和同學又食飯, 確立自己方向?

放左學後, 因爸去飲喜酒, 屋企又冇飯食. 又和同學仔食飯, 原本想去大家樂, 點知夜晚只有豬排的飯及鐵板等等, 咩都係豬排, 雖然我自己係, 都唔使成日食我架!! 最後去左一間地下舖食車仔麵, 總之係街頭雜食之類, 我叫左好耐冇食過的兩溝及炸餃子~

個兩溝都幾好味, 又唔太稀唔太結, 又多料. 但個餃子就....可能我唔鍾意食[久]菜...

全班同學一齊去食飯~文迪同berry呢? 又乘機唔比我影相? 激氣!!

正當我哋全部人食緊飯時, 見到教2D graph的阿sir一個人行過, 我哋叫阿sir同我哋一齊食飯, 佢叫我食物完全同我一樣, 嘻嘻~除左講呢個flash功課之外, 也講起未來的出路, 文迪佢想做燈光師, 確實自己的路. 但係我呢? 我的道路又係咩? 我問左阿sir有冇插畫師的工作, 總之係同畫畫有關的東西. 佢提議我把自己作品投稿到部分大的美術創作公司, 求一個面試的機會.

而且阿sir同我講大公司的結構, 佢話至緊要畫野靚, 仲要好睇人事網絡, 如果自己好命會得到高層賞識及客人欣賞自己, 自己的路會易行好多. 公司內部會細分好多部分, 自己可能只會負責畫好少. 但都比細公司好, 因細公司除要一腳踢, 而且多數主意由老闆決定, 自己只係跟佢意思做事, 同埋要自己摸索畫畫知識, 所以佢建議我在大公司做會比較好, 第時轉細公司都容易. 我打算會在五月後會畫多d自己作品去投稿, 希望公司會比我呢個機會.

如果我真係有呢個機會, 我估自己唔會再讀呢個course, 因我的目標已經達到, 讀呢個course就會變得冇意思, 加上人工一定會比而家少好多, 我估自己離開時, 一定唔捨得同學仔, 或者眼淺的我會哭起上黎. 但我堅信自己的未來的道路, 雖然唔知係開心或悲哀, 但只要比個機會我就得, 我一定會努力做好, 即使人工比而家低, 或要捱夜都唔怕^^

找個台灣男友???

話說我的普通話真係差到貼地, 加上有一名大陸職員阿珍及一名台灣職員依安, 所以成日都要用到普通話, 我認識的唔太多, 毎日同佢地學幾個生字. 其中依安突然同我講, 叫我不如在台灣找個男友, 毎日在skybe(網上視像會議軟件)同佢傾計. 我也抵死到叫佢介紹個比我認識.

如果真係有就好啦, 可能我會去台灣搵佢, 又可同佢去旅行呢~想起兩個人一齊去旅行, 佢又對我溫柔細心, 沿途一直照顧我, 又成日講笑話氹我開心, 而且佢個樣一係似小美或鄭元暢都唔錯, 好sweet過毎一日....喂喂, kumi, 個靈魂快d返黎啦=_="

真係好想搵個真正男友啊~唔想同蕃薯在個糾纏不清的關係上, 我用左boxing day唱k果張相做wallpaper, 老闆娘都問蕃薯係咪我男友, 我都唔知點答佢, 我哋跟本都唔係, 但又有情侶間的行為, 而家好似地下情一樣, 我都好混亂, 睇黎我真係要有個男友先得, 呢段糾纏不清的關係先會結束, 我同蕃薯難道緣份未盡嗎?

同學仔試相機

今日web tech考手寫html, 結果個腦空白一片, 咩都寫唔出, 真係死得! 仲要枉費蕃薯教我, 自己真係蠢到死, 睇黎電腦真係唔適合我....

考完試後同學可自行離開課室出去食野, 見到蕃薯同tracy一齊入課室好妒忌, 蕃薯之後問我識唔識, 我只係是但答左佢算數, 好討厭小氣的自己!

miss冇教書, 比我哋自由活動, 我竟然又打機, 比miss鬧我, 叫我收埋部機, 蕃薯都話埋我一份, miss就話o者, 關蕃薯咩事呢? 之後蕃薯問我有冇帶部相機, 好在我有帶, 於是比左佢玩. 佢為左證明個廣角鏡有幾wide, 佢搵左我, 波特及阿銘自拍合照~

哈哈~真係影到四個人, 好勁呀~

有部分人冇一倖免, 比懶玩的蕃薯影左相, 排名不分先後^^

第一個當然係我, 睇黎佢最近好鍾意偷拍我, 一影左我d相就用[protect]mode, 洗唔到我d相. 佢影我相有咩居心? 我呢個pose似在度叫佢唔好再影, 好正~

努力的文迪~睇黎佢唔知道比人影左, sure係蕃薯的好事?

哈哈~到佢比人偷影返轉頭, 抵死囉! 佢個樣好鬼好笑~

我相機有個I.A mode, 即係自己完全唔使教光圈, 焦距....全部由相機自己set好左比我影. 有部分懂攝影的同學都笑我用呢個mode, 我係用呀, 唔比呀! 鬼叫我係攝影白痴咩! 可能蕃薯見我唔識影相先介紹呢部相機比我知麻, 不過佢哋有句說話講得好對, 係[傻瓜人用傻瓜機], 哈哈~

補拜山, 同阿b影靚相~

話說我哋全家在清明時冇去拜山, 因為正日又多人, 又迫掛, 自己又怕迫, 所以今日先去拜山. 我晨早八點幾已經要起身, 好鬼眼訓呢!!同阿爸及妹去長沙灣度買燒肉和雞, 順便買個早餐食下先^^之後媽媽及細佬都黎到, 我哋在途中打返舖機先~

nds在4月24終於出左[太鼓之達人DS -七島之冒險]~我呢個機迷點會唔玩呀!?今集好得意, 故事mode有點似rpg玩法, 但要玩歌過關~

故事mode打boss時的畫面, 最緊要唔好按到炸彈及唔好有miss啊, 唔係會自己扣血....

好啦, 講返拜山先~我哋終於到左第一個拜山地方 -和合石. 我哋一去到已經勁多人排隊等坐巴士, 仲打哂蛇餅果隻, 我哋等左好耐, 終於有車啦! 阿爸一早已經泊好車, 行埋上去和合石添...如果唔係拿住衣紙, 我都行上去啦, 好怕等人或車....

呢次係拜爺爺, 好快已經拜完, 我哋去下一個地方旺角. 呢個係拜麻麻, 佢等左好耐都仲未等到靈位, 骨灰擺左在道堂, 我哋要去果度先. 自從唔在旺角返工之後, 我好耐都冇去過果度. 好耐冇探到你, 你而家和爺爺仲好嗎?

拜完山之後, 我要先返屋企做flash mv的功課, 要再想過全個故事及人物, 本來想做到五點幾先出門口, 但媽媽一個電話, 叫我盡早出門口返我爸公司食粥, 冇錯, 我爸公司有地方煮野食架^^我只好快快地出門. 可能係太耐冇去過, 已經人面全非, 世事變得真快...

新舊lift在埋一齊好得意, 好大對比啊~部新lift幾好坐的說^^

食完粥之後, 我哋去左細佬屋企度睇阿b及弟婦, 而且仲抱過阿b, 佢軟綿綿好鬼得意, 而且仲發現我係唔識抱bb....期中幫阿b影左唔少相, 也係我興趣之一, 我一見到佢就會影佢相啦!

媽媽及阿b, 阿b張開對眼大點啦~

阿b識望住鏡頭影相, 好叻仔呀><

佢訓在床上個樣好得意啊, 比姑媽.....唔係....係aunt kumi抱下你先~

呢張係我在麻麻屋企度影相, 影左弟婦及阿b, 好溫馨呀~唔知我有冇咁的一日.....

好友? 情侶?

今日放學後, 又去蕃薯屋企溫書, 由於我部相機唔知點解, 琴日突然壞左, 一影相就全個螢幕黑哂. 整到今日要去買過部. 見同蕃薯同行, 於是我哋一齊去買相機. 同佢到佢屋企附近周圍去睇, 最後買左而家在電視買果部panasonic fx-36, 當然要左黑色啦~哈哈~始終都係要破財, 在百老匯買都算平左, 但冇左個機套, 盛惠二千七百幾, 其實都幾貴下, 不過有個最殺食我25mm廣角鏡, 同埋支援拍攝1280 x 720高清影片, 呢二樣野都好鬼正!

之後終於去到蕃薯屋企, 我買左碗粥食, 點知間粥舖竟然比左支fork我, 點食粥呀? 而且我食粥期間, 蕃薯狂試機, 影左我食粥的相, 不過好多都好樣衰, 已經比我消除左, 只係剩下呢一張

好彩蕃薯有影底我食粥得支fork的證據, 應該睇到係支fork吧!?

多得部新相機, 我終於有佢屋企張相啦~不過佢似乎係度影我多d...

蕃薯又係度試機玩自拍, 仲要似後生女果d整到隻死人眼好大, 在上面影返落黎果隻, 真係好核突呀, 加上仲影到我, 真係oh no啦><"

我食完粥之後, 佢就教我html, 佢在佢媽行開時, 突然問我拿返呢次學習的費用, 唔係錢, 而係攬住佢...起初我都覺得冇所謂, 因外國人之間攬下只係禮貌, 所以咪冇所謂. 點知佢突然錫左我一啖!? 我當時嚇到呆左, 真係完全冇預料到. 之後佢見我一接觸到男仔就震哂, 佢問我係咪好少接觸男仔, 我其實也都係牙, 工作及朋友多數係女仔, 所以一同男仔距離好近接觸, 唔知點解我個身就震. 佢仲暗示問我係咪處女, 我冇答佢, 不過都比佢估到囉, 認真弊! 佢仲要我合埋雙眼, 試下摸佢....我都仲未摸到就縮手, 估唔到自己原來係咁怕羞....佢話好鍾意我怕羞個樣, 不斷令我怕羞.

佢終於食完飯, 佢媽媽去左洗碗, 佢自己訓左在張床上, 佢搵藉口話自己頭髮有d問題, 叫我過去睇下, 點知佢一手攬住我, 當時我哋兩個塊面貼得好近, 而且仲kiss添!? 點解會咁架!?佢一直攬住我, 唔捨得放手, 唔知點解我都冇放手及整開佢, 我哋維持左呢個pose一陣, 之後佢支我, 我怕痕先至走開. 期間佢仲伸手摸我, 呢次真係死啦! 好友點會咁架? 呢次難道又[奶]野嗎? 我自己要抽身出黎!

由於今日上堂知道flash原來真係好難整, 我原本個計畫被迫取消, 其實都有點可惜呢~因蕃薯媽都讚我個幅畫畫得靚. 最後轉左個好得意的plan, 第時大家咪知囉^^

我用左成二個幾鐘畫, 其實我知道自己個mv整唔到反而鬆左一口氣. 可能真係冇時間及太難畫掛..雖然有點可惜....

mv 內其中一個畫面掛!? 似乎同西裝有點關係呢~

傾功課傾到成十一點, 我終於又要回家啊, 我已經好累呀! 加上聽日要八點幾起身, 一早去拜山, 睇黎要早點訓覺呢~

忙碌但開心, 毎日都咁開心就好~

今朝返工, 竟然見到四位日本客人仲在度? 原來佢哋坐二點飛機走. 講真我有點唔捨得yuki, 應該只係覺得佢靚仔, 驚佢走左之後冇得再見吧, 我始終鍾意的人係....我見佢唔知係咪睇我哋公司物品啦, 成日在我面前行黎行去, 我覺得佢應該知道我望佢囉, 唔理佢係睇貨物又好, 得登比我望都好, 始終我哋係二個完全唔同世界的人, 而且佢今日又走, 我哋應該唔會再見面吧!?

但巧合的事終於發生, 就係我哋本來唔係一齊去toliet, 但去完toliet之後返黎, 我哋巧合地撞到, 佢唔知道我公司密碼, 佢用請的手語叫我開門, 我按左密碼後, 佢再按住度門比我入去, 全個過程我哋咩都冇講, 但估唔到全部動作都幾自然, 感覺真係好得意, 而且自己都幾開心^^

最後佢終於走左囉, 只好望住佢背影離開....

突然日本客話要哂我哋公司所有貨物, 我哋由三點幾開始一直把所有物品入箱, 一直做到成九點幾, 雖然有點累, 但老闆及老闆娘不停買食物及飲品比我哋, 而且仲同我哋有講有笑, 成日拿騎呢內衣叫人穿, 有d太妖艷, 其中佢哋見到有個bra好正, 全個係金色, 而且仲比左我, 我都有拿到返黎, 可惜我個相機唔知點解突然壞左, 又要比錢買個部, 真麻煩. 但整體上我哋都好開心, 大家有咩講咩, 除左本身班同學仔外, 估唔到仲有另一個令我開心及放鬆我地方, 好開心again!!

本來約左今日去蕃薯屋企度學html, 因星期一就要考, 但因要加班而取消. 本來我以為都冇咩希望, 想住靠自己就算, 點知佢突然同我講, 佢話睇下佢聽晚得唔得, 最後佢都係應承教我, 真係好開心, 我話自己感動到想真係攬住佢, 佢不但好開心, 而且仲話[佢教得我滿意既...比埋個kiss佢都ok架XD]. 喂! 我只係話miss教我唔明, 唔知點解佢一教就識, 就咁鬆毛鬆翼, 男人果然係唔讚得!!我仲整鬼佢, 問佢錫邊度, 佢仲話kiss咀, 真係離譜, 不過算啦, 我原諒佢的任性....而且我哋用msn傾左成u晚.... 我估佢只係講下笑, 唔知點解, 令我有返之前我哋拍拖的感覺, 覺得有點sweet. 清醒下, kumi shing, 唔好再投入呢個陷阱內, 自己難得先可企返起身, 事業及學業為重呀!!

公司全體大合照~

今日四位日本客再黎我哋公司開會, 又可見到個型仔啦~可惜自己唔識講日文, 應該話自己只係識少少, 驚在人哋面前獻醜, 所以到最後一句都冇同佢哋講.

我哋又一齊去食飯, 在食午飯時, 個型仔突然唔見左, 原來佢去左toliet, 那時老闆問yuki係邊, 我先知佢叫咩名, 我返去公司電腦度查過, 原來佢姓結城, 但個名好似唔知叫咩隆, 總之個名同佢個名一樣, 真係好型^^

後來老闆要同四位日本客去深水步睇布, 我以為四位日本客會今日走, 於是我同其中一名老闆講, 可唔可以同佢哋影相, 最後終於應承左, 我哋公司全體人及四位客人一齊影相, 大家笑下先!

我哋公司全部人合照, 上排左起有candy, 女老闆羅小姐, 同埋四位日本客. 下掛有mooji, 我, 阿珍及倚安. 在阿珍後面就係個型仔日本客!

再補影多張先~喂! mooji, 做咩拿住我哋公司的產品...收腰褲!!??

日本客及老闆黃生影張相先, 果然係人如其名, 連件衫及呔都係黃色的說...

mooji的扮可愛照, 我問過你同意先擺係呢度, 遲d先email比返你^^總之我都學你咁樣影返張, 大家一齊顛~

其後果幾個日本客去睇布, mooji工作時開個file, 個file係生產物品的相, 見到幾個日本客同黃生的相, 佢貪得意改埋佢哋個名, 我同佢仲笑佢哋五個係貨品, 幫佢哋改返個名. 不過也係因為幾張相, 我先有yuki的其中一張相, 真開心^^

佢就係yuki啦, 真人比相片更型仔, 而且佢穿衫也好型~

其中三位日本客人呢~

最衰自己唔識講日文, 唔係可以同佢哋傾下計, 總之我就比心機去學. 我覺得佢哋都幾好傾架, 成日有講有笑. 不過至緊要係同yuki傾計~~睇黎自己要比心機學, 希望下次見到佢哋時, 自己可以講得出日文啦, 哈哈~

激死人....日本客黎臨我公司!?

自從琴晚件事之後, 我哋關係的確比以前好左好多, 可能係我特登去佢屋企教佢, 今朝佢同我sms, 話自己琴晚半夜醒左, 之後訓唔到. 我就講笑同佢講, 我見到佢張purple bed, 我一定會訓得到, 點知比佢笑我, 我實開心到訓唔到, 以下d對話自己都覺得幾好笑, 我仲膽生毛咁在公司內玩sms, 真係冇有識死!

(博住之前話我見到purple bed 開心到訓唔到之後....)
k: [我估我親自踢你落床, 我自己訓仲開心]
f: [><]
k: [冇理由我同你訓吧!?]
f: [有咩所謂, 大家咁熟!] <----吓!? 又係我哋熟嗎? 有幾熟呢?
k: [但我驚同你訓, 我自己會有危險]
f: [點解呀?]
k: [因我訓覺會穿得好sexy, 而且你又like摸我...]
f: [傻....xd....你咁想我唔彩你]

睇到呢度, 我雖然話信佢, 但我總覺得一男一女在床上多數會....總之我唔信只係訓覺咁簡單啦! 不過聽佢咁講都好, 如果佢對我亂黎, 我實殺左佢~不過真係先算啦!

今日英文測驗, 測驗前波特竟然問我琴日去蕃薯屋企溫成點, 而且仲話自己唔去, 費時阻住我哋. 我第一樣想問, 咩野叫阻住我地, 而且仲問我哋有冇做其他事, 我咪只好話我哋只係溫書. 加上蕃薯返學時, 也話多謝我教佢. 天啊! 咪全班都知我哋一齊溫書, 佢又話唔好比人知, 而家似乎全世界都知, 咁樣好嗎?

仲有今日我哋公司有四個日本客黎到, 有三個年紀都幾老下, 但有一個幾型仔架! 我哋一早十一點幾去左食飯, 講真自己都未試過咁早食飯!? 途中好想影個型的日本仔, 但又驚人哋唔鍾意, 真係好想影底佢, 最後都冇影到, 唔制呀><"

危險的關係!?

由於蕃薯仲未放工, 我要先返屋企等佢放工, 不過返屋企之前, 自己買左兩件新tee, 而且之前又買左件綠色背心穿在底, 打算面頭穿件tee, 我貪得意咪試下囉! 而且想搵條短牛仔褲穿, 但係仲未乾, 於是我只好穿住件短牛仔裙及tee去佢屋企溫書.

去到佢屋企, 危險的時刻就到.....我一入到佢屋企, 又見到我至愛的purple bed, 一張枱都見唔到, 我正常地叫佢開張枱黎溫習, 點知佢叫我在佢張床度溫!!!???唔係掛? 咪玩啦, 先生, 一男一女做咩在張床度溫書牙??不過大家又唔好想埋一邊, 只係在床邊教佢英文. 我見佢望我多過望notes, 我自己都掛住教佢, 冇理係咩事, 後來我先知....原來件tee個心口位好落, 佢唔係望住我個chest吧!? 可惜呢件事係我返到屋企先知, 真係唔抵!

除左呢樣野外, 佢一直捉住我隻手在舔我, 甚至連手指都舔埋!? 我問佢做咩舔我, 佢話唔知點解, 總之就係鍾意, 就係咁, 我全隻手都充滿佢d口水....而且佢仲問我介唔介意比佢舔, 唔知點解我又冇抗拒, 仲話都比你舔慣, 冇所謂, 我在度講咩牙?

仲有樣更加危險的事, 就係當我無聊, 睇佢電腦打msn時, 佢竟然在旁邊揭起我條裙, 見到隻大脾, 佢仲話同我好熟, 又咩所謂, 而且仲比佢揭左幾次, 我都忍唔住打左佢, 佢好似好開心....

睇黎我之後同蕃薯的關係更加糾纏不清, 都唔知好定唔好, 不過講真, 同佢一齊又真係幾開心, 而且佢近來成日唱果句, 我記得好似係側田某首歌其中一句[如何緊張.....幸福的狀態之類]. 難道係形容我同佢嗎?

點解我會對佢咁好架!?

話說聽日有個英文考試, 係考寫個英文報告, 連我自己都仲未溫. 但我又知蕃薯英文至弱, 我又唔想佢唔合格, 於是我竟然主動同佢講: [不如等我教你, 我唔想見到你英文唔合格]. 其實佢合唔合格, 跟本就唔關我事, 我做咩仲要理佢? 可能我而家跟本仲放底唔到, 仍然鍾意佢, 即使我身邊出現幾多男仔, 我都只係想住佢, 自己真係賤格. 明知佢對我應該冇意思吧? 但自己又中個頭埋去, 真係死得, 但另一方面我又唔想見佢死都唔理佢, 於是咪主動教佢. 而佢好快都答應左我(佢有得唔答應嗎? 要本人哂時間及車錢教佢), 約好左聽日去佢屋企教佢. 在夜晚八點九在車站等, 不見即散, 哈哈~

估唔到呢件事又成為左我哋關係的轉捩點. 本來我哋唔係成日同對方傾計, 感覺有點生蔬, 但呢日發生之後, 我哋的關係又....

又可見到阿b啦^^

今朝約左我細佬, 弟婦及阿b飲茶啦, 又可以見到佢哋. 加上自己好耐冇飲過茶, 及阿媽成日要照顧阿b及弟婦, 好耐冇見, 所以我完全期待呢日.

我同妹妹, 爸先去搵位, 之後佢哋終於黎到. 見到阿b咁可愛, 一於影底佢先~

塊面仲有少少黃, 我估應該冇咩問題吧? 佢仍然都係好可愛><

其實要講下阿b的健康情況先, 阿媽之前在電話度講過, 話阿b過左滿月, 塊面仲好黃, 因一般情況下, 嬰兒只係開頭會面黃, 之後會冇事, 但佢情況持續太耐, 而且仲話醫生已經抽左兩次血, 真係令人擔心. 不過唔緊要, 我相信佢一定會冇事^^

我突然見到佢同個星星衛巾好鬼襯, 自己又手痕痕影左落黎~

好耐都未試過一家人齊齊整整食餐飯, sorry, 應該係早餐, 真係好開心, 唔知之後仲有冇機會呢?

食完早餐後, 本來想陪阿媽佢哋多一陣, 但我最近學校太多功課要做, 測驗又多, 要早點返屋企先得. 最後我哋各自回家, 唔知下次見面係幾時呢?

visual art 的驚喜!?

今日又係我至愛的visual art, 上次睇過蔡蔡個blog, 應該係好耐之前呢....見到佢好似唔太知咩叫visual art, 等我在度同大家講下先~其實呢科主要係教美術及設計概念, 同埋學下美術史, 總之要我哋學下美術之類, 之後把設計概念用在自己設計作品之中. 講真果句, 我自己唔係太鍾意設計概念, 我覺得物件係死, 人係生, 做咩一定要我哋跟住以前所定的野去跟住做, 咁咪唔叫設計囉!! 我自己個人覺得藝術應該係把自己內心所想, 積極去表達先係, 所以一直先有創新, 不過都只係我個人想法

我仲努力做緊個雕塑, 咪做返先前舊發泡膠囉....呢日打風球, 又落住大雨, 但我都算係比較早到的一個, 唔係我勤力, 只係仲未做好個雕塑, 騎急抱佛腳o者! 毎個同學都冒住大雨返學, 都係叫返佢做蕃薯(佢個名隨本人心情而變, 哈哈~), 佢突然sms比我, 話佢仲等緊車返黎, 我因掛住做自己個作品冇理佢.

阿sir竟然比個好驚嚇的消息我哋, 佢在個screen上公佈上次兩份素描及海報設計的成績. 我兩份素描竟然可得到七十幾分!? 唔係掛!? 最大的功臣應該係我個妹, 佢教左我唔少技巧. 至於份海報呢, 其實我起初見到個分仲未知係海報黎, 只係見到只有我一個六十幾分, 我起初以為係用硬咭紙整果個作品, 後來睇真少少, 原來係海報個分!!?? 點解會咁? 我見到好多人都唔過六十, 只有我一個人過, 自己唔相信, 再用眼仔細睇清楚, 原來係真架....我暫時黎講係全班最高分, 平均分都有七十分, 只要一直保持落去就可[pass with credit]. 希望可以啦! 同埋自己都唔可以鬍驕傲, 仍然要努力~阿光一見到我個分, 都大聲講出黎, 作死咩佢, 想我比人打牙!! 後來蕃薯終於返黎, 我叫佢去睇果個分, 佢睇完自己個分之後, 又大大聲講話我高分, 佢哋兩個係咪同我有仇牙? 想我比人打死....

時間過得好快, 我仍未做好個發泡膠, 但又要上底油, 阿光佢自己一早做完, 佢主動幫我去油底油, 你真係幫左我好大忙, 真係多謝你^^呢份功課仲有好多人關心我. 當我介發泡膠時, 手指留左少少血, 阿sir見我咁危險, 主動教我點樣介...., 蕃薯見我留血, 即刻走到我身邊睇下我有冇事, 真係多謝你哋三位呀^^

就黎落堂時, 突然有個女仔衝入課室, 想搵個插畫師, 做一個關於長州的大型設計比賽, 我見自己都可以幫人, 咪問埋佢詳情, 之後阿光都走黎下, 講講下又搵攝影師, 搵埋蕃薯過黎.最後佢要我哋填表格, 比埋個人資料佢, 我把呢件事同蕃薯講, 佢竟然有大聲問我[做咩胡亂比個人資料人哋?], 那時我聽得到佢語氣有點嬲, 我都有點驚嚇, 好似佢比我仲緊張!? 因落大雨關係, 我一早跟文迪佢地走, 佢同波特仍然留在學校為發泡膠上色, 唔知佢幾時走囉!

邊個買走左我? 多謝阿光^^

放心, 個標題係指facebook上的[friends for sale], 我今日唔知痴咩線, 突然又玩返. 呢次我唔會再為買左我靚仔pet而嬲啦! 我竟然買返fantasy, 而且仲有我的好友. 但唔代表我個型仔計畫會取消, 會仍然進行!!

返學時, 大家都掛住玩facebook, 唔係, 應該只係我吧!? 鬼叫我返工冇得玩咩! 我見到自己突然比個女人叫做ivy買左....因我哋多數都係同學互相買賣, 唔會牽涉外人, 但聽文迪講, 呢個ivy好似已經買左佢哋幾個pet, 唔知係咪有心搶黎搶去, 令佢可搵多d. 如果係咁就過分左, 雖然只係玩玩下. 不過呢個係世界自然定律....有時係殘酷....

阿光考慮緊買唔買返我, 雖然佢有好多錢, 希望你可幫我脫離那女人魔掌. 後來我知你都好好人, 有買返我, 但好快又比個女人買返, 難道我真係脫離唔到果個女人魔掌嗎? 仲有多謝你近排對我好好, 而且仲知道佢原來都幾細心. 當佢見到我在msn上打左句野[失去個重要朋友], 而且佢又留意到蔡蔡同佢傾左二日之後, 在facebook上突然消失, 佢即刻問我係咪同蔡蔡出現左咩問題, 就算有我都唔話佢知啦, 佢咁多口....最後我話我哋當然冇事, 事實上呢...應該冇事吧!? 我在腸胃炎果日同佢傾得咁開心^^

之後阿光又見到我果句[喜歡的人唔愛我], 佢又問我係咪鍾意第二個. 佢真係多事呢....我咪照答佢, 我鍾意果個咪係fantasy, 雖然自己都同自己講, 唔會再鍾意佢. 不過感情d野好難講, 唔係我自己話想點就想點, 但我而家努力去忘記佢, 我已經可以全日唔同佢sms啦, 可喜可賀~~之後黎緊會有好多功課及測驗, 應該唔難忘記佢吧?

真係好多野做....

唔好意思, 今日個blog做左記事簿. 近排真係唔知點解咁博命, 可能係想忘記fantasy掛!? 連佢及文迪都開始覺得我呢幾日實在太博, 成日都冇得休息! 即使文迪話當我比同學仔話時, fantasy在同學面前維護住我, 可能自己掛住做野掛, 都冇咩留意.而且佢約左所有朋友都會話我知係邊個. 其實自己都唔係好想理, 已經同我冇關係....

在公司上, 已經知道老闆娘在五月五日生bb, 先恭喜佢先, 希望bb健康, 聰明就更加好啦! 第時佢哋一家都會開開心心, 好似我細佬及弟婦一樣^^不過我之後功夫就多啦, 我公司有四個職員, 佢哋負責生意上的買賣, 我要負責購貨及賣貨時發票的檢查是否錯漏, 甚至在佢哋忙碌時, 我要做埋一份.

而且又要整好2007/08年度的數比會計師做核數, 真係好得意, 上年度我負責幫各大小公司核數, 呢次輪到我自己做好盤數, 比人哋對返自己d野轉頭, 呢d叫做[風水輪流轉], 希望我的會計功夫到家啦, 唔係都幾[魚]下, 做左四年, 功夫都未到家. 其實老闆娘對我真係好好, 我同佢講, 用excel入數時, 我真係好唔習慣, 慣左用會計軟件輔助, 佢及個男老闆都幫我去睇下有冇合適軟件, 最後佢哋搵左個軟件比我, 而且仲同船務果邊有關係, 細節仲同電腦公司傾計, 而且仲叫我睇下會計軟件是否適合我. 所以我心內應承佢哋自己一定會盡力會幫佢哋埋好呢盤數, 令佢哋可快快上報告上稅局^^

在學業上, 除左呢個星期的visual art考試, 仲有下星期web tech的寫html(寫網頁的其中一個程式)的實際試及英文寫報告試, 毎個試都好緊張呢~英文都仲好, 溫習一下筆記就得, 記下報告格式, 時式等等應該可以吧!? 至於html, 我真係好鬼弱, 驚自己唔合格, 同唔到各同學一齊升班就慘....我連基本都唔認識, 睇黎自己要上網搵資料及睇miss筆記惡補一下先得!

仲有大把功課要做, 遲d會放哂在呢個blog上, 仲會有精美(!?)相片比大家睇睇, 敬請期待~

腸胃炎!?

琴晚都唔知咩事, 只係食左飯, 飲左兩杯簿何酒, 夜晚唔係去toliet, 就係肚痛, 全晚都好辛苦, 毎隔兩個鐘就起身, 連我妹妹都驚我有事, 出黎睇睇我, 對唔住, 整到你都冇得訓....結果我成晚都冇咩點訓, 早上仲好眼訓, 好明顯訓唔夠, 但我也堅持要返工, 於是勉強地返工

返到公司, 我仲仲覺得自己可撐到, 照常聽老闆娘同我及另外三名同事講解公司運作過程, 本來都好地地, 點知我真係嘔左出黎, 仲整到老闆娘頭髮及mooji個臉少少, 真係好對唔住呀!!我急忙同佢哋講對唔住, 而且仲叫佢哋去整理下, 佢哋都好好人, 不但冇怪我, 而且仲驚我真係有事, 老闆娘叫我去睇下醫生, 驚我真係腸胃炎, 仲驚有感冒會感染到; 而且mooji也冇話我, 仲問我有冇事, 我真係好感動, 唔知講咩好, 除左多謝, 我真係唔知講咩>_<"

而且我也本來想去銀行拿票簿, 幫老闆娘交個人入息稅(聽日到期啦!!)及一早出L/C, 但老闆娘見我病得太辛苦, 於是叫左個男老闆代我去銀行, 驚佢半路暈倒. 我一病左果然係累人累物...

結果我都係去左睇醫生, 好在公司離我睇開間診所唔太遠, 只係十五分鐘到, 我途中仲差點嘔多次, 好在都冇. 幾經辛苦終於到左診所, 經醫生診斷後, 真係患左腸胃炎!! 點會患埋呢d病架!? 我返左新工一個月都冇, 點解個天咁玩我? 本來想返公司, 但自己真係撐唔到, 惟有向老闆娘請一日假. 咁就冇左一日人工, 而且我未正式成為呢間公司真正職員, 又冇得claim錢, 勁黑仔!!

我把病呢件事用sms話比文迪知, 佢係第一個知道. 本來只係想比佢一個人知而已, 點知我做咩手多多比埋fantasy知道....佢只係即刻問返我點解會如此, 琴日仲好地地; 而且佢又叫我休息多d及要食野三個短訊, 不過佢關心我, 我都有少少開心....不過都唔及文迪一個電話, 佢問我有冇事等等, 我哋傾左好耐, 好多謝你, 一直都關心我, 可惜街上太嘈, 冇得一直傾落去. 但我在屋企訓覺後, 又再同佢傾計, 傾左好多好多女仔心事^^

可能呢d叫因禍得福, 在我呢次腸胃炎中, 有好多好多人關心我, 包括蔡蔡, 之前同佢吵架, 佢今日突然在msn上主動hi我, 真係好開心及感動, 我仲同佢傾左兩個鐘傾, 傾左我哋近況, 果然係冇傾半個月, 好多野傾呀!

仲有我媽媽, 佢話姪仔塊面好黃, 佢在照顧我哋三個時, 我哋一早已經冇面黃, 但姪仔都過左滿月都係咁....我弟婦在醫院睇緊佢, 佢自己在屋企煮緊飯, 我睇得出媽媽一直好比心機照顧阿b, 而且佢好擔心. 唔使擔心, 佢一定冇事架! 我哋仲要一直在佢身邊, 陪住佢成長. 而且仲要你擔心我, 對唔住, 我應承你除左假期外, 我返工時一定會早訓! 而且工作上我會比心機, 唔會成日做錯, 希望可過試用期及加多d人工比我, 可以幫輕下個家.

姑姐都係, 一知道呢個消息即刻打電話比我, 問我有冇事. 我都知你又工作, 又讀緊呢個會計, 一定好辛苦. 但我相信你一定好克服. 黎緊又要為公司出核數報告, 你一定都好忙吧!? 有咩幫手同我講, 我在五月後先可幫到你啦! 唔知你返新工果度點呢? 開唔開心呢? 我知道你在我走之後, 自己又想走, 不過又得到wilson(前公司老闆, 又係好人)照顧好耐, 唔捨得離開呢間公司, 只要你順住自己良心而行就得, 呢方面我幫唔到你啦!

今日真係多[偉論]講, 好心自己休息多d啦! 其實我患腸胃炎呢件事唔太多人知, 但知道有人在身邊支持我已經足夠, 多謝你哋^^

測驗出貓!?簡直前所未有...

最衰琴日掛住同人傾計, 冇咩溫到今日美術科個測驗添, 真係死得!? 又係呢, 鬼叫自己臨急抱佛腳, 真係抵自己死!

返到學校, 我見阿光坐在我平時坐開個位附近, 我同佢一齊坐. 同佢一齊好正架, 佢有好多零食, 我可以第一個食到.唔係, 我的為食本色又出返黎, 唔好意思...大約八點到, fantasy又返左學校, 也係我哋差唔多時候測驗. 收到試題之後, 雖然全部係選擇題, 共五十條, 但大家你眼望我眼, 梗係啦, 大家都冇溫書....

第一頁有我至愛的美術史(吓!?)係呀, 我在中學時一直都讀歷史, 包括中西及文學史. 可能係讀開有感情, 估唔到相隔多年, 又要讀返歷史, 真係咁巧合嗎? 一見到仲唔即刻答咩, 突然阿光問我個答案係咩. 吓!!???測驗時有得對答案咩? 於是我都同佢互相對下, 驚我自己記錯麻....後來又坐在我身邊的fantasy, 青衣人討論起答案黎!?而fantasy及阿銘就抄我答案???尤其係fantasy, 佢仲逐條同我對答案, 咩世界黎架!? 連阿sir都冇眼睇, 佢都冇野好講, 其實我都唔想, 只想靜靜去做好份試題, 但...似乎睇黎好難呢....

終於收試題, 大家都仲在課室度傾計, 阿sir仲播放一講汽車設計的光碟我哋睇, 但我對車一點興趣都冇, fantasy又掛住同朋友傾電話, sms, 完全冇理我, 好在阿光在度, 佢拿個mp4出黎, 睇佢至愛的[不能說的秘密], 佢仲比埋耳筒我聽, 真係好多謝你, 而且套野真係好好睇, 其中有一幕係女主角及周杰倫在枱上寫心意果幕真係好得, 尤其係個[我愛你, 你愛我嗎?]好正!!我同阿光邊傾邊睇, 本來好開心, 點知fantasy突然大聲一句, 問大家走未, 我又冇得睇, 好激氣!!

直至放學先知, 阿sir原來一早走左, 佢係咪因我哋測驗出貓, 佢又冇得話我哋, 一怒之下, 一句都冇講到就走左? 阿sir真係可憐呢....

雜記

失去左個男友, 心情一直消沉, 做起野上黎好冇意志, 可能係而家呢份新工, 令我覺得自己唔係冇用, 原來比人認同果種感覺好開心, 尤其係老闆放心把大部分東西比哂你做時, 自己真係覺得好有成功感. 不過都有點麻煩架, 就係全間公司, 我係最細, 其他都已經過左三十(汗)...遲d老闆娘生得, 佢叫我及個男老闆一齊去睇下佢哋有冇做錯野, 突然好大責任感. 不過我覺得呢個係個新挑戰, 希望自己可以過關吧!?

阿光突然問我點解蔡蔡在facebook上, 只係同佢傾左二日計, 就突然消失, 問我同佢係咪發生左咩事. 你咁多口, 當然唔同你講啦! 雖然我哋有些磨擦, 但我哋認識左好耐, 有份深厚的友情, 好快都會冇事啦! 不過你感覺都幾利害呢, 我從冇淺同佢講過我同蔡蔡d野, 都比佢估到少少....仲有我在msg中留左句野[暗戀的人不愛我]. 佢一直問係咩意思, 係咪指有其他對象, 其實我無論同幾多個男生傾計, 食飯, 我始終冇法忘記佢, 自己真係冇用, 我只可一直用工作及學業去麻醉自己

仲有某個男仔叫阿jack, 佢見到我msn 內的msg, 又問我係咪唔開心, 我同佢一直傾計, 先知道佢同佢拍左六年拖的人剛剛分手, 原因係有左第三者. 我哋有部分的情況都好似, 感情路受傷, 真係同是天涯淪落人....於是我同佢講話做朋友, 佢就即刻約我去食飯!? 而家d男仔真係猴擒....自己要小心!

主要都係為蔡蔡唔理我唔開心, 都係自己衰! 在呢件事上我學會去信任, 尤其係一個陪伴你七年的朋友, 實在不易, 好希望我, 你及文迪可以再次去cafe食野傾計, 仲有係玩大富翁, 真係好正! 以及去買衫衫, 果次真係好開心^^有你哋二個, 即使我一世冇男友都唔緊要, 只要你哋兩個唔好再離開我. 見到我重要的人在我身邊離去真可憐, 之前有祖父母, 佢哋已經不在人世; fantasy又突然唔同我在一齊, 所以我唔再希望任何一個朋友離開.....

p.s. fantasy 好鬼無聊, 自己在屋企搵個webcam黎玩, 只見到佢個樣, 都冇聲o既....不過在電腦度見到佢, 覺得好好笑, 連我屋企人都望住我, 唔知我笑咩=_="

姪仔滿月啦, 好開心^^

今日上午, 我爸一早整紅雞蛋, 聽講係六點幾起身, 仲要駕車去接我細佬, 弟婦及姪仔. 自己得閒無野做, 突然想起flash上的其中一個角色, 於是動筆畫起黎, 估唔到一個角色都畫左成個鐘, 仲未計上色! 在flash上用電腦上色就話, 但人物設計的draft及storyboard要手畫麻, 真係哂心機及時間....最後終於完成左~

其中一個角色係失去自己皇國的公主, 詳細內容第時個mv咪知~~

姪仔終於黎到啦, 勁開心~估唔到已經過左一個月, 上次冇影到. 對上一次已經係佢剛出世的時候. 佢比剛出世時得意好多, 我也即刻拿個相機出黎影底佢個得意樣先^^

佢眼仔碌碌幾鬼得意, 佢起初成日哭, 要人哋抱下佢, 直至有人抱佢先唔哭, 真識撒嬌...

都係乖乖地訓在度, 望住我哋全家食飯晚飯吧!
請留意佢隻右手~~佢隻手指好得意牙!!

我二叔同姪仔好襯呀~一樣藍色衫, 如比文迪及蔡蔡見到, 一定會爭住抱阿b!?

我哋全家下午在屋企會所內預約左爐燒烤, 好耐冇食過啦!! 我哋都食左好多野, 當中有我的部分至愛, 包括燒麵包多士, 棉花糖及我至愛的腸仔^^但食左唔係太多野, 我始終見到肉就驚.....而且又冇薯菜(即係西難花, 用蒜容業好, 再搵錫紙包住), 呢個都幾好食! 薯菜就冇啦, 成條魚就有, 都幾好食^^我哋掛住燒烤, 唔記得左影相添! 補返一張先~

我部傻瓜dc壞壞地, 本來在早上影的相會光哂, 但呢張好好彩, 咩事都冇^^但我個妹叫我唔好影到佢, 放心啦, 你冇上到鏡~

燒完野食後, 姑姐約左朋友食飯走先, 二嬸及二叔上左屋企食晚飯, 所有食物都未落格, 又要再食!?結果只係食左一碗飯, 之後因下星期二要測visual art就去溫少少書, 其實都係去玩多~我而家要追返所以psp的rpg game, 第一隻係[tales of rebirth], 在ps2度玩過下, 見到自己玩左好多時間....呢次要努力快d玩完先得~

溫習定打機先??

又係我至愛的visual art, 又可以整埋d天馬行空的野, 呢次係用四個高密度的藍色發泡腸, 去整四個雕塑出黎, 問左阿sir可唔可以唔把四個方體平放埋一齊, 結果當然唔得啦! 我惟有埋頭苦幹去做....甚至用界刀時整親手指, 都係如fantasy開頭所講, 見血啦~結果全堂都未完成個作品, 好在可以拎返屋企做^^

暫時係呢個形狀先~始終未完成, 係核突左, 其中左上角果舊係整錯左, 擺住先=_="

主要係二邊削斜, 中間再整個層層疊疊的三角形, 當所有完成品合成時, 中間個三角形會好突出^^起初我構思時以為好易, 點知做個我半死, 成日界錯...

放左學後, 各同學仔熱衷於玩monster hurter 2G, 我就冇咩興趣玩, 好怕要打物件改武器, 都係睇人玩好d. 我見到佢哋好努力打機, 自己忍唔住影左張相~

其實真係好多人玩, 我哋班都已經有六至七人玩, 就連fantasy都想玩!? 算啦, 你都唔玩慣呢類game, 都係睇下算數!

女仔當然唔打機, 除左我之外, 佢哋在附近傾下計, 影下相. 文迪本來話唔比我影, 點知...都係自己偷拍成功, 好野~

各同學已經休息完, 我, 波特, 阿銘, 阿聯及fantasy一行五人又去佢屋企....目的要我教佢哋美術史, 同埋一齊溫html, 其實只有我一個唔認識html, 所以好快教完. 至於美術史, 我因冇notes, 唔可以做預習, 而且用字又深, 好多都唔認識, 而同學仔也開始冇心機, 最後佢哋玩龍珠, 我就訓覺....但係佢哋玩得太大聲, 跟本訓唔到, 真係多得佢哋唔少...

都係我自己唔玩, 因我唔鐘意玩格鬥類遊戲....

好在都只係玩到十點幾就走, 我返到屋企都唔係太夜, 不過都係早點訓吧! 話雖如此, 但成日走去玩msn, 唔緊要啦, 聽日都唔使返工, 就放肆一下吧!!

返學前偷懶!?多謝文迪手信^^

今日一早放工, 自己又唔想返學, 於是sms比文迪, 睇佢去左邊度, 最後我哋都有共識, 就係唔好太早返學住, 一於去左葵涌廣場行下街先, 因文迪睇見有間舖頭的背心質地幾好, 而且又平, 自己也想睇下....

自己近排真係叻, 已經少左同fantasy sms, 而且又冇叫佢同我一齊返學, 以為可以過返平淡生活, 可以真係忘記佢, 點知佢突然send左個訊息比我, 佢話自己就黎放工, 叫我留個位比佢, 仲要話在我隔離!?你又玩咩呀?如果係傾功課都冇咩問題, 但如果係私人的話, 我都唔知點解, 也唔想去估....而且仲問我在邊, 唉呀, 咪阻住女人行街, 唔關你事啦! 途中我去行街時, 姑姐打電話比我, 我同佢講新公司的事, 結果累到文迪自己一個睇衫買衫, 好對唔住呀>_<" 返到課室, 已經係七點啦, 我返左學冇耐, fantasy又終於返黎, 而且用flash畫左一個黃色哈哈笑, 仲話個公仔係tracy, tracy仲話佢好衰, 而且仲打佢添!!我唔知點解又開始嬲, 而且仲話唔理佢. 佢又扮可憐話我唔理佢, 而且仲走開左, 我突然捉住佢隻手, 擰轉面唔望佢, 仲持續左幾秒, 大家都冇放開手, 之後我自己先鬆開佢隻手. 其實已經唔關我事, 我做咩會咁架? 可能係好友之後, 唔想再冇任何朋友, 總之唔係愛情啦! 文迪在馬來西亞返黎, 仲買左手信比我及berry, 要佢特登拿返黎, 真係辛苦哂, 佢送左盒餅比我, 認真多謝哂^^ 文迪話呢隻餅係好出名, 而且個樣都幾靚仔, 佢係在break時比我的, 我仲拿住佢和同學去買野食~



我分別比左berry, 我妹及fantasy. 個外表好似嫁女餅...我而家有女咩!?啋~

失去一個好友...

本來以為一切都開心, 除左愛情之外, 以為自己可擁有所有野, 包括無論係開心或失意時, 一直支持自己的屋企人及朋友, 而且而家都算擁有自己的事業, 除左可以成功擔任一個會計外, 也開始少少公司管理, 人工尚算滿意. 本來我除左唔可以搵到個好老公外, 一切都非常之好, 點知....

我有一個好友, 我同佢由第二年中五認識到而家, 佢一直都係我好友, 讀中學時我哋成日去白田一齊係八元碗的翅麵, 成日在學校糖痴豆, 到左出黎工作, 我哋成日msn傾計, 講自己的心事, 而且仲一齊去女人街買同一款, 但唔同顏色的衫, 本來我哋好開心, 甚至希望第時結婚時互相做大家伴娘. 但自從我同fantasy拍拖時關係唔好, 成日都唔開心, 佢因唔想我成日憂愁, 所以在冇同我商量之下在msn度不停叫fantasy對我好, 而fantasy直接同我講佢覺得同我相處好辛苦, 講到佢好似好快結婚, 好大壓力...我都知佢係真心幫我, 佢自己冇想過後果會變成咁, 只係一心想我開心, 見到我幸福, 我係知佢用意, 於是叫自己忘記呢件事.

我原本以為自己可以放底呢件事, 直至我最近認識aki, 同佢出街一次後對佢好少少好感, 當aki比人買走時, 自己好嬲, 後來當佢留左offline msg, 話已經同我講報左仇, 買返aki返黎, 可能係上一次件事, 我自己又想多左, 呢個可能係我新的戀愛開始, 我驚佢又破壞我, 我竟然做左樣好自私的事, 就係話比佢知我知道佢同fantasy講過的事(因佢之前唔知我會知), 而且仲誇張話係佢令我哋分手, 其實唔係架, 係fantasy覺得我哋好多野唔夾, 未適合做情侶住.....估唔到佢好大反應, 唔知係咪嬲左我, 佢冇再覆我 , 即使我同佢sms講對唔住, 佢也冇再理會我; 我已經唔可以再在blog及facebook見到你, 呢一刻, 我知道自己做錯, 又係自己的衝動, 害到我最重要的人受傷, 點解我總係失敗架! 愛情冇左咪算, 點解仲要令自己冇左個六年的好友呀? 自己真係蠢到無藥可救!!!為左一個唔愛自己的男友而冇左個知心好友, 值唔值得呀?

希望佢之後會原諒我呢個傷得佢深的好友, 期望同以前一樣, 可以一齊買衫, 傾計食飯. 我可以為左得佢原諒, 放棄我呢生所有愛情去換返你返黎.....惟有時間沖淡一切...

公司的同事們~

黎左呢間公司冇耐, 但係非常開心, 毎個人都係好人, 而且大家又講得笑, 毎天返工唔再係苦悶, 雖然冇得玩msn的說....但我在果度返工成日都笑, 或者係我苦難的人生之中, 除左返學之外, 係第二個令我開心的地方吧, 唔係, 應該話係第三個, 仲有屋企都未計!

唔記得左同大家講, 我公司係做內衣買賣, 主要係做日本客生意, 所以我公司個老闆娘d日文好勁, 其實佢係香港人, 只係在日本留學及工作左好耐. 佢好有心機教我工作上的知識, 而且仲對我好好, 佢好信任我的工作能力, 常常委託重任比我, 而我也好羨慕佢, 事業上有又成績, 係個成功我女強人, 而且佢也有個幸福的家庭, 佢老公也係呢間公司的老闆, 老婆比較掘強, 講野時同我一樣, 都好大聲, 話哂係女強人麻~老公就比較溫柔, 講野細細聲, 個男老闆叫thomas wong, 女老闆一見到佢做錯野, 就大大聲叫[thomas wong, 過黎!], 總之好鬼得意^^

仲有四位同事架~分別係:

1)同我比較熟果個叫mooji, 佢成日都鍾意開玩笑, 後來先知道原來佢大我十年, 而且仲有一個三人的小家庭, 真令人羨慕! 我同佢最多野講, 佢仲同我講佢有個妹同我年紀差唔多, 係做空姐.

2)仲有個又係叫candy, 也係大我好多, 佢平時冇咩點同我講野, 只係間中傾下, 佢做事好認真架!自己有個家庭及屋企有工人.

3)另外兩名員工黎自中國內地, 一個叫阿珍, 佢又識講廣東話及普通話, 又係幾愛講笑, 佢成日比大陸廠的職員激個半死, 大大聲聲鬧佢哋, 我驚佢聲帶好易出事....

4)last一個叫倚安, 佢日文及普通話好勁, 老闆娘用呢兩種語言教佢工作, 而且佢打扮也好男仔, 如果只睇佢背影, 可能以為佢係男仔黎, 佢游泳好叻架!

仲有我哋公司用網上會議, 可以見到所有大陸員工個樣, 其中一個女仔叫麗兒, 佢在公司做總務, 有時關於大陸員工上的問題要問佢, 佢都幾好人架, 我哋仲在skype(類似msn的軟件)傾過計, 原來佢自己都好想讀會計, 佢仲羨慕我及驚自己讀唔到, 我同佢講只要努力就得. 另一個男仔叫阿彬都幾型仔, 可惜佢個樣好細, 係負責聯絡內衣設計師, 但佢似乎唔太認識內衣設計, 有一次老闆網拿住本書用視像會議比佢睇, 真係笑個半死^^

希望呢間公司工作落去會好開心, 而家成日覺得快樂了~不但只有學校, 連工作都開心, 人生不算枉過, 但願上天唔好收回我所擁有的人, 事及物!

新髮型迎夏日...fantasy屋的[purple bed]!?

而家開始熱返, 唔知點解我一到夏天就想剪頭髮, 加上戀愛上受挫....總之一定要剪髮, 而且仲想剪個女仔d的頭! 我放左工之後即刻返屋企上日本yahoo, 我見到幾個髮型都想剪, 雖然未必真係會剪, 因屋企冇printer, 髮型屋又冇電腦, 髮型師鬼知我想剪咩頭咩.....惟有把髮型post 住係度先, 得閒比自己睇下都好^^
呢個髮型都算普通掛!?又可返文職工, 係我心水選擇之一!
呢個夏天剪都係勁正, 個髮型又幾好, 又唔太難打理, 剪呢個頭的機會最大~

都係努力d留長頭髮去剪呢個啦, 不過香港有文員剪呢個頸嗎? 但我真係好想剪的說....但睇真下個女仔有點似我在影樓時影相個樣, 難道係我黎嗎?

如果自己又想長髮, 但又好難留得長, 不如玩下駁髮吧! 不過上次玩駁髮都係勁煩, 我都怕怕啦><"

幾時去剪髮好呢? 平時放左工鬼咁辛苦, 係都返去屋企休息下. 一係就返學, 鬼死咁夜先放學, 而且又和同學仔食飯, 都係開心~都係星期六日朝早去剪髮好d, 起碼唔使太趕時間....不過剪左髮之後又有誰會欣賞我呢?

今日又不用返學, 返工又做到死左, 都係在屋企打機最實際. 打緊機時, fantasy突然整個sms比我歎, 佢話自己好累, 我叫佢返屋企休息下吧!......咪住....講起佢屋企, 想起在上星期五去佢屋企見到的purple bed, 於是我同佢講去佢屋企去抬走佢張床, 叫佢快d返屋企開門比我, 整到佢即刻大笑, 我哋果然係無聊....講真, 我真係好想要左佢張床架, 一係話我知邊度有purple的床上用品.

而且仲想起佢星期五訓左在張床上, 我叫佢著返佢攝影功課條裙扮睡公主, 我就扮王子, 不過我唔係鍚佢, 而且用腳踢佢, 一係用劍殺佢, 佢都唔醒, 我坐在張床上叫佢起身!? 佢仲叫我咬佢先醒=_="呢個係咩情況呀? 好似係兩公....唔係, 冇野啦, 快d清醒!!

委以重任!?

呢日係第五日返工, 都係咁多野做, 主要係執返之前會計所入之賬目是否正確, 真係執到我想死!有咩理由資產負債表的item會擺去損益表當支出架!? 而且仲發現會計制度好混亂....再講的話會悶死大家, 總之都係四個字[天下大亂]! 同老闆提起入數的方法混亂, 佢叫我選購有冇合適的電腦軟件, 吓!? 咁大重任, 唔係掛!? 閒閒地都幾千元上落.

之後老闆娘用左成大半日時間, 同我講解公司會計制度, 而且仲比左幾個重任比我, 包括選擇強積金的投資機構, 因佢而家用緊呢間成日蝕錢, 而我又提議左用宏利, 都係自己口多多累事.....除此之外, 公司想做匯款時, 手續費比少d, 老闆娘又想在另一間銀行開戶, 於是又叫我搵下銀行. 點解一日又會咁多重任架? 真係驚自己做唔黎....

老闆娘對我如此信任, 自己都幾開心, 起碼係對我實力的認同吧! (咪自大啦=_=")事業上總算叫做邁向成功的一部分. 可能係個天見我完全失去愛情, 是但比返樣好野我掛, 但我都叫自己唔好太開心住, 因個天成日玩我, 以為得到的, 遲左又失去, 就好似fantasy一樣. 我對毎件事唔會抱住大期望, 惟有順其自然. 不過我冇再為愛情煩惱, 或者自己不適合談戀愛. 與其係咁, 倒不如花時間及精力放在事業上, 其實老闆娘呢件事也令我想開左, 以後不再去想愛情, 唔想去愛及被愛.....或者對我黎講, 呢次實在太傷, 令我不太信任何一個男仔...究竟需要幾多時間才可復源呢?

開心及難忘之約

今日終於可以見到aki啦, 唔知佢係咩樣? 性格又係點樣?真係好期待, 好想快d見到佢. 在出門口前, 佢仲打電話比我, 問我幾點要返屋企, 可能佢驚我返唔到屋企吧!? 而且佢仲為我安排睇戲, 似乎真係好好呢, 不用我麻煩~

一早去到我哋約定的地點 -旺角, 我早到左十五分鐘, 冇辦法啦, 鬼叫要就返屋企村巴時間, 但佢也好準時, 冇遲到. 但佢都係未買到戲飛, 我哋一齊去買, 佢好想睇[三國之見龍卸甲], 佢驚我會覺得悶, 問我睇唔睇. 而我都對歷史都有點興趣, 於是買左3:15的戲票, 在此之前我哋二人先決定食飯的地點, 好肚餓呢~

最後又去左龜井食午飯, 我哋睇左好耐, 最後都係叫個平d的lunch set啦, 佢叫左帶子炒麵, 我叫左手打烏冬及三文魚壽司. 等食物途中, 我哋傾左關於設計見工時, 及各類設計的資料, 似乎佢對於呢方面好熟悉, 佢話見工時最好有一本個人的portfolio, 以及關於自己作品的網頁, 而且有份比較有創意的resume, 當然最重要係如實講出自己擅長的繪畫軟件;跟住問佢工作做咩, 佢原來係做exhibition, 即係幫人整遊戲展, 各類展覽的攤位, 介乎係室內設計及graphic之間, 好似好得意呢! 但從佢口中, 成日都比客人修改佢設計, 而且太大限制, 香港根本唔係個設計的好地方....我哋唔知點解, 只係第一次見面, 已經有幾多野講, 都冇dead air, 都唔錯吧!

我叫的手打烏冬及三文魚壽司~都係三文魚好食d^^

食完野後, 我想同佢影返張合照, 於是麻煩果度其中一個侍應幫我哋影相, 唔知佢係咪手震呢? 總係影得唔太好, 冇理由叫佢影太多次, 最後只係影左兩張相...

呢張都係我衰, 自己個pose好騎呢, 都係再影過吧...

呢張用photoshop執過少少啦, 其實如果果個人唔手震的話, 可能真係會好好呢~

食飽飽, 我哋開始去睇戲啦, 全套戲無論故事, 打鬥場面及音效都勁好, 如果大家唔怕歷史, 又或者鍾意動作片, 呢套也係唔錯的選擇. 睇完戲之後, 我哋仲討論三國時的歷史, 佢話自己仲睇過[三國演義], 總之佢係對三國係好有興趣, 而我也不太抗拒, 同佢講起頭先套戲有邊d角色係假, 而且佢仲指出部分內容唔係跟原本歷史, 都幾好笑. 我都唔算太討厭歷史, 竟然遇上同道中人!? 不過佢只鍾意中史, 至於我就中西史都冇所謂, 難道大家都係悶人嗎? (講笑)

我哋本來去睇mac機, 因aki話設計多數會用mac, 但原來mac機要訂購, 真係少有....最後唔知點解會變左睇手提電話, 佢似乎好想買部. 可惜佢都係冇心水, 最後大家各散東西.

今日同佢去街好開心, 因佢不但有些紳士風度, 而且唔似一般網友只搵性伴侶, 在途中佢一直都冇摸我及做親密動作, 可以正常交往, 希望佢唔會厭我悶, 同埋可以做真正的好友啦^^

突然有人約? 多謝文迪及berry擔心^^

其實之前我同aki約好聽日會見面, 佢話星期五或日會得閒, 因我琴日約左fantasy去佢屋企所謂傾功課, 所以約實左星期日. 不過仲未約好時間, 原本佢叫我再打電話比佢, 但我仍然十五十六, 自己係好想去見下佢, 唔係因為佢可令我忘記fantasy, 或者做fantasy替身, 而係自己真係有興趣想認識佢, 即使做朋友都好, 因我同佢一齊傾計, 又或者見佢在facebook上覆我已經好開心, 希望自己冇睇錯, 佢唔係一夜情個d人.....但我又想等文迪返黎先, 佢同berry都好關心我, 驚我單純比人呃.

佢在七點終於打電話比我, 問我確實時間, 佢話想在一些開陽及多人的地方食下午茶, 最後決定左聽日兩點在旺角地鐵站等, 第時見唔到大家就電聯, 好期待呢日呀>_<"

自己終於有人約啦!!(喂!你平時冇人約嗎?)

我把呢件事話比文迪及berry知, berry好擔心我, 問定我個男仔的電話號碼, 驚我冇返屋企而打比我, 佢話二個鐘會打次電話比我, 而且之後會send短訊比我, 多謝你關心; 而文迪呢, 佢認為個男仔好醒, 係鐘意一夜情的人, 如果係咁我就失望呢, 希望佢唔係呢類人....仲有因近排太忙, 冇時間睇你及candy個blog, 但放心啦, 我一定會走去睇~

重遊舊地!? 異常感覺?

約好左fantasy去佢屋企傾功課, 本來約左下午兩點, 點知fantasy屋企樓上裝修, 要三點先得, 約左在佢屋企附近個輕鐵站等.

在去佢屋企途中, 見到同佢一齊到過的地方, 之後再想起我哋之間所發生的事, 頭又開始痛起黎....同上次去鴨療街一樣, 連我都唔知點解. 去到三聖村, 我完全對果度冇任何記憶, 我仲要send短訊問佢輕鐵去到邊個站落車及佢住邊樓. 明明黎過幾次的地方, 點解會一點記憶都冇? 似熟悉但又陌生的感覺好怪....

fantasy 佢話自己要做少少野, 會落黎接我去佢屋企. 原來果少少野係....去影木棉!? 因佢屋企附近有條天橋, 在旁邊有一棵木棉, 花朵開得好紅及好靚, 我同佢經過呢處, fantasy停留左一陣, 見佢望住人哋影相, 於是我都停在度望住佢, 花及其他人, 佢最後都拿左相機黎影相. 那時天氣唔太熱, 仲有陣陣涼風, 悠閒地睇住人影相及睇花, 好舒服及開心, 佢仲比左佢影的相我睇~

果度d木棉真係開得好靚, 我記得小學時曾經見過, 相隔多年, 好耐冇見過啦...

木棉及斑鳩, 隻雀好似係斑鳩掛? 我都係聽其中一個成日影自然風景的女攝影師講

木棉及相思~我覺得隻雀身上的顏色同木棉好襯, 好sharp^^

兩張相隻雀及背景相反顏色, 好得意~

影左大約一個鐘, 我同佢去買左少少野食去佢屋企度食, 食完野之後即刻開始構思flash 個mv及website內的內容, 大致上都冇問題, 睇黎大家都要努力先得, 唔希望高分, 只求盡心盡力就得. 不過傾左冇耐, 我哋兩個都唔係傾功課, 變左做其他野, 如佢用photoshop畫左我邪惡個樣, 真係激氣! 我邊有咁核突呀!! 連fantasy媽都笑=_="

點睇我都冇咁邪惡啦, 而且仲....自己雖然唔係靚女, 但也唔係呢個樣....

在佢屋企影多個一張, 見到佢多左二條裙, 都幾靚咪影下.....本來想影佢張床, 因佢張床單及枕頭全部都係purple, 羨慕呀....唔係, 係妒忌死我, 佢都唔係鍾意purple, 做咩搶我隻愛色, 又激氣!!!但冇理由影人哋張床麻, 唔係人哋以為我痴線!

我哋三個睇亞視的電視劇, 有時fantasy出去同朋友傾電話, 我同fantasy媽睇到有點笑位又大笑起黎, 連fantasy都問我哋笑咩, 自己在人哋屋企真係失禮哂, 我自己同人哋好熟咩? 我只係佢朋友而已....又或者當正係自己屋企啊, 自己顧下儀態先!!! 發覺去佢屋企跟本唔係做功課, 似去佢屋企玩多, 又浪費左一日嗎?

睇完電視之後, 大家一齊去食飯, 我哋周圍搵餐廳, 我自己鬼知邊間餐廳好味及抵食咩! 都係比佢哋兩個決定啦! 最後搵左一間泰國餐廳食飯, 果度都幾抵食, 而且都幾好味. fantasy先問我食咩, 廢事同我撞餐, 因我毎次同佢冇夾定, 但叫的食物總係一樣. 同我一樣好失禮你咩!??? 最後佢叫左蛋包飯, 而我,口fantasy媽就叫左雞肉濕炒河~

我好鍾意清淡的食品, 我去食泰國野都成日叫呢個, 鬼叫自己唔食蝦蟹咩, 自己真係麻煩....

食完野之後, fantasy又送我去巴士站, 途中佢竟然用舌lamp我nose, 手及塊面, 甚至個咀!!??親密朋友會做呢d野咩!? 我即刻問佢做咩咁, 佢話之前玩facebook個friends for sales, 話佢係我隻pet, 所以扮狗, 而且要lamp主人!? 我於是同佢講[在星期三時你已經比花輪及阿銘買左, 應該lamp佢哋才對, 點解仲要lamp我?] 佢話自己念舊.....結果我全塊面及手比佢lamp哂=_="點解會咁架??我都想知點解, 究竟佢仲鍾意我, 同我發生地下情; 定係只係親密朋友, 我哋到底咩關係? 想下想下, 自己太累啦, 都訓左覺.....