vad最後一堂 + 唱k

今日終於係vad最後一堂, 最後的一份功課係整一張自己的卡片, 素材唔限, 只係唔可以在網上搵畫及相做哂全張卡片, 背景就可以. 我即刻上網搵左好多相片整卡片, 但因阿sir話唔可以用太多相, 最後只係選取左一張. 背景預定用黑色, 配以白及灰色. 呢次真係一份設計的功課, 我越做越開心~

之後阿sir突然拿左四盆食物及汽水黎, 我都覺得奇怪, 仲以為拿錯左地方. 點知阿sir話最後一堂, 辦左個大食會比我地, 阿sir真係破費呢!! 不過有得邊食邊做設計, 真係好開心. 由於我以大食出名, 各個同學都笑我, 阿銘及阿光話食一件食物加一分, 叫我唔好食哂, 唔係會拿足一百分, 你地驚我滿分咪幫手食囉!咪住先, 講到我真係好鬼大食咁@@

分別有波羅腸仔串, 公司三文治. 豬排蕃條及雞翼, 全部係我至愛^^

期間波特佢地倒飲品, 話咩新人敬酒, 仲話我係主人家, 又玩咩牙? 仲叫蕃薯也係主人家去敬酒, 我都唔會同佢地顛, 最後我, 蕃薯, 波特及阿銘乾杯....而且食物真係好好味, 仲有冇牙? oh sorry, 講錯野添!! 我又要做返自己份功課, 我終於做好卡片, 但當我save時....部腦竟然hang機!? 我第一次save, 咩紀錄都冇!? 唔好玩我啦, 大部分同學仔都好熱心幫我, 只有少少同學話我, 尤其係galen, 句句入肉, 我甚至叫佢唔好嘈, 那時蕃薯佢突然幫我口, 叫人地唔好再話我, 多謝你^^惟有返屋企再做吧!

vad成績已經出左, 我毎幅畫有60-80分, 尤其係生果果幅, 更拿左80分!? 係冇人可以拿到的分數, 真係好開心, 真係完全估唔到....惟獨一份電腦功課拿左45分, 惟一份功課唔過六十分. 仲有我竟然欠一份功課未交, 加埋頭先張卡片, 有兩份功課未交, 真係想死!!

波特在放學前, 叫各同學唔好走住, 加上fred sir又黎左我地電腦室, 叫琴日未交作品的人交返比佢, 我地同埋vad個tommy sir一齊影張全班大合照, 終於齊人啦, 影相先~

d mon全部訓哂係度, 好得意牙!! 大家估下我係邊度?

放左學之後, 我地的活動仲未完, 就係去唱k!! 都有幾多同學仔去下, 分別有我, 文迪, berry, 蕃薯, 波特, 阿聯, 阿光及阿駿, 仲有一個蕃薯公司的女同事. 一聽到佢帶個女同事黎, 自己有點唔開心, 因佢從未帶過人黎玩.....

我地一行人去到荃灣地鐵站, 蕃薯要等埋個女同事, 遲d先黎. 我地全部人先去左我地的目的地 -英皇娛樂中心的neway先, 聽蕃薯個同事講話果度平d. 最後佢地終於黎到, 女同事叫做being, 我見到佢地玩得咁顛好唔開心, 自己心內有點酸, 當見到蕃薯佢對毎個女仔都係差唔好時, 自己已經唔想睇, 如佢所講, 係佢心目中的女仔朋友, 冇分話咩女友, 唉~!!自己又係苦戀一段....大家不停拿食物, 其間蕃薯比左個puff我試, 又真係幾好味, 叫佢去拿, 佢拿左好多返黎, 加上其他食物, 食到我好飽. 其他同學各自表現, 咩粵曲, 兒歌...全部搬哂出黎, 但又冇日文歌唱, 有點可惜....最後臨走時, 大家影返張合照先~

呢張暗左d添!! 冇計啦, 冇開閃燈...我只知道自己塊面真係肥左....

今日真係好開心, 除左見到佢個同事之外, 自己都偽唔好想太多吧! 同佢及其他同學過住開心的日子就得^^

優柔寡斷

話說忙左好耐的flash功課終於在今日present, 只要過埋呢日, 所有功課已經完成, 同時也係我離開蕃薯, 唔同佢一組的日子, 真係有點唔捨得. 但可以不用因為功課而煩, 毎日都唔知做咩, 可能係我根本唔認識用電腦吧!?呢件都算係件開心的事~

可惜撞正今日老闆娘bb的滿月酒, 我都好想去, 但今日又要返學. 如果唔係功課要演講的話, 我都唔會返學, 全日都心思思想去, 惟有就係睇下幾時在學校演講完就去.....返到學校, 好多同學未返, 阿sir叫我地拿返個storyboard先, 我地組呢份功課有成七十五分, 太開心呢!! 我心希望蕃薯可以快d返到學校, 等我哋立即present完就走, 但佢好遲d先返, 阿sir見冇人present, 已經等到唔耐煩, 不停叫人去演講. 於是我同蕃薯都出去演講先~

出到去我竟然唔知講咩, 全部都係由蕃薯去講, 大致上佢係強調自己係做動畫, 唔係mv, 因mv易整好多, 而且全部同學都做, 希望我地份高難度功課會高分點吧!? 佢仲要講埋d公仔係邊個配音, 我就係唔想比人知牙, 估唔到佢真係講左出黎, 可能係我自己覺得有點低能掛, 所以咪唔想佢講, 好在把聲唔似我. 播完段動畫之後, 各同學都忍唔住笑, 鬼叫我地個mv騎呢咩.....我地個動畫雖然畫功唔靚, 不過都已經做做好耐, 我同蕃薯毎人做一部分, 其實我同佢一直以黎合作都幾開心, 大家又冇吵架, 但我地有機會可以一直合作做功課嗎? 雖然係短暫, 但已經好開心.

演講時間只係去到九點, 而我又冇帶電話, 所以只好問蕃薯借, 我個同事mooji打左比我三次, 要用個電話真係唔好意思, 鬼叫我在最重要的日子冇帶咩!! 佢話滿月酒果度已經開始埋席, 叫我早d去到. 但我想睇下其他同學努力做的mv, 以及知自己在放假時冇得見蕃薯, 想見佢耐d, 本來自己都仲猶豫緊去唔去, 不過都係見同學要緊, 所以拒絕左去酒席, 寧願和同學, fred sir去平平地的上海菜館食飯, 大家有講有笑, 我仲叫左個麵加底, 真係好鬼多, 食到我飽哂, 下次都係唔叫!!我估應該會比去應酬其他自己不認識的客人更加開心吧!

買禮物與大食詩!?

話說聽日就係老闆娘個仔仔擺滿月酒, 同事candy及mooji已經買左嬰兒衫比佢, 只係欠我仲未買. 我又唔知邊度有得買, 於是又要再去tuen mun一次,不過今次唔係去佢屋企, 而係去市中心買衫做禮物. 對於從未買過嬰兒衫的我, 簡直係個終極難度....

去到市中心, 我周圍去搵賣嬰兒衫的店舖, 但行黎行去, 只係見到影音用品及時裝店舖. 想去問人, 唔知點解自己覺得好鬼核突. 行左好耐, 重覆去住相同的地方都仲搵唔到, 最後終於比我搵到, 好感動呀~首先去左chickeeduck, 見到好多童裝, 可能我唔鍾意d款太平實, 而且仲好貴, 不過呢個唔重要, 最重要係佢冇得用EPS!!??我呢個懶鬼唔太鍾意袋太多現金, 又唔鍾意碌卡, 所以咪用EPS, 所以店舖一冇就唔使考慮, 一定唔會去買!!

走到去隔離店舖, 見到有迪士尼的衫買, 有d走都幾好睇, 於是走入去睇下. 雖然自己對迪士尼冇咩好感, 但見到佢d衫個款都幾得意, 於是係果度選購禮物. 我自己唔太鍾意綿褲, 而且老闆娘平時又鍾意穿牛仔短裙, 如果bb又係穿仔褲幾襯呢~所以我最後買左一件tee及牛仔褲仔, 而且折左都仲要三百幾元, 好貴呀!!

好型仔的紅色tee及牛仔褲, 可以由六個月穿到一歲架!!

而且我今日仲好有食神, 有好多正野食!! 可能係大家知我大食, 特登買野我食掛!? 首先係老闆娘買左毎人一杯dessert, 老闆娘話知我大食, 得登買多杯比我, 結果我就有兩杯dessert啦, 分別係:

我至愛的tiramisu及芒果布甸, 但其實兩個都唔係太好食.....

返到屋企, 我妹又係東海堂買左藍莓芝士蛋糕, 呢次真係勁多野食~

呢個真係好食啦, 尤其係藍莓~不過兩塊白choco好難食!!

flash努力之日(下)!!

蕃薯為左做呢個動畫, 今日又請假在屋企做功課, 而我也要暫時呃住老闆娘, 話我屋企有事, 由四點起, 請左兩個鐘頭假. 其實我都唔想, 但蕃薯又要我點都要搵d時間出黎, 真係麻煩, 害到我又要扣錢!!我仲未過試用期的說....

放左工後, 我係公司附近坐巴士去蕃薯屋企. 由於我未坐過, 所以都唔知係邊度落車, 而且架車左兜右兜, 足足兜左成大半個鐘先去到, 我在架車上訓左覺, 好在最後都識得落車. 唔知我係咪成日去佢屋企做功課, 見到附近的地方就認得佢屋企條路, 行左冇耐就到.

去到佢屋企時, 拍極門都冇人應, 打電話比佢, 先知道佢落左去屋企樓下買錄音耳筒. 終於可以入佢屋企, 間屋只有我同佢兩個人, 唔係掛!? 我實楂都冇啦!!!抱住戰戰競競的心情去做功課, 因驚佢真係博我慒, 順帶一提, 佢果然係好咸濕的.....其實呢段時間已經差唔多做好, 大慨在flash上畫左公仔:

首先畫好個公仔先, 後面加背景及其他角色就得.

已經叫完成好個動畫, 只係欠左配音及插樂, 蕃薯在網上搵插樂, 我就度好故事對白. 之後我地配音. 蕃薯好利害, 配哂五個人把聲, 分別係企鵝幫果三個, 男主角及老闆, 佢不知配得幾開心, 尤其係男主角, 佢話個角色似佢, 當然啦, 其實果個角色係佢黎. 而我只係配一個角色, 就係個女主角, 我自問做戲唔叻, 只係配一個女主角已經要成日ng, 女主角要跑到喘氣, 我真係要係佢屋企不停地跑先得....我仲差點發脾氣, 好在最後都冇. 幾經辛苦下, 個動畫叫做初步完成, 大家有時間的話可以睇睇:
http://smartrust.org/dev/2DA/index.htm

flash努力之日(上)!!

上星期日畫好flash內的動畫草稿, 今日要開始正式勾線啦~可能有其他老友仔唔知係咩, 其實係電腦繪圖的第一個step, 把自己畫出黎的公仔(如電腦繪圖唔太熟的話, 會手畫原圖, 再scan去電腦), 再把公仔的線條勾在電腦上. 其實呢件事好簡單, 但對於電腦白痴的我係天大的難事, 蕃薯由頭教起, 由我起初一點也唔識勾, 直到成功勾一個公仔出黎, 都已經用左好多時間, 勾到一個公仔出黎, 我已經開心到飛起!!

之後仲要上色, 呢個要比較有心機去做, 我以為只要見到係咩公仔就上色, 其實唔係, 而係一層蓋一層去油, 即係先油左最底顏色, 之後一層層油上面. 舉例話普通的卡通人物, 佢頭髮咪有d光暗位, 當佢d頭髮係黃色, 首先要油左最底果層淺黃, 之後要用線勾出光暗位再油, 一層層加上去. 但我哋呢個動畫由於時間的關係, 只係普通油左色就得, 冇時間做其他, 於是.....都係比大家睇下我第一份作品吧, 好得核突....

嘻嘻~只係好基本油左顏色~而且度門有洞穴, 真係失敗....

聽日再要比蕃薯整係個flash度做段動畫, 唔知可唔可以幫到佢呢? 但其實係幫唔到佢, 因個公仔冇手腳, 又點可以郁呢? 呢個問題蕃薯一早已經發覺, 而且仲在msn度話我, 話咁樣點整個flash, 而且語氣也重左少少, 加上佢聽日又請左假去做, 可能佢太緊張個動畫吧!? 又有一種自己好冇用的感覺, 不但不能幫佢, 仲要佢幫我執手尾, 加重佢負擔.....都係聽日再努力過!!

交website之日

返學之前少有地在車上撞到阿光, 同佢一齊去seven, 惠康去買零食, 我哋買左唔係太多, 但都好過冇, 我買左兩個包, 一個包聽日做早餐^^

終於要交website功課, 呢份功課最後要向班上所有人演講, 大約講解自己的作品的內容及做網頁技巧!? 死啦, 呢個網頁我冇咩點整過, 搵咩同miss講牙? 未到我演講時, 我不停地驚, 如果問到我, 我咩都唔識, 會唔會全份功課冇分架? 我一直希望呢堂快d渡過....

見到同學好多作品, 覺得佢哋任何一個人都好叻, 起碼個網頁全部係自己做, 如只有我自己一個人做, 又可以做什麼出黎呢? 一定唔知自己做咩出黎囉, 或者係全班最差的一個吧! 好多同學的作品好出色, 波特及阿銘的管絃樂, 有好多音樂家的知識及樂器介紹, 佢地的演講好得意及好笑; 仲有好多同學仔都係整樂器, berry啦, 文迪啦, 好多樂器網頁~~另外仲有遊戲的網頁, 係最受歡迎的MHP2, 內有好多秘技, 雖然我冇玩, 但已經覺得好吸引; susuki個choco網頁都好正, 仲教大家食choco, 對於我呢個choco迷黎講, 簡直係正!!

終於到我及蕃薯演講, 我哋一早分工合作好, 我負責講解網頁內容, 蕃薯負責講解做網頁方式, 講左約五分鐘到便完結, 講完之後, 蕃薯問miss有冇問題, miss竟然話冇問題. 吓!? 係咪即係過左關啦? 竟然冇問我個網頁點做? 好野!! 我開開心心地回到自己座位上玩我的[fd for sale]及同tracy畫畫. 睇黎tracy真係鍾意左畫畫, 我同佢毎個web tech堂都係上art, 真係好開心呢~

總算叫完成左一份功課, 我從來唔會去計較自己成績, 可能係呢科唔係自己擅長的科目吧!? 相對黎講, 蕃薯睇得會比較重d, 因呢個網頁係佢心血, 而且仲話有機會真係會用.....不過放心啦, 呢個係你擅長項目, 而且你比我睇你個網頁都幾好, 我相信結果一定唔會令你失望. 而我呢, 只要呢科合格就可以, 自己唔敢強求太多.

仲有另一份flash功課, 聽日要比心機! 呢句不但對蕃薯講, 其他同學都係. 時間唔係太多, 大家要一齊努力!!

網頁最後衝刺, flash要加油~

聽日就交網頁比web tech個miss, 不過都唔使驚啦, 有蕃薯呢位電腦人, 應該冇咩問題, 只係欠一個報告未寫. 但要測試個網頁運作, 加埋要開始做個flash的草稿呢, 一點都未做過, 所以要去佢屋企做功課

一早去到佢屋企, 我就要開工做報告, 包括網頁內容介紹, 網頁的layout及site map(即係指網頁的內容點樣連繫之類), 好在內容唔太多, 做左大約一個鐘已經做完. 我發覺自己唔識畫個site map, 好在蕃薯幫我研究, 由佢完成呢部分. 我網頁又幫唔到手, 連報告也要麻煩佢, 覺得自己好冇用....

最後終於完成左. 我地作品以黑色為主, 配以灰色. 以一個香港的攝影組織做個網頁, 毎頁下面就係網頁的內容, 包括網頁介紹, 所提供之服務, 作品及聯絡方式. 全個網頁都係由蕃薯先生整, 而我呢...咪幫佢搵網頁的內容, 由於全部都係中文, 所以要全部translate做英文, 同埋做少少網頁設計的工作. 我又未做過網頁, d資料勁難搵, 加上蕃薯又成日催我, 要我快d比內容佢打, 我真係有想過放棄, 覺得好辛苦. 當我搵到所有內容, 自己都好開心!!不如比個網頁大家睇下先~

http://smartrust.org/dev/WebTech/AboutUs.htm

我又唔記得買困邊筆, 用黎畫畫, 再把畫scan在電腦上勾線, 於是點都要落去佢屋企樓下買, 但結果都買唔到, 只買左困邊筆......順便幫佢媽媽還碟, 我差點迷路, 好在最後都可完成任務, 仲買埋麥當當去食. 食完之後即刻開工. 畫左及scan上去部腦度唔係太多, 但都比住大家睇下先~

弊啦! 仲欠好多幅未畫, 睇黎後日仲要努力, 後日又要去蕃薯屋企, 佢又請左日假, 我都考慮緊請唔請假同佢做功課....不過做完其中一份難頂功課, 真係可喜可賀!! 期待聽日交功課及present的日子^^

仲有文迪及蔡蔡就好啦, 可以一齊去平州半日, 最衰我要同隻蕃薯做功課啦, 唔係我一定去囉, 自從上次同liz 佢地去食飯之後, 一直都冇見你啦! 希望下次同liz佢地個月會再可以見到你! 仲有在文迪個blog度拿左你地一張相, 唔好介意~

又坐在海邊傾心事嗎? 好耐都冇同你地傾過....

愛情分叉口...

又係迷上玩fb買賣朋友的日子, 也因為呢個遊戲, 令我認識唔少男仔, 其中一個就係追我的阿基, 佢毎日都同我講[我愛你], 又或者問我鍾唔鍾意佢?]之類的說話. 出乎意料地, 我又唔係太討厭, 因終於可試到有人追果種感覺; 但也唔係鍾意, 可能係自己怕開始戀愛, 驚自己又再受傷, 所以對愛情真係冇哂感覺....

我有向佢提及過有時在蕃薯屋企做功課, 比佢攬及錫的動作. 阿基成日話佢咩大色狼, 淫虫之類呢類難聽的說話, 仲話我係佢女友(!?), 驚我蝕底比蕃薯, 不停叫我小心, 估唔到有人咁擔心我, 原來比人重視果種感覺好好. 但我竟然幫蕃薯講好說話, 而且仲叫阿基唔好話佢及指出佢優點. 阿基話我一直維護佢, 係咪愛上左蕃薯? 我竟然唔知道答案, 自己一直在思考, 我唔想傷害呢個男仔, 我知佢係個好人, 當佢以為我鍾意蕃薯時, 佢好唔開心, 我話自己唔敢再戀愛...唔係....其實自己想搵一個男仔真正愛我及對我專一, 阿基話自己係. 我都希望係, 如果我一早認識你及同你拍拖, 係咪會比較開心呢? 我好享受比佢重視的感覺, 好似女友一樣, 佢又比到我嗎? 我真係想放底蕃薯呢個包袱, 嘗試接受阿基, 重新開始戀愛!而且當佢問我會選擇蕃薯定佢時, 我竟然會猶豫, 照常理應該選擇阿基, 因佢比到我一種我係佢女友的感覺, 但我做咩會猶豫?難道仲未放底嗎?

另一個男仔叫仲少, 佢毎晚都會同我傾計, 感覺上佢似我哥哥啦, 佢只大我三年. 但思想比較成熟, 我都有同佢講開感情問題, 如蕃薯成日預我食飯, 做出親密行為等等, 佢覺得蕃薯係追緊我. 我咩都唔想再想, 如果可以比我離開香港, 同好友出去世界唔同角落去見下世面, 或者會仲開心. 可惜只係夢想, 遙不可及...多謝你一直聽我講心事, 而且仲開解我, 呢個世界真係有好多好人. 呢個世界上唔止蕃薯一個男人, 我相信仲有好多好男人, 只係自己未遇上.

聽日蕃薯約我一點在佢屋企開始做埋個website及寫report, 佢點會咁早呀, 但都係早d訓吧!

同文迪食飯, 以及....

今日文迪去長沙灣廣場附近見工, 而我又在附近工作, 於是佢約左我十二點去食飯. 好開心呀~我都係第一次同文迪去食飯!! 我連飯都冇帶, 即使平時唔捨得出街食飯(自己好寒酸...)的我也要同佢食. 由於我公司最近冇野做, 又唔可以玩msn, 老闆又唔係公司, 我只可玩facebook上的買賣朋友, 所以遲左少少去搵佢, 我因為玩收買朋友, 對唔住呀~文迪!!

佢等左我應該好耐吧? 後來我先知佢只見左三個字工, 唔知佢見成點? 我又冇問佢, 但佢話份工自己又唔太鍾意, 我冇記錯的話, 應該係marketing assistant!? 佢一心想做marketing呢~希望佢可以搵到自己真正想做的工^^

琴日天氣好熱, 後來聽電台講話成30度, 真係熱鬼死人啦, 文迪見工仲穿長袖shirt及長褲, 一定好熱呢...我哋去左一間食飯好平的餐廳仔食飯, 途中我哋談及理想及工作, 原來我哋係唔太鍾意而家份工, 但我地自己有學歷, 而且又要顧及家人財政, 不得不做份正職. 但我哋個心根本唔係份工度, 我哋想實現自己的理想, 可能就係夢想與現實的距離. 究竟我哋如何選擇? 我哋都唔知, 只知應該要讀好呢個課程先, 因呢個或許係改變我哋命運的其中一個途徑, 尤其係我, 我要恐補一下電腦科先得!!我似乎搵個自己目標, 係個插畫師....嗯, 惟有努力吧!而我也相信文迪可以實現到自己理想, 你都要努力呀, 希望可見到大家都可實現自己夢想的一日^^

可惜只有一個鐘食飯, 唔係再可以一直傾, 好耐都冇咁樣傾過計, 如果我可以放半日假就好, 但自己未過probat, 都係算啦, 之後大把機會傾啦, 仲要同berry, candy傾~下個星期係最難捱的時間, 我及文迪你, 仲有大家同學都要努力!!

返到公司, 再玩收買朋友, 有好多人, 尤其係男仔, 紛紛加入收購我寵物, 令我由現金二萬元升到成九萬幾, 一日時間earn左七萬幾, 簡直係奇蹟!! 首先我要多謝一個叫jim jim jim的人買我及我d pets, 之後仲有幾個男仔同我爭, 有幾隻幾百元的pets由幾百元升到成萬元, 我哋果然都係無聊之人, 玩呢隻遊戲好似睇住股市一樣, 簡直瘋了....但瘋得黎又幾好玩, 就係要大家互搶先至好玩, 也係呢隻遊戲的精神!

玩完收買朋友就返學(天啊, 係咪返工架!?), 返學時同tracy坐, 我哋一齊畫畫, 直至阿sir話派卷, 好在我都有63分, 即係上星期六用a4貓紙果份卷, 我都係測驗果日即日抄都有呢個分數, ok啦! 我同蕃薯, 文迪及tracy都係60幾分, 太好了! 但最高分的係75分(汗), 平均分係59.5. 睇黎大家應該滿意吧?

本來我同tracy坐, 我附近已經冇位, 蕃薯已經返到學校, 我見到佢不停望我, 我感覺到佢想同我坐, 於是我又走去同佢坐. 而放學後佢洗完面, 應該係特登黎搵我, 問我借紙巾, 由於我moblie張sim卡壞左, 冇電話用, 所以佢打唔到電話比我, 都知佢近排見唔到我會打電話比我問我係邊....估唔到我哋竟然可遇到, 究竟係巧合定佢故意呢? 文迪叫佢用衫抺面, 佢竟然話抺在我件衫度, 仲話同我熟!?我想避佢, 佢又痴住我, 睇黎我都係要同佢一齊, 難道果個占卜係真的嗎...???

好在我部電話只係sim卡壞左, 唔使買過部, 真係勁好彩!! 我把呢個消息話比文迪及蕃薯知, 佢地都鄧我開心, 尤其係蕃薯, 佢仲打電話比我傾計, 佢剛同四個朋友食完飯, 在銅鑼灣坐巴士返屋企中!我哋傾左半個鐘到掛!? 我又要應付我的msn, 當中咪講過有個男仔叫阿基, 佢在收買朋友中昆左我八萬幾元買隻pet, 我嬲到佢死!!即刻delete佢(我仲係細佬仔嗎?), 之後佢在facebook及msn問我點解咁做, 佢話自己好心傷, 仲講[i love u]及send個飛吻比我, 睇黎我要處理左呢件野~

異性緣, 忘不了....

呢樣野我自問都唔會太多, 而且我覺得就算有又點, 我哋始終冇可能發展. 由於我在旺角工作, 而且果陣我又唔會上網認識朋友, 所以果陣我係冇咩男仔朋友. 但自從玩左個買賣朋友之後, 尤其係玩買賣朋友, 加左好多唔認識的人, 就開始有男仔同我傾計及拿埋我email, 在msn上傾計, 而且仲有男仔想約我食飯, 甚至約會!? 我先知道自己原來都幾受男仔歡迎, 自己真係意想唔到....

但我真正想要的係甚麼? 而家我終於發覺, 我想要的係一個真心愛我, 對我好及願意照顧我的男人, 佢唔一定要靚仔, 但當然也唔好太樣衰, 唔係自己都接受唔到佢個樣就唔好=.="至重要睇的係性格, 佢一定要成熟, 但有時又可以開得玩笑, 工作時佢會好嚴叔; 有愛心, 細心及可照顧人感受. 好似講到係某個人咁(大家估下係邊個)

時間係重要, 在facebook上有個女仔講的說話好好: [在錯的時間遇上對的人是一場心傷, 在對的時候遇上錯的人是一種嘆息, 在對的時間遇上錯的人是一種幸福], 究竟大家係屬於邊一種? 我當然希望大家係可以幸福, 但世事始終不盡人意, 怎會令毎人都開心? 找到另一半, 而家同男友或女友sweet固然好, 希望佢哋可互相珍惜對方, 或許那人未必係你結婚對象, 當然最後大家可在一起. 但沒有伴侶的也不用傷心, 可能你現有的可使你幸福, 包括永遠身邊支持你的家人; 對你關懷備志, 不離不棄的真正好友; 又或者關心你的同事及其他朋友. 又或者係自己事業, 一直想實現的理想.....我覺得一個人無論幾可憐都好, 總會找到佢覺得幸福的地方, 唔知大家已經找到未呢?

但我面對蕃薯時, 我都以為自己可以同佢好幸福, 直至分手, 我本來以為可以真正放底佢, 可以接受facebook上的男仔, 而家都有人追緊我, 成日無端端在msn上送個飛吻及花比我, 但我心內只掛住佢, 接受唔到第二個, 我也唔想傷害任何一個男仔, 唔想佢感受到自己喜歡的人個心不在佢的感覺, 在愛情上, 我已經覺得好累, 只想找個安息之所.

明明我同蕃薯已經分開, 點解個天又要比我哋在埋一齊傾功課, 人哋話異性對得多, 會日久生情, 我自己本來唔多信, 但佢最近好似對我好左好多, 甚至連夜晚食飯都預埋我, 而且我唔知點解佢最近多左打電話比我, 甚至佢一唔見我, 就會即刻打電話問我係邊及去搵我, 佢之前唔會咁, 咁即係意味住咩?我也唔想去估, 只求平靜生活, 可以忘記佢, 但我做唔到, 毎次唔見佢就會想起佢, 望住相機內同佢的合照, 而且一想到佢唔係同自己一齊好心痛....究竟自己發生咩事? 真係好難受.....

努力完成網頁功課!!

由於下星期一已經要交網頁, 而且下星期五又要交flash動畫, 大家應該好忙呢~鬼叫下星期係我哋最後一周返學咩, 所有功課最後先交. 蕃薯今日都請左假做好個網頁, 本來我都好想請, 但又未過probation, 驚扣人工, 所以只有佢一個人努力, sorry啊!

佢用sms問我網頁的英文內容打好未, 佢一直都催我, 而且又好似厭我作得少, 因佢成日都想要多d字. 其實我都好努力係yahoo度搜尋關於攝影公司網頁之內容, 加上自己從未做過, 所以又哂時間, 而且又寫得少囉! 眼見佢做左好多野, 自己連少少部分都做唔好, 自己覺得好冇用, 我估蕃薯下次都唔會再同我一組呢....經過大家捱左兩晚夜, 努力工作, 個網頁大致整好~

網頁的主頁畫面, 毎一個title也係咁樣, 只係下面的內容唔同...

毎頁的內容, 呢個係[home], 有個intro, 其他內容加入中~

搵資料搵到好悶, 而且我妹在屋企用緊電腦, 於是返左工廠度做, 除左可以見到媽媽外, 也可以見到姪仔, 佢真係好愛撤嬌, 冇人理佢就哭....我同佢玩就笑. 毎次見到佢太可愛, 我就忍唔住同佢影相~

阿b的全身照~

阿b的近鏡, 真係幾型仔, 哈哈~但我影相時有紅光照住佢, 應該冇問題吧!?

後來我同爸爸坐8:45村巴返屋企, 再努力完成份網頁功課, 幾經辛苦, 網頁的所有內容已經完成, 包括[about us], [waht's news], contact方式....其中news果度, 我用左個主意, 就係要人捐錢去指定慈善機構比四川地震災民, 拿埋收條, 就可免費為對新人影結婚及其他相, 如果係真就好呢, 應該可以幫到唔少忙^^

又係麻煩男仔!?

近排掛住玩fd for sale, 在facebook上胡亂加左d人, 都係為左拿邀請朋友玩呢個遊戲的費用, 點知也因此而令自己增加麻煩!!

第一個男仔叫阿基, 佢個樣就....基本facebook上好多男仔係樣衰, 而且佢同我一樣大. 我同佢都未真正見過面, 佢已經同我講好鍾意我, 又問我有冇鍾意的人或男友. 而且佢一見到我在msn度上網, 佢又送支花, 又送個心比我; 而且又打電話比我, 問我可唔可以同佢約會. 講真我都覺得幾嘔心, 我哋都未真正見過及了解對方, 佢就話鍾意我!? 搵鬼信咩! 自從同蕃薯好快開始及結束戀情後, 我唔會再輕易開始囉, 而且自己都冇心理準備, 自己已經唔想談戀愛呢, 於是我拒絕左個男仔的約會, 寧願自己一個係屋企打機!

另一個男仔叫crazy, 呢位人兄真係顛, 佢話自己係sell紋身, 連自己身上都好多紋身, 而且仲穿得好鬼騎呢....佢在毎個女仔的facebook上留埋呢段野: [My KUMI My KUMI......我好鬼掛住你My KUMIMy KUMI見到你個樣令我醉生夢死 我叫阿傑又叫做小李 我有毛有翼就識得飛,我企出黎rap你地就唔好理 我玩個碟仙佢話我39歲前死 我希望同你生活至少到22世紀 起碼比個機會我同你生活到我兩直至死 ,我生就係為住你. 唔該你,唔該你...........................................................................................................................................................李英傑 ], 我起初以為只有自己一個人有, 都幾開心的, 後來知佢原來比哂所有人, 就唔開心同覺得佢隨便囉. 佢在我工作時打過電話比我, 仲打左幾次, 但比我收左佢線, 直至放工時先同佢傾左幾句, 但傾得唔太耐

點解我總係會遇上麻煩男仔架? 請求上天唔好再耍我, 正經比個好男仔我吧!! 係一個真正愛及對我專一及疼惜我的男人, 我唔想成日遇上呢d爛桃花啦!!

鬼馬相及合照~

今日上web tech, miss只想我地班毎個人把自己做好的作品比佢睇住先, 大約要講自己作品內容, 個網頁我都冇份做, 只係負責作英文, 本來蕃薯同miss講佢自己網頁之內容及細節, 本來都冇事. 點知死人galen問miss, 點解會我的職責? 我同你有仇咩! 做咩突然咁講? 好在蕃薯即刻講返話我係呢個website上做咩, miss就同我哋兩個講話係毎個人計分, 唔係成組計, 馬上又令我緊張起黎.....

講解完自己網頁後, 蕃薯拿佢自己買左冇耐的手提電腦的webcam影相. 分別同我, 波特及阿聯影左d騎呢相...再加埋蕃薯後期加工, 都幾得意架, 比大家睇下先~

波特先生的又長又尖手指.....佢又用魔法變長嗎? 呵呵~

一隻手可整爆波特個頭....唔好呀>_<"

蕃薯(用電腦加工)個樣好得意, 自己好鍾意呢張, 加上佢成日話自己可愛, 呢張都算係啦, 哈哈~

其實蕃薯有叫我同佢合照, 最初我都唔願意, 但見佢哋影得咁開心, 我就同佢玩下啦~我唔會同佢哋一樣做埋d騎呢pose, 都係正常d好^^

呢張已經係佢...最正經的一張, 大家望住鏡頭, 好似影貼紙相^^

應該算係鬼馬的一張相吧!? 唔知我哋互指對方做咩呢?

估唔到用個webcam影相幾好玩! 好似人哋影貼紙相一樣, 不過有得在張相度加野仲正~真係幾鬼好玩, 整到自己有d想買佢呢部電腦. 當然唔係因為好玩先買, 而係慳錢及慳位, 鬼叫自己屋企問房位又冇, 錢又冇咩....都係再慢慢考慮下買desktop定notebook, 因為都用幾耐下!

戀愛習作!?

琴晚蕃薯話想一早整個網頁功課, 約左我兩點開始, 但佢又話部新notebook冇mouse, 結果同左我一齊落下佢屋企樓下買, 而我也覺得毎次去蕃薯屋企, 咩都冇買上去, 所以決定去美心執幾件西餅, 而蕃薯又懶到死, 自己又唔選擇鍾意的西餅, 叫我幫佢選擇....而且佢突然爆左一句話[今晚我地預埋你飯, 唔係都唔會煮咁多送], 佢仲講埋有咩送食. 吓!?唔知係咪自己賤骨頭, 唔習慣其他人對我好, 我同佢地已經打成一片嗎? 我問返蕃薯, 佢媽媽係唔係成日煮埋其他人飯, 因波特及銘佢哋去佢屋企時, 佢媽唔會煮飯比其他人食, 佢話都好少煮比其他人, 但問佢有幾多個人時, 佢又答唔出. 唔知點解心內有個答案, 希望佢媽媽只係煮比我食.....

去到佢屋企即刻開工做網頁功課, 佢比我用佢部電腦上網搵攝影網頁的資料, 又驚我悶, 比我msn, 點知係惡夢的開始....我一上網, 見到一個好耐冇同佢傾計的大陸男人, 佢話四川地震好可憐, 又講佢曾在四川讀過大學, 覺得果度d人好熱情, 但因女子冇知識而做色情行業, 估唔到而家又遇上地震, 真可憐....之後同佢講北京奧運, 佢成日希望我可以去北京同佢一齊睇, 我問佢點解, 佢話鍾意我, 同埋話可以黎香港的話, 一定會追我....吓!? 咪玩啦, 我一見到有人同我講鍾意我就緊張, 都係飲返杯水先!!

之後又有另一位在facebook上認識的男仔, 佢叫阿基, 同我一樣大, 佢突然又話追我!? 唔係掛! 我哋好似連外表, 聲音都未聽過, 又未正式見面....佢已經話我遲早會叫佢老公, 又話我哋會係埋一齊, 天啊! 今日咩事呀! 做咩一係就冇, 一係就兩個人追我, 不過我估係講笑吧!?

都係唔好理佢哋, 去做返功課吧! 我見到網上有bb相片, 好鬼得意, 我忍唔住叫左出黎, 我係傻瓜嗎?蕃薯突然講左句[你自己咪生返個囉]. 你又玩野啦, 先生!! 你都知我冇男友, 生咩鬼bb呀, 於是我抵死到講, 不如自己借種生仔啦, 點知個答案仲嚇人, 佢講笑話不如借佢黎生. 唉呀, 我今日真係顛啦~做咩個個人都神神化化, 講埋呢d野!!今日成日都講埋呢d愛情野(我指同其他人, 唔係蕃薯), 真係好想死!!

最開心係食左蕃薯媽炒的麵及米粉, 尤其個米粉, 好好味~

不過最後因蕃薯忙功課, 我叫佢唔好送我, 專心做好個功課, 呢次係第一次佢冇送我坐車, 好點失望及唔開心, 點解呢?

同姑姐及妹行街 + 同蕃薯買電腦!?

今日姑姐約左我去行街, 順便比報稅表及數我做, 所以好開心地一點就出到葵涌廣場行下街, 原來妹都同姑姐一齊, 總之我琴日放工就唔單獨行街啦!!我哋三人一齊去行街, 好耐冇試過, 太開心啦~最後大家都冇買到任何一件衫或鞋等等, 只係去左三樓買野食, 我同妹見到雪糕班戟即刻就買, 雖然係貴, 但好好食~

左: 我的芒果choco雪榚; 右:我妹的桃味士多啤梨雪榚~

食完當然仲未夠飽, 我哋再去食磨菇批, 本來想同埋佢哋一齊食, 點知已經夠鐘返學, 我連個撻都未食就要走, 其實除左返學外, 仲要幫蕃薯影印張a4貓紙. 因佢最近好忙, 平時星期六唔使返工的佢今日就要ot, 而且佢琴晚也好忙, 冇時間整張貓紙, 交比我去做啦, 放心!

途中見到雲妮, 佢原來又冇貓紙, 於是我同佢一齊去IVE的 library影印.....返到課室時, 我哋有位同學花輪買左呢d食物返黎.....我冇眼睇, 大家自己睇下估唔估到係咩~

我哋點會無端端帶埋呢d野返黎, 大吉利是咩!!其實只係m巾綿花糖, 膠布choco及dum 的糖....我同蕃薯都食左綿花糖及choco. 但我食綿花糖時, 覺得好似食緊m巾, 嘔....

果陣我見阿光及ryan係度, 花輪又返黎, 佢見我隔離有冇人坐, 我見果兩名先生係度, 我咪比佢坐囉, 之後蕃薯返黎, 佢突然講左句[做咩唔係同我一齊坐], 之後先同佢坐後面果行. 其實我哋唔係親密先一齊坐, 鬼同佢親密咩!!只係我測到flash的問題時, 唔認識可以睇下佢, 哈哈~而我又有抄到理論題目答案, 就咁樣, 我哋又兩個人完成呢份試卷^^

由於測驗的關係, 早左成個鐘放學, 我同文迪佢地去完toliet之後, 已經見唔到所有同學仔, 突然蕃薯打電話比我, 問我去左邊, 原來佢只係我後面冇幾遠, 估唔到又見到你呀!!?之後一齊如常坐, 本來呢日有月事, 身體唔舒服, 好想返屋企休息, 但返到屋企都只係聽到我個妹邊傾電話, 邊玩網上遊戲, 我就唔想返去, 但我又唔想用錢, 都唔知點算....於是蕃薯橋住我隻手, 叫我去同佢睇電腦, 因佢又身痕, 自己又想買notebook!!咪玩啦, 先生, 我係電腦白痴, 同你去都係冇用啦!!我哋先去新都會廣場睇, 佢係想碌卡買, 但因唔可以十八個月供款, 我哋就去左佢屋企附近買, 果度可以十八個月供款, 但佢又話要等今晚有人買走部350d先去買電腦. 佢係碌卡買, 關人哋現金買佢部350d有咩關係?

途中同佢行返屋企, 見到個景好靚, 好想影底佢. 但自己是但去影, 好在有呢位先生教路, 果然好靚!

我哋今日又冇做功課, 一日到晚只係同佢去買notebook, 真係唔知做咩! 最後佢真係買左部電腦, 而我呢...咪得個吉囉!都唔知點解我會同佢顛, 下次都係咪制!聽日又見到佢, 除左星期五冇見外, 而家毎日都見, 幾時先可以唔使見佢呢?

感動 + 老闆娘的bb~

其實呢件事發生在兩日前, 我聽左個文具推銷電話, 電話中人話之前有同事曾向佢買過文具, 而我又想幫公司慳錢, 於是我就問佢個toner的價錢, 當中佢又講到會比小冊子我哋, 混亂之中, 佢就以為我落訂買個toner, 話找數期可比到二至三個月我, 而我又誤會佢比小冊子我, 於是全部講[係..係], 之後就收左線. 之後電話中有另一個職員打電話比我, 係咪買左個toner, 我先知道不妙, 我當然否認啦, 點知個死人職員又話我取消order會令另一名員工冇左份工, 又話有電話錄音, 令我勁大聲在公司鬧佢, 老闆聽見後, 問我做咩事, 好在最後都冇比老闆話....但我會小心點處理電話訂文具一事.

其他同事知道呢件事之後都好支持我, 佢地話會親自幫我開門, 防止個人入黎; 我放工時, 老闆娘仲打電話比我, 叫我唔好驚, 因佢話之前成日接到呢類黑市文具店的電話, 仲講明果d人真係黎拿錢及恐嚇的話, 叫我打電話比佢, 佢就會帶兩個差人落黎....而且仲教左我好多說話技巧, 同埋因我在電話中講左係成小姐, 佢叫我唔好認就得. 本來我好驚, 聽完老闆娘講完後, 竟然唔再驚, 而且仲感受到溫暖, 係大家對我的關心和支持, 自己一定永遠記在心內. 多謝你哋!! 也好彩最後果d衰人都冇黎, 真係一天都光哂!

講返d開心野先, 就係老闆娘今日email左bb的相, 真係好得意, 見到都好感動~

佢訓覺好得意, 唔好嘈醒佢牙!

BB 望鏡頭啦, 至醒至型果個就係你, 我仲記得你叫黃軒轅!

軒轅洗白白先, 勁得意~

最近又見到軒轅外, 又見到自己絰仔及表姐的bb相, 真係好羨慕佢哋, 唔知自己幾時可為心愛的人生兒育女, 相夫教子呢?

還要加油呀!!

終於到左考英文oral的日子, 好緊張呀! 我都係返到學校, 見到同學練習時我先練, 可想然之自己平時幾懶....見到大家不停抄講稿, 開口密密唸, 自己開始緊張, 不過算啦, oral呢樣野都係順其自然好點. 直至阿sir叫毎位同學上去課室時, 大家先一齊上去. 但蕃薯仲未入課室, 我就等埋佢, 結果我就遲左入去. 但最後佢要在出面練習, 只有我一人入去, 都唔知等佢黎做咩!!

當我入上課時, 果陣tracy, 阿光及壞人係度present緊, 我又唔知道錄緊影, 自己行左過去, 結果咪...當然影左我啦, 三位好對唔住呀, 我下次會小心. 之後就到文迪果組present, 文迪佢講得好流暢, 令我有點壓力, 我驚自己講得好差...不過唔緊要. 最緊要做好自己!

最後終於到我哋果組, 見到波特, 阿銘及蕃薯講英文時, 比之前係屋企訓練時好左好多, 佢哋唔多窒, 而且淡定好多, 惟一美中不足的係我哋的說話內容唔夾powerpoint, 我哋揭到錯哂, 尤其係蕃薯單手插袋present, 好鬼死型呀~(我又係度講咩!?)到我講啦, 自己冷靜一下先!!出奇地, 我唔係太緊張, 即使自己冇咩練過, 但講得好淡定, 甚至連一點窒也冇, 都係多得張貓紙先;個答問環節方面, 青衣人問左個好深的問題, 我唔識解佢講果個英文生字, 但我最後都識答, 真係嚇到一額汗=.="

考完之後, 阿sir終於派返上次個report測驗, 阿sir話呢個唔係最後分數, 只係暫時....之前佢講的最高分原來唔係B+, 而係有個A-, 文迪果然拿B+果個, 其實早已經估到, 不過我真係估唔到自己可以拿B, 至於蕃薯佢肥佬左, 係咪我教得太差呢? 好對唔住呀....其他同學成績都唔錯, 合格的人多, 只有少數人唔合格, 總之大家加油吧!之後蕃薯貪得意問我哋果組頭先oral講成點, 阿sir大致上滿意, 讚佢哋講得ok, 而且仲話我講得幾好.唔係掛!? 我呢d都叫好嗎?

因呢堂係英文最後一堂, 我問阿sir可唔可以影相做紀念, 阿sir雖然話下年英文仲會見, 但未來發生咩事點會知? 都係趁呢個時刻影返張相先~

全體人大合照, 好開心呢~

不過我覺得我同蕃薯好似比阿銘及波特擺左上枱. 因琴晚大家臨離開時, 講好左要穿斯文去present, 因阿銘冇黑色西褲, 所以穿藍色衫及褲代替, 而波特就話出場時, 佢都穿藍色, 而我及蕃薯分別係第二及最後一個, 所以要我哋兩個穿黑色, 想梅花間足出場. 計我話跟本係藉口, 只係想我哋穿埋差唔多衫...

測完之後, 難得可輕鬆一下, 於是去左一間食米線的地方食晚飯. 大家睇起黎都好開心, 當然啦, 大家都辛苦哂, 休息下吧! 當中蕃薯掛住執上面果張團體相, 叫我幫佢叫食物, 當我係阿四咩? 最後好多同學都叫左肥牛米線, 真係勁正~

蕃薯執緊團體相, 我貪得意走去望下先~

蕃薯叫的肥牛米線加底~真係大碗左...少少only...

我哋普通人叫的份量, 都係牛肉米線, 可能同你的大食做對比, 哈哈~

最後找數時, 可能係蕃薯, 阿銘及波特想報答我同佢哋訓練英文及做report掛, 佢地多次話請我食飯, 但我一口拒絕. 不過最後都係比佢哋請我一餐, 咁我都唔客氣啦, 多謝哂^^

星期六仲有個2D graph的測驗, 雖然話可以抄哂所有資料去一張a4紙內, 但自己一點都冇溫過, 有點緊張呢....

毎個女仔都想比人影靚相, 我都唔例外!?

近排在facebook上認識左一個叫阿jack的男仔, 似乎佢對我都好似幾好, 今日唔知同佢講開咩野, 講話影相, 先知佢原來又係影相, 點解我認識的人都係攝影人黎架? 而且佢仲搵我做model, 在廢棄學校及樹林影相, 而且有機會穿下黑色的lolita, 總之越講越興奮....可能女仔始終都係鍾意比人影, 當知道有人影自己時, 真係好開心

不過回想起黎, 蕃薯自從攝影堂做堂課之後, 佢一直都冇影過我. 其實我一直好想比佢影靚相, 都係因佢, 我先至知自己影相, 可以係好靚, 而且可以比我感受下咩叫model. 但係....自從之前同佢拍拖後, 佢再冇幫我影相, 只係見佢同朋友影的相, 點解佢唔同我影? 而且又唔把我的相post在佢相簿內? 已經過左好耐, 可以唔再去想. 但佢最近又好鍾意影我平時果樣, 而且仲好似一直keep在相機, 又見住佢執佢偷影我的相; 而且佢最近在班上也成日咬我, 佢以前唔會架...我真係唔知佢的想法, 我覺得自己始終未能了解佢..

但阿jack就唔同, 我覺得佢係個比較老實及對我好好的人, 佢在facebook上幫我, 而且佢話搵的錢都係為左買我, 雖然只係一個遊戲, 但見到有人咁幫自己, 我好感動! 而且佢成日主動同我傾計及搵我食飯, 仲問定我邊日得閒, 可以搵埋我食飯及影相, 又有個男人對我好啦, 應該開心先係....但..我個心擺左在邊個人度呢?

結婚!? 都係練oral吧!

英文功課進行中. 今日約左波特, 阿銘及蕃薯, 共四個人一齊去蕃薯屋企傾功課. 報告已經打好左, 我哋呢次傾的係present, 我已經整好左講稿比佢哋.

但波特比老闆捉左去食飯, 阿銘及蕃薯已經係屋企等埋我, 不過我因未食飯, 所以先食飯. 期間唔知講開咩野, 突然講到結婚. 阿銘突然講話即使讀書都可以結婚, 但唔知點解我突然怕羞!? 我係度怕咩羞呀, 又唔係同在場任何一個結婚, 只好話我掛住供樓, 冇考慮過呢樣野. 而蕃薯媽突然講左句[你冇考慮過結婚? 及你屋企有冇兄弟, 我估係問我屋企的新家係咪比我)], 講到我好似係同某位仁兄結婚咁, 唔係掛!!??我已經冇再考慮結婚, 到目前我只有三個願望 -幫父母供完層樓, 拿兩個學位及買返間姑婆屋比自己. 至於戀愛及結婚, 離自己太遠啦, 自己從未想, 應該話唔敢去想, 費時又失望及唔開心多一次, 我只好一笑置之罷了

其後波特約十點終於黎到, oral訓練計畫開始~蕃薯及阿銘基本上冇咩問題, 只係有幾個字唔識讀, 問一問我, 睇黎佢哋兩個訓練得多, 應該問題不大; 我最擔心係波特, 佢英文比阿sir話差, 而且要我把全部英文讀一次比佢聽, 佢把毎個英文字讀音用中文寫起黎, 而且佢仲用電話幫我錄音, 令佢可跟住我讀. 大家不停地讀, 但我只係企埋一邊. 自己真係好慚愧, 佢哋都好勤力, 只有我一個懶洋洋, 咩都唔做, 我反而覺得佢哋仲叻, 仲勤力, 而家只好暫時希望自己在oral當日唔好出醜就好了...其實我都好緊張, 成日都話練, 不過到最後都係冇練之麻~

始終都係....

今日又要做份英文功課, 完成埋個講稿及個報告, 真係好唔想做!! 我最後都忍唔住, 打左個sms比文迪, 佢就即刻打電話比我, 問我做成點....佢見我太忙, 叫我影底作好的文章, 之後send比佢幫我打. 我真係好感動, 連唔係自己組的人都幫我手. 文迪, 下次我應承你, 一定會同你一組, 預祝我哋合作愉快~話之d男仔啦, 我唔想又再獨自一個人辛苦!!

同完文迪傾左冇耐, 蕃薯就打電話及send sms黎, 佢問我做成點, 仲提議不如一齊做....我之後話左比文迪聽, 佢叫我千萬唔好去, 因佢覺得蕃薯只係當我係攬攬錫錫的角色, 唔係真心愛我及唔會有好結果, 最後唔可以在埋一齊, 叫我唔應該去. 其實我都知佢當我最多只係親密朋友, 唔會當我係女友, 但我都想公私分明, 因我太辛苦, 難得佢哋果組有組員幫我分擔下, 而且文迪都未完成自己功課, 唔想阻住佢. 二來我同佢一齊, 起碼有咩錯誤地方可即刻改, 唔使用電話講咁煩, 所以我始終都係去佢屋企度做功課. 對唔住呀, 文迪>.<"

去到佢屋企, 我好彩地撞到佢阿媽, 佢拿住個袋, 正想出街. 吓!? 咪即係只有我同埋佢!!???我覺得自己一定有危險, 想立即返屋企, 但佢媽媽都開左門, 惟有入去吧....好在佢最後都冇對我做過d咩, 唔係, 我一定會對佢唔客氣!! 我哋各自分開工作, 直到佢阿媽返屋企也係分開坐!期間見到佢部新電腦, 佢真係買左佢一直想買的notebook, 仲要成八千幾元!? 雖然係中銀咭免息分期o者.. 呢位仁兄真係有錢, 好過我連一部電腦都冇...

部notebook個面, 都幾靚呀!! 不過易污糟, 都係唔太好....

其實部野都幾簿ga, 可惜佢太貴呢, 唔係我都可以考慮下...

當我爸打電話比我, 問我食唔食飯時, 蕃薯媽突然同我講話煮埋我飯!!?死啦, 我又痴人餐嗎? 家陣我同人好熟咩? 但我見蕃薯媽好有誠意講, 我也卻之不恭, 其實係自己為食答應左....

又係我至愛的釀節瓜呀~好野!! 仲有豬排及我同佢的飯~

食完傻之後, 我地再努力做功課, 佢負責打英文報告, 我負責寫講稿. 期間我聽到蕃薯同其中一個女仔講電話, 佢好似講honey及有啜聲, 我竟然開始唔開心起黎, 而且仲想早走, 於是我打電話比姑姐及文迪, 但我因要寫埋佢篇講稿比佢practice, 最後都比原定時間遲左成二個鐘先走得, 因我地當中無啦啦走去研究flash及我在佢張床上休息一陣, 佢仲幫我蓋被, 不過當日我係穿七分及牛仔短褲, 可能我實左太累掛...況且佢對我亂黎, 我殺左佢都似, 不過佢媽及我地兩個在客廳, 佢竟然kiss我, 呢個人有咩做唔出, 小心d好!!

終於離開, 佢突然攬住我, 我於是發晦氣講, 你都有gf啦, 做咩攬我呀!?佢努力強調自己冇, 於是我同佢講佢頭先講電話件事, 佢先笑我及話冇呀, 只係細聲同女仔傾電話. 唉! 關我鬼事咩? 自己差隻腳埋去, 我同佢係分開架, 唔好再理佢啦!!

母親節...還快樂嗎?

難得一年一度的母親節, 大家又同自己媽媽點過呢? 我估大家呢日應該出下街, 但我冇咁幸福, 因我仲要忙住一個人做哂全組的英文功課...就係收集左同學的問卷, 之後寫報告及講稿

媽媽去我細佬屋企陪月, 好少返黎屋企, 今日難得佢帶埋姪仔返黎, 以為可同佢哋傾下計, 行下街, 點知我全枱面都係功課, 見到自己咁忙, 冇時間理佢地, 覺得好唔開心. 不過間中休息都有走去同姪仔玩, 見到佢笑個樣好得意, 本來想叫其他人影下相, 可惜佢好快已經笑完, 錯過重要一刻....間中都有幫下阿媽手做家務, 但做得唔太多, 自己真係不孝!好在大家有得坐底一齊食飯已經好開心, 好耐都冇呢種溫暖的感覺....

點樣努力都好, 都叫勉強完成呢篇報告, 但未夠字數, 個course要求有1200-1500字, 但我只寫得千多字, 自己開始發脾氣, 埋怨點解自己要做得咁辛苦? 明明係四個人做的功課, 最後只有我自己一個人做? 咁我同自己一組有咩分別, 我真係好想哭!!點解人人可同媽媽慶祝, 自己就唔可以? 我越做越心淡, 都係訓覺冷靜一下先!!

p.s. 原來除左我唔開心之外, 蕃薯都係, 佢只講有事令佢唔開心, 但冇講原因. 而且我都同佢講自己做功課好辛苦, 佢也體諒我, 仲話聽日原定約左朋友都取消, 同我一齊做功課. 唉....聽住先啦, 又係呢句, 都係聽日先算!!我哋唔係連命運都差唔多吧!? 或者只係巧合呢~

慶祝darren生日~

其實我唔係太認識darren呢個人(如果我冇串錯字的話), 因文迪及另外朋友想同佢慶祝生日, 而文迪又想我同佢一齊去, 最後我都胡里胡塗應承左佢, 仲叫埋阿光一齊去. 好少見到文迪好討厭一個人呢~一定係果個原因, 結果佢不停打我, 但冇所謂啦, 至緊要你可下左啖氣就好~不過講真, 自己都少少討厭果個人, 成日同人懶熟....

我哋三個, 同另外不太認識的三個男仔一齊坐地鐵, 蕃薯都同我哋一齊坐, 但佢約左阿聯及波特要去深水步睇相機用品, 唔去唱k, 好可惜呢~

我哋去尖沙咀neway幫darren慶祝生日, 由文迪帶路, 我哋冇人認得路, 不停兜兜轉轉, 終於去到目的地....去到之後, 我哋決定食k-buffet, 當然係即刻出去拿左食物先~

至正的三文魚壽司呀, 簡直係我至愛!!至於櫻花尤魚手卷都唔錯~

我哋掛住食野, 好少唱k, 難道毎人都肚餓嗎? 大家拿哂食物後, 主角終於出場啦~我哋好快食完野, 之後去唱舊歌, 我哋今晚變左懷舊金曲夜, d歌唔舊唔唱, 發覺好多唱得之人, 無論男女都係, 個個都唱得好聽, 除左我.....

牛一之星~darren啦!!成日上堂見到佢, 但唔知佢咩名...

之後蕃薯打電話比我, 我哋傾左買電腦一事, 我話自己屋企冇電腦用, 我妹用哂黎玩網上遊戲, 佢都鄧我唔抵掛, 佢語氣好重地話我妹只係打機, 係都比我用電腦, 仲話我咁都唔話自己個妹, 真係冇用. 不過唔緊要, 或者佢講得對, 我個人太[林善]掛?同左蕃薯傾左好耐先收線, 我再去拿點食物返黎, 佢哋仲問我去左邊, sorry, 要你地久等了=.="

相處左一陣, 原來darren佢地都幾好人, 可惜自己不懂玩骰子及酒量淺, 令佢地有點掃興....離開前一刻, 仲拿出文迪佢地預先買左的生日蛋糕出黎, 大家一齊分蛋糕先~

我哋今晚個生日蛋糕牙~不過點解係心型呢? 難道製餅師父以為係母親節蛋糕?

今晚咁開心, 點少得大家影下相呀!? 我哋先輪住一批批影相先~

先係我同主角影左張先~自己塊面好鬼肥><"

主角, 阿光及.....我唔記得佢叫咩名, 只知佢同我一樣讀會計...

大家黎個全體大合照先!如果毎次生日都咁開心就好~

開心的時間好快過去, 終於到左離開的時候. 我本來想到荃灣, 坐小巴返屋企, 因為比較平. 點知中途阿光打電話比我, 話我漏左個相機在k房!? 自己真係大頭蝦!! 正在猶豫返唔返去拿返個相機, 最後都係返去拿返, 同埋要捱貴車, 真係唔抵!

公司雜記

又返黎公司呢邊啦, 先講同事先~可能係我最細, 佢哋毎個人都好鍚我, 尤其係我食午飯時, 佢哋都會叫外賣, 而且仲把送分比我, 都有幾多份量架, 有時仲有湯飲添! 哈哈~都算係個免費午餐. 而且佢哋又驚我食得太飽, 會嘔返d食物出黎, 叫我飽就唔好食. 我知道佢哋好關心我, 自己都好開心, 在呢度工作, 比起旺角更加開心, 如果永遠都係咁就好(即係在果度打死一世工!?? 咁設計呢?)

工作上, 而家努力埋好盤數比核數師, 呢日個核數師叫我在2007及2008年各員工人工, 用黎填報稅表. 好在我一早有做braekdown(拆數), 唔係都唔知點比佢好, 如果冇係咪斬隻手指比佢呢? 好在最後都比到佢及冇錯到, 而且佢仲好好人教左我好多會計知識, 多謝你~

平時我會幫公司出下日本人入錢去我哋銀行的文件, 幫公司出票及入賬呢d普通會計野, 有時幫下船務果邊check下佢哋有冇做錯. 今日有兩張大單的貨要出, 大約有十幾萬貨要在今日內在香港做好, 再運去日本收錢. 我做左總指揮, 幫mooji, 阿珍及倚安對下實數表(即係各內衣的尺碼及數量是否足夠), 兩張單的貨數足夠的話, 就可叫mooji打完全準確的實數表. 另外我都要幫candy, 睇下實數表和invoice數量是否相同...總之都係對數字, 點解成日都係數字架???我對到想嘔啦=_="

p.s. 今日倚安終於要飛去台灣, 可以見到自己男友及親人, 開心死佢啦~記住買手信比我哋牙!! 不過都應該係食物吧!?

買賣朋友的投資策略!!??

做完功課後, 發覺自己成日好悶, 冇野做, 又想學下電腦, 但平時返工都望得多啦, 返到屋企仲點會望住部腦! 加上自己又係電腦白痴, 學極都好似唔識, 唔想去學. 所以我在呢個星期內, 迷上左玩facebook上的[fd for sale], 中英文版的身家都激增, 原來可在短時間內搵到好多錢, 係咁開心~而且仲迷到返公司都玩, 不過都係老闆娘放左產假, 老闆又去陪佢, 我先至咁放肆, 唔係連試用期都唔過就知味道!!

在英文版方面, 我用[即日鮮]的方法去玩, 即係買d自己覺得有潛質的人黎買, 至於咩係有潛質? 呢樣野真係好考自己眼光, 如果買錯, 就要長期擺個人在度, 好似我而家個女仔, 擺左n世都冇人買, 好無奈..... 總算我的眼光不算太差, 多數都係即買即賣, 試過最勁紀錄, 我一買左個pet, 一分鐘後即刻有人買返我隻pet, 仲要earn成幾千, 毎日如是, 如此類推, 一直儲錢買貴pet. 所以我在短短的五日內earn左成十四萬到, 好開心呢~

而家我買的pet唔太多, 只係成日keep住兩隻, 只要我買一隻一黎, 都會有人買返果隻走, 費時我冇錢用, 買的pet全部都過十萬架!

中文版方面, 有兩個好心人, 佢哋一直夾埋少起我, 由我起初只係值七百幾元, 搖身一變值七萬幾, 升左接近一百倍!!!!如果玩得耐, 呢個數絕對唔驚奇, 但只係五日而令我升價勁多, 就真係好奇! 除左呢兩個外, 其他人也有幫到我手, 其中一個叫阿jack, 佢全力支持我及主動幫我, 無論係中英文版都會買我返黎, 多謝哂你~

見到自己的身價在毎分鐘內不斷上升及有錢落袋, 真係好開心架! 就連個最新訊息果五頁, 全部都係自己的買賣紀錄, 自己覺得好驚訝~

其中一個炒我的靚女~唔知點解影出黎都係黑哂, 如較閃光燈, 又會全部爆哂, 真麻煩!! 都係比條link大家睇下 ---> http://apps.facebook.com/trade-friends/?id=1221102838(不過要login左先睇到,大家有facebook應該問題不大吧!?)

我真係好少post人上黎, 尤其係女仔, 因佢哋多數一點都唔靚, 只係化哂濃妝, 懂張開對眼勁大去影相, 穿得勁性感, 影左張相就話自己索, 覺得自己好靚...可能我講得比較直, 如果傷害到其他女仔唔好意思...惟獨係呢個女仔, 不但冇以上普通女仔的特點, 不需太濃妝, 只係穿上類似lolita已經好靚, 證明左真正靚女不需太多人工修飾~

其餘兩位仁兄都唔係太靚仔, 自己唔post啦, 有機會去中文版[fd for sales]下佢哋啦~

越來越享受earn 錢的過程, 而且仲可見到好多靚仔靚女, 可以儲到錢買哂佢哋黎做我pets就好(發夢中)...

努力畫好storyboard(下)

今晚又要再捱夜, 係時候畫埋個ending, 唔想畫太耐!都係好累好累, 真係唔想再畫, 都也冇辦法, 點都要頂住, 呢個course預左要成日捱夜啦...

上次講到蕃薯及piyo比男主角追, 佢哋究竟有冇事呢?

蕃薯捉住piyo走呀走, piyo終於要動用自己最利害的東西, 就係佢頭上隻公仔, 隻公仔係識飛架, 係時候同企鵝幫講再見~其實係畫蕃薯比個女仔攬時, 佢有面紅架>_<

[你哋兩個太重啦!] 呢句野應該係隻公仔講, 佢終於支持唔住, 但錯有錯著, fall左去企鵝阿頭同人交易軍火之案發現場
男主角當然唔會放過機會影相底呢d犯罪證據, 女主角嚇到呆左. 呢個追逐故事終於完結. 好快就到左第二日...

最後蕃薯終於交到差, 辛苦哂!! 最後三人終於上報, 及比警方拉左, 老闆也因銷路上升而笑顏大開, 果然係現實呢, 蕃薯都冇野講...

終於畫哂, 個心都定左好多, 加上蕃薯答應我, 會幫我做個電腦功課, 佢最近對我真係好左, 而且我哋相處都好開心. 其實我冇叫佢幫我做功課, 係佢自願幫我做, 可能佢鍾意電腦, 覺得冇所謂吧!? 不過係咩原因都好, 真係要多謝佢. 仲有文迪都係, 上次份html個黃色月曆幫我做埋, 再次講聲多謝先, 有兩位好友幫我, 其實自己也係個幸福的人~都係唔好太貪心, 強求其他唔屬於自己的東西....

好累好累, 捱左兩晚夜, 今晚終於有覺好訓^^

努力做好storyboard(上)

終於唔使返學, 以為自己可以休息下, 點知又要做2D graph的功課, 係幫flash動畫畫一個storyboard, 其實阿sir要求唔係太多, 而且分數也唔係佔太多, 只係功課的10%, 而係但我又唔想草草完成呢份功課, 於是我開始捱夜去做呢份功課....

先講下我同蕃薯合力做呢份功課之內容先~係講一個男攝影師及記者, 我整鬼佢, 個男主角就係叫返佢自己個名fantasy, 哈哈~因老闆見報紙銷售整低, 於是搵男主角去影底一班犯罪份子 -企鵝幫的犯罪證據, 把佢登報及繩之以法的故事. 當中佢見到不思議少女, 比企鵝幫追, 男主角去help佢的冒險故事!!其實個故事雖然簡單, 但做起上黎好得意, 而且仲好好笑, 自己都幾鍾意個故事的說~

先比大家睇下我部分作品, 及對佢哋的想法...

先講男主角fantasy受氣, 而老闆因業績唔理想而嬲, 辛苦哂你啦, 蕃薯~作品方面, 油左綠色先知唔太襯, 有點後悔添!!!

當男主角知道自己要影企鵝幫時好震驚, 而且仲無奈離開公司, 在街上行左好耐, 都冇咩發現, 點去交差呢?

之後蕃薯在街上見到女主角piyo比企鵝幫追緊, 而且仲把女主角迫去街角, piyo好驚慌的樣子...

企鵝幫開鎗, 仲要係機關鎗!? 蕃薯走去help個女仔, 不過佢冇中鎗, 之後仲問piyo有冇事添~

結果蕃薯及piyo可否脫離企鵝幫的魔掌? 蕃薯又可唔可以影到企鵝幫的犯罪證據呢? 聽日先再畫啦, 我已經好累, 想訓覺啦, 又要早返工, 都係聽日再畫過, 都係休息返一陣先~