 人地話人生之中20-30歲係人生之黃金時期, 係呢段時間內博殺, 加上我e+ 公司有人訓練緊我做經理, 我一定會珍惜呢個機會^^, 其實老闆娘係我令我重新愛上會計及行政方面既事, 我想自己係呢方面發展, 自己唔可以再哂時間, 加上我想減少自己對同蕃薯唔可以做得成情人的傷痛, 想自己完全放開呢個想法, 我會先比自己一個悠長假期休息一下, 放鬆一下自己先. 係下年度既九月先再黎過~
我覺得呢個對我黎講, 已經係個比較好的結局吧? 但係咪真係決定左咁樣呢?好大機會係咁, 有冇咩變掛,自己真係唔知, 聽天由命吧!
今日可以話係驚喜一鑼鑼, 除左今日蕃薯約左波特及阿聯去佢屋企試鏡頭我冇得去而唔開心外, 不過好在全部都係好果隻. 首先係多謝個中秋, 我哋有多一日假, 又可以休息下.
第一個驚喜係有個叫mike一早hi我, 其實佢之前已經成日hi我啦, 我都冇咩理佢. 其實我又衰, 見到佢句msg打左[三十日...for u, 這首歌係送給你], 我以為佢有女友, 我咪唔理佢囉. 其實人地有冇女友關我鬼事咩, 於是我好奇問佢首歌係送比邊個, 佢即刻問我有冇聽過, 佢知道我有聽過之後好驚訝, 佢即刻問我有聽過佢唱, 我話只係聽原唱, 之後佢話呢首歌係送比我!? 吓!? 唔係掛, 繼蕃薯叫我聽果首紅地氈後, 我又聽側田d情歌!?都唔知係咪, 最後只好嘻嘻一笑置之, 聽下好了....
呢個係阿mike, 只係細我一年. 點解我認識的男仔唔係大我一年, 就係細我一年?
第二個驚喜呢, 就係蕃薯突然問我, 星期日去唔去唱k, 我起初以為係同學仔咪去, 點知我後來先知佢原來係同佢d朋友一齊慶祝, 係私人k party. 呢個時候, 我先知道自己中左招, 好在波特同阿聯都去, 唔係我會嚇死....同埋佢話私人party內好在有男有女, 而且女仔都唔係太靚, 咁都好d. 唔係d男仔把我同d女仔比較就唔好啦....不過呢, 係私人party就早d講麻! 真係牙(有點怒, 講笑)
中秋呢兩日多數同男仔傾多, 琴日同佢傾開計既n神都有係msn度同我傾計, 我哋傾左好耐下, 佢係個講得笑既人黎, 太好啦, 可惜佢細我太多, 佢細我四年呢..
佢就係新認識的anson, 同佢傾計都幾開心^^
仲有一個男仔, 琴日講過研究心理學既嘉輝, 今日同佢sms, 傾左好多心理學既野, 當我講到自己唔敢再拍拖及同男仔熟時, 佢突然叫我打電話比我, 佢話電話講會清楚d. 佢的確解開我好多心結, 同佢傾完電話之後輕鬆好多.
佢就係嘉輝, 佢同我一樣, 因比同一個深愛的人hurt過, 不過有樣野唔同, 就係佢發憤研究心理學, 咁我呢?
(三位先生對唔住, 未經你地同意po左張相係度><, 不過真係多謝你地, 即使我中秋冇得出街, 也可以同你傾計, 令我唔使咁悶)
仲有文迪都係, 平時好少同佢傾計, 今日同佢傾左好多, 來來去去都係同蕃薯d野, 又要你聽, 唔好意思><其實你哋兩個都係我的明燈, 聽完你哋兩個講, 我個心舒服左好多. 又變返以前開心, 唔會再為愛情煩惱的自己, 對上一次係買淋浴露, 本來都係開心, 但點解我又變返唔開心架? kumi shing, 你要keep住先得架>w<
我突然有個古怪構思, 就係剛認識呢三位男仔, 加埋呢個蕃薯, 剛係四男 + 一女, 於是諗起流星花園final內的組合, 佢地都叫做四個俊男, 咁我咪即係杉菜, 咁邊個係道明寺呢? 不過我都係講笑, 我邊有杉菜咁靚. 都係唔好想太多, 訓吧!