最後一天工作日

時間過得真係快, 我在呢度返埋今日就要走, 其實我都係冇咩話捨唔捨得, 可能在度工作太耐, 加上又唔太開心, 所以冇感覺也算係正常吧!? 趁食午飯時大家行開左, 我同我姑姐一於玩轉呢度, 在公司周圍影下相先~

呢個就係我個臨時位, 一睇都知冇位坐啦, 個位亂到死!!!

我公司門口呀~成個雜物房....

最常用及去的地方, printer部(自稱)

我姑姐見我影得好開心, 佢自己都幫我影埋一份, 但佢唔知係咪太耐冇用相機, 唔係太認識用, 不過佢願意幫我影相, 佢影左好多次都手震, 好耐都影唔到好相, 我已經好開心啦!睇下佢d傑作先~

在個位度影返張先~不過blur左d....

幫公司賣廣告咩!? 冇錢收架!!

都係呢張比較正常d, 不過似開門招呼人客果d....!!!??

走入老闆toys room玩下先~我對佢模型及手辦一點興趣都冇, 只鍾意張按摩chair~!

影完相之後, 我又要工作啦, 最後臨走時, 老闆話[你迎接生命之中的倒數], 啋!!我仲未死得, 雖然我都想死....而且放左工之後, 個同事竟然祝我一路順風!? 我冇聽錯吧!?不過平淡及幸福的一天正是我一直想擁有!! 期待聽日新工中~

可以見到大家啦~好開心!

今日約左liz, 蔡蔡, 寶妮及嘉華黎我屋企閒坐及聚舊, 原先約好左兩點九, 點知我自己唔爭氣, 自己遲左扮靚(扮唔扮都差唔多=_="), 要坐兩點十果架村巴去荃灣搵佢地, 約左佢哋三點在荃灣地鐵站等. 蔡蔡已經不停打電話比我, 問我食d咩, 佢哋已經在百佳選購食物中.....好, 我好快黎, 等多一陣~

在車上同fantasy用sms傾幾句, 佢話自己琴晚去買燈, 買完之後上網睇過支燈, 知道自己買貴左成二百元, 好唔開心, 我都盡量去安慰佢, 同埋應承下次去買野時, 我會比意見及同佢夾價. 同埋佢都係唔好再因貪地點方便再去買貴野!!

去到地鐵站, 我即刻去到百佳搵佢地, 佢哋買左好多正野食, 只欠在我決定食咩ice-cream, 就係我至愛的石板街, 本來以為冇得買, 點知臨尾比我見到一盒~我哋買左勁多野食, 快d去比錢先~

睇黎我哋都買左幾多野食, 不過都係我食多, 因我完全未食午飯.....

去完百佳買完野食後, 我同佢哋四個去左東海堂買蛋糕比我個妹, 佢在美術一直幫左我好多, 我又冇買過咩比佢, 於是應承佢, 請佢食件藍莓芝士蛋糕, 而我自己又口痕, 自己都買左一杯tiramisu, 冇錯, 佢真係一杯黎架! 我見佢得意先買!我哋五個一齊坐村巴, 唔知係咪我哋太耐冇見, 我哋勁開心, 講野又大聲, 整到車上有個師奶望住我哋, 一於少理, 至緊要我哋五人開心就得~

返到屋企後, 我同妹妹都急不及待食左件蛋糕先, 不過食之前, 當然要影相~

食相至樣衰呢個咪係我, 都唔知食緊定笑緊....

件藍莓芝士蛋糕牙~仲好味過tiramisu, 早知買多件比自己食....

當中我哋在度傾計, 睇我facebook及過返liz及酸梅畢業的相, 見到好多開心片段, 真係好正~可能係太耐冇見大家, 所以特別開心, 當中酸梅打電話比liz, 話佢會在七點會黎到, 我哋成班終於齊人啦~不過我哋都係為食, 都係食左野先, 玩陣啤牌先出發囉~

豆腐及sushi, 仲有好耐冇見過的四方果o者o里!!不過我都係冇食到o者o里....

聚埋一齊食石板街先, 特別好味~

我哋坐六點半村巴搵埋酸梅, 太耐冇見佢啦! 佢又變返直短髮, 同返學時個樣一模一樣.....我哋決定去italian tomato食顛拿, 全部人齊哂仲唔開心到飛起咩!? 又發揮我哋嘈個半死的特色, 在間餐廳大大聲傾計, 我估連客人及侍應都頂我哋唔順!!我哋叫左d食物互相分享添! 排名不分先後, 因為全部都唔好食:

唔記得左呢碟係咩...不過話時話, 我都未食過呢碟野!!

果d 雞肉好鞋, 好難食>_<"
係咪咖哩豬排飯黎架!? 死啦, 唔記得左...

惟一呢個叫好食少少, 係蕃茄汁硯意粉, 竟然記得呢個!? 太神奇~

我哋叫的其中兩個係套餐, 加左錢多二件蛋糕, 但我都係呢句, 麻麻地好食~

最後不忘黎一張大合照啦^^而且仲約定左毎個月都會見面一次, 就叫月會啦! 下次見面時間係五月三日啊, 大家不見不散~

約會泡湯!? 傷感的回憶

我今日比平時更用心打扮, 因我之前同在facebook上一個班仔約好, 今日放學會見佢一面. 佢在早上特登在msn度上網問我拿電話, 我都比左佢, 都唔知點解我好似瘋了般, 竟然聽佢話, 可能我同佢在facebook及msn度都幾好傾之緣故....

上堂休息時, 佢真係打電話比我, 聽佢把聲少少低音, 有d磁性, 真係好正, 由於課室太嘈, 走左出去聽佢個電話, 但見fantasy間中望下我, 我心內有點驚佢唔開心, 可能係自己太多心, 佢點有可能緊張我呢? 況且我同佢已經冇任何關係....放左學之後, aki真係打電話比我, 我同佢傾在邊度食飯時, 我提議不如去旺角, 因佢而家在旺角, 佢咪唔使走黎走去, 點知佢竟然問我唔係食燒鵝咩? 吓!? 佢難道想食完燒鵝之後想食埋我, 那時在我身邊的文迪已經替我擔心, 佢不斷整我博頭, 叫我唔好去, 我也不至於隨便到亂同個男人咩咩架, 所以我以只得二個人食唔哂燒鵝為理由而拒絕佢, 而佢也話下次再約, 我唔想令佢失望, 所以send sms 同佢講對唔住.....

個約會就咁冇左, 好可惜呀!!以為可以同個型仔可以去行街食飯~~最後只好跟同學仔去買相機用品及食飯, 估唔到也係我唔太開心的開始

我哋班同學太鍾意影相, 連等車都唔放過....

在車上都係掛住影相, fantasy一見到我另個頭過黎就想影我, 我先唔會比佢影啊!!

途中見到fantasy及tracy講相機咁頭契, 什至話玩game都會保護佢, 我當時锢心好痛, 原來我一直都鍾意佢, 無論網上有幾多個型仔, 自己都唔想去理, 心目中想住的.....總之我見佢地二個一齊傾計, 好心痛, 我唔想望到佢地, 決定自己離開. 心一直想, 點解唔比我同aki去食飯, 個天要玩我玩到幾時!? 途中去買相機用品, 經過好多我哋曾經拍過拖的地方, 我個頭一直痛, 可能係自己太傷感而避免記起吧!? 最邪的係連我哋食飯的地方都係我哋在情人節食飯的餐廳, 勁唔想去到, 而且佢仲叫左我哋在情人節一齊食果個飯, 太多巧合太邪, 好想快d返屋企......

雖然坐在一齊, 但已經唔再好似以前咁開心及恩愛....

我特登叫個唔係果日食的飯, 冬姑時菜水較麵, 真係麻麻地好食啦~而且又廢時想埋d唔開心事....

互相關心...老闆的勉勵

今朝fantasy去見工, 我即刻send左個短訊比佢, 問佢帶齊野未, 眼唔眼訓, 佢一定眼訓啦, 平時成九點幾先起身, 今日八點幾已經要出門口, 我地在sms度傾左幾句之後, 我就要返工. 見佢十二點幾, 應該見完工吧, 但佢一直都冇聯絡我, 本來我可以唔理佢, 話哂佢見工跟本唔關我事, 我哋而家各行各路, 但我自己又唔爭氣, 最後都send短訊問佢見完工未, 佢都有覆我, 仲話見左個幾鐘, 但佢似乎唔太鍾意份工, 算啦, 唔鍾意就算, 唔好勉強接受


臨放工時, 比老闆捉左我去佢間房, 好在唔係訓話...而係佢以為我做設計, 佢鼓勵我努力在呢行發展, 唔好行返轉頭會計呢條路. 至於點解佢以為我做設計, 其實又係我姑姐同佢講, 因佢唔想比老闆知我因低人工而唔做, 所以先講左呢個美麗的大話. 老闆話我而家幫佢做果間大公司, 好多數都冇入錯, 而且仲可完成成盤數, 只係間中有點錯. 佢仲讚我比出面好多會計做得好, 如果我再在呢間公司做多1-2年, 在出面的人工一定會升得好快, 而且sure有五位數字(其實我已經係呢~)睇黎我做會計都唔錯, 佢講得我似乎好好, 如果我全副心思擺去會計, 一定會搵好多, 可惜我興趣不在此.....而且老闆也好好人, 佢話本來我走, 係冇花紅, 但見我在公司內有貢獻, 比左半個月花紅我, 你的勉勵及人工對我黎講有鼓舞作用, 多謝你~希望我第時有機會探下你地^^

今日放工, 悶左成日, 上去facebook玩下, 又玩[friends for sale], 見自己身價暴升至十幾萬, 於是身痕想買fantasy定aki, 因fantasy比較平, 但佢又好似冇咩人炒佢; 而aki又幾型, 我唔知買邊個, 於是突然send短訊比fantasy問佢, 最後佢講當然係買佢, 等我先行街, 再返屋企買佢, 順便打電話比佢傾英文功課. 點知行街途中, fantasy已經打電話比我, 我地傾左半個鐘到電話, 我先發覺原來佢仲記得佢要教我html, 估唔到佢仲記得, 因佢之前冇同我提及過教我, 只係我單方面向佢提出, 我那時雖然開心, 但對佢都係唔好有咩期望, 只係佢好記性及鍾意幫朋友先會幫我, 總之唔好想太多.....

為何放不低? 又係桃花命!?

今日上英文堂, 真係好耐冇上過, 教的係英文文法的tenses. 阿sir用左一個例子去解釋, 就係[he loves her]. 呢個例子對一般人黎講, 平平無奇, 但對於失戀的我黎講, 卻係一個刺激. 阿sir叫大家紙上寫哂所有時式出黎, 由於我已經認識就無寫到, 於是佢就叫我出黎寫哂所有答案. 雖然我答案完全正確, 但我半點開心的感覺也冇, 可能真係因為佢. 以為自己可以放底, 但原來自己從未放底, 可能真係愛一個人太深吧? 呢刻我又再次唔開心, 但我又要盡量忘記佢, 於是我只好扮聽書, 咩都唔再理會....

大半堂我都冇同佢講過一句說話, 直至去完toliet返課室, fantasy突然同我講話佢聽日有份新工要見, 在九點半面試, 佢一定會唔習慣早起身, 而且仲要同朋友傾野, 佢又點可早起身啊? 仲提佢見工注意事項, 面試前的準備....佢也比左佢聽日見工果度個網址我, 叫我睇下先, 之後佢會打電話比我; 我都唔明白做咩要擔心佢呢d事, 佢已經同你冇任何關係, 點解仲要我幫你手? 不過我總是不可丟下你唔理, 咁就一了百了, 可惜自己又唔夠狠. 結果晚上你真係打電話比我, 我問有咩報酬, 你話比我咬兩啖或切二塊肉我食, 我先唔要呢....

放學後, 先和berry, 波特, 阿駿, 阿光, 及因工作太忙冇返學的文迪, 一行六人一齊去間上海餐廳食飯, 我又可食豆沙窩餅~不過在上英文堂前, 設計個miss叫我地拿返作品返屋企, 我拿住塊勁中的storyboard回家, 當時又大風, 吹到連牌都差點爛, 但最後冇爛到, 放心^^

在屋企等fantasy途中, 之前開的facebook之中, 有兩個男仔在msn度add左我, 其中一個仲幾型仔, 可惜佢細過我, 佢剛讀完設計, 而家又做設計, 真係羨慕, 佢叫aki呀, 我在facebook度拿左佢張相, facebook果然方便^^

Aki係抱住跳跳虎果個, 呢張係佢上年畢業的相, 但我覺得佢在facebook上果張型好多~

跟住有其中一個男仔, 佢張相都幾變態, 係上身冇穿衫拿住部相機, 真係唔知佢做咩? 而且又唔係型仔....佢一見到我在facebook, msn上有上網就即刻hi我, 總之又係個大麻煩! 以上兩位人兄, 在msn度又比電話號碼, 叫我隨時打比佢哋, 約佢地出黎食飯, 佢哋當我係咩=_="不過唔知點解, 明明係有機會認識男仔, 可能佢哋仲會成為我男友? 但我而家暫時無法接受佢哋, 可能自己真係唔捨得fantasy, 定係自己已經怕左戀愛及比男仔煩? 因我以前也係咁, 一有男仔同我做朋友, 多數會追我, 總之一接觸男仔真係不得了....可能呢d真係桃花命吧?但我又唔係真係有男友先死!!

仲有一個男仔, 我覺得佢好型, 佢係攝影師及designer, 在佢個facebook上成日有佢作品, 佢可能以為我係卓韻芝朋友, 成日send mail叫我加入佢所成立的攝影及設計學會, 我都對佢好有興趣, 可惜佢已經有定婚對象....但佢都係太型, 我又在facebook上拿左佢其中一張相~

同Aki一樣, 佢在facebook上個張相型d, 但呢張已經唔錯, 佢成為我在facebook的遊戲之中(friends for sale)的終極目標, 要儲成三十絃萬先買到...而我而家只有六萬幾...睇黎我都要加油呢...

心靈治療師

我為左fantasy, 成日都唔開心, 想住我哋係咩關係, 總之係因我哋已經唔再係情侶一事而唔開心. 加上我近排冇咩msn, 唔可以同好友傾心事, 而且如fantasy所講, 感情係兩人的事, 唔好講比太多人知, 不過始終分手(!?)係痛苦, 點都想 搵個人傾下, 好在最近知道文迪同我同個電話台, 佢又知我唔開心, 於是佢提議我地出黎邊食飯邊傾心事, 我最後都答應左佢, 約好左七點在尖沙咀等.

由於文迪遲左黎, 所以我買左本vivi, 坐在九龍公園度邊睇邊等佢. 最後佢終於黎到, 我已經好肚餓啦, 於是去左間幾有格調的餐廳食飯. 果度好寧靜, 而且仲有獨立電視, 不過我同文迪講心事, 當然冇開電視啦. 我哋叫左同一樣食物, 而且仲影左相(我唔係好肚餓的嗎? 仲影相!?)

我同文迪的紅白湯及包包, 個包真係好好味~~

暗暗地, 見唔到個樣, 正!!好好味, 真係成碗湯同你飲哂佢~

都係正經影返一張吧!!

文迪都影返張先~我就係見到佢影正經, 自己先跟佢影之麻~

食完飯後, 我地打算去左尖沙咀海旁去傾計. 文迪指出我一直把自己困住, 只係個好細範圍內走動, 即係我睇的事都好短視, 而且我一直冇了解fantasy的意思, 佢一早講左只係當我係朋友, 唔會做到情人, 只係自己唔願意去接受呢個事實. 可能自己太愛佢吧? 覺得咁快就完結, 自己只係唔甘心.....自己第一次戀愛, 覺得仲未享受完愛情sweet感覺就已經完結. 我同佢只係親密朋友, 有一半半機會做情侶, 其實自己係時候放開, 唔應該只把愛情及佢擺在重要位置, 過去的事由得佢過去. 日子雖短, 但卻比我重要回憶...而且佢也曾經試過接受我, 可惜大家性格不合而未可做情侶住, 其實全部佢都有同我講, 只係自己迷失, 唔願意去想及信. 而家文迪講返, 令我再次回想佢在sms度同我講呢番話.

我突然清醒過黎, 覺得自己好似突然擺底一舊大石, 自己個心舒服好多, 而且仲開朗及開心好多, 覺得任何事都有希望, 唔知點形容, 總之成個refresh左, 我唔再傷心, 也唔迫自己去忘記佢, 總之順其自然過日子算....愛情, 已經唔到我去想, 真係聽天由命, 但願搵到個好老公....不過似乎老公呢樣野同我無緣? 話雖如此, 但始終自己心愛過, 可輕易忘記嗎? 惟有只好希望自己可以忘記....

今晚我突然發覺, 原來有個人可以開解到自己, 一直企在你身邊, 聽你講心事及比客觀意見你, 原來感覺真係好好, 好慶幸自己有文迪呢位好友. 佢令我了解過去一切惡習, 而且仲令我在愛情創傷中清醒, 自己真係開心返好多, 總之就係多謝你 -文迪^^

岸居居, 撞玻璃!

今日終於要測驗啦.....係我至弱的web tech, 我都係臨急抱佛腳型, 唔急唔溫, 結果咪.....一定溫唔哂囉!我約好文迪在葵芳地鐵站等, 本來我哋兩個可以一齊溫書. 點知自己又多事, 竟然叫埋fantasy一齊返學, 而佢又約左波特, 於是四人一齊返學. 但佢地兩個掛住傾相機, 嘈住我哋兩個溫, 我就溫唔入腦....

終於測驗, 大家都好緊張, 但有同學話冇溫書, 加上唔識解題目, 所以miss用中文解釋比佢哋聽, 而且仲容許同學用中文答問題.吓!? 這樣都得!? 我都係第一次見....而且同學仲可以傾計, 究竟係咪考試黎架? 我一於少理, 專心一致去測驗, 結果都...有點題目也認識答, 希望可以及格啦, 又或者唔好太低分已經可以!

測完驗後, berry送我及文迪手信, 佢去完美國返黎, 買左手信比我地, 佢知我鍾意阿jack, 就送左隻可愛版阿jack比我, 正啊~已經係第三隻阿jack^^

之後和同學仔去食飯, 途中見到body shop有好多淺purple的物品, 我掛住去睇, 想靠近佢哋, 點知[彭]一聲撞左去塊玻璃度, 而且仲勁大聲. 我個頭呀~~好鬼痛!! 當時同學見到都嚇呆左, 包括berry, fantasy及winnie, 文迪, 阿光及阿聯, 尤其係阿聯, 仲見到哂全個過程....至於文迪, 佢見到入面個sales都望住我.....結果大家大笑起黎, fantasy仲狂話我, 其他人都叫我小心玻璃, 好慘.....

直至食飯時間, 大家都仲話緊我, 叫有相機的同學小心塊filter, 又話叫人企在用purple物件企在玻璃門外引誘我過去, 又話見到我全個撞玻璃過程要睇心理醫生, 睇黎睇醫生果個係我囉! 眾目睽睽之下撞親....當中fantasy仲笑到話自己好似生得, 一直在度笑, 真係激氣呀~~唔係見你在大家各散東西時, send左個短訊比我, 同我講對唔住, 我一定會殺左你!! 但我見到你開心就已經足夠, 唔期望及想得太多了....

得閒無聊假期....

今日都係冇得出街, 又在屋企打機, 果隻係舊game. 但都玩左我好耐. 如果可以選擇, 我寧願同朋友出街, 傾下計好過......

之後我竟然打掃自己屋企!? 其實一直都係我媽做, 因為我媽佢在我細佬屋企度照顧佢個仔(弊! 比人知道我平時冇做家務添!!??), 結果屋企亂左都冇人理. 我爸及妹妹呢, 佢哋都唔鍾意及冇去做家務, 試問點可以冇人打掃? 最後咪惟有我去做!! 在打掃期間, fantasy又send短訊比我, 叫我上網比resume個樣本佢睇, 我比左自己果個佢, 咪即係佢睇到哂我全部資料!!??佢唔好比其他人睇到, 唔係佢實死硬!!

之後阿聯佢話執相簿, 佢見到有張相就send左比我....

阿駿比呢張我時, 本來我都覺得我哋都冇任何關係, 做咩比呢張相我? 不過都唔可以怪佢, 因佢都未知道我同佢已經唔再在一齊的事. 呢d相咪當做回憶囉~始終都係自己生活一部分, 唔可以抺殺麻. 我惟有樂觀去面對....

聽日終於返工及返學, 自己唔使再覺得悶! 但係.....聽日返學有個測驗, 我咩都未溫過. 真係死得! 希望聽日夠時間溫習....

有點失落.....開心消息!

今日見唔到佢, 於是我在下午send個短訊比佢, 但佢冇覆. 唔知點解, 個心成日囉囉攣, 而且好唔開心, 做起事都提唔起勁.....我點可以比一個唔鍾意我的男人影響到, 我真係失敗! 只係過返同以前一樣的單身生活, 冇咩大不了!!

直至我妹妹唔玩網上遊戲, 我終於可以用電腦. 我在msn度見到fantasy, 我hi左佢, 問佢係咪因我做錯咩事唔理我, 後來佢同我講話幫朋友影相, 而且仲send左相我睇 :


佢之前話想買個bob頭假髮, 我終於知道佢要做咩, 原來又係影相. 我本人唔太喜愛呢隻髮型, 而且本身個頭都好蝦人剪, 所以上年夏天個髮型師叫我剪, 我極力反對, 自己又唔係靚女! 都係留長髮再電捲仲好.....

仲有在英國個表姐在msn度hi我, 話比我知佢會在五月八日會同男友黎香港, 仲問要d咩野, 在英國度買比我, 太好了~其實佢上车先黎過次香港, 今次又再黎, 可能係掛住香港的親戚, 佢仲讚我媽媽好好人, 好掛住佢. 佢會返大陸見男友個親人.....加上佢話二表姐在英國生左個bb女, 比左相我睇~

好得意呀~~個bb女仲未改名. (好似我姪仔張相仲未post, 問下媽媽先, 個相機在佢度=_=")

同表姐傾下我的近況, 佢也見過我在visual art 的poster果幅作品, 佢都覺得幾靚, 叫我比心機去做. 多謝你鼓勵, 由我細個時比自己份玩具比我, 直至我大個, 你都關心我的未來, 對我非常之好, 好多謝你, 可惜的係我哋好少見面....

仲有文迪也有在msn度同我傾計, 終於知道佢和同學之間的交易, sorry, 講得唔好, 係網上買起朋友之遊戲, 估唔到我比佢哋多位同學炒起, 不知不覺已經成二萬幾元, 同fantasy個價差唔多, 文迪都好貴, 成八萬幾....其他同學都好貴.....不過個人冇咩興趣玩, 都係睇下就算....

落雨賞花日

琴日文迪打電話比我, 問我呢日去唔去花展, 而且仲話有六個人去, 包括fantasy, 我便答應佢去. 之後我打電話比fantasy, 佢之前話去影佢個朋友受洗, 佢點樣去啊? 佢話自己約左人六點, 而花展係十二點開始, 所以佢可以去. 後來佢話有電話入, 遲d打返電話比我, 我惟有等佢電話......到最後, 只收到佢sms問我去唔去, 我便答佢去, 傾左幾句, 我又訓左覺....

我都算準時去到約定地點銅鑼灣sogo集合, 去到sogo時fantasy已經打電話比我問我在邊度, 我加快腳步去搵佢哋, 費時自己遲太多. 去到集合地點, 見唔到文迪, 波特話佢遲d黎, 我都有點失望.....因我呢次黎花展都係文迪問我先黎. 見到fantasy, 我唔敢面對佢, 而且仲不其然緊張, 於是我只好一直聽歌, 令我個心感到舒服點. 途中佢哋只講相機, 我真係悶透了

終於去到花展, fantasy, 波特, 佢同事名及阿聯一齊拿起相機影相, 我仍然未感到開心, 可能係同佢發生好多唔愉快的事, 於是自己走到其他地方睇花, 唔知係巧合定故意, 我去不同地方睇花, 佢總會在我附近出現, 而且仲笑我[控]到好埋去睇花, 係咪想食左朵花=_="唔知佢係咪見我唔開心而引我笑呢? 算啦, 自己唔好想太多......

影相途中落雨, 大家走去避雨的地方, 等左好耐, 個天仍然落雨, 而且一直等文迪及winnie到來. 大家見悶便周圍影下人, 當然我同佢都係被影對象, 唔知幾時比阿聯影左張我同佢的合照....之後佢地兩個都黎左, 大家一齊去影相囉!!...sorry, 應該係大家影相就真, 我部相機壞左, 要企埋一邊睇佢哋影, 多謝fantasy, 文迪, 阿聯及波特提供的相片先~

我同佢太少合照啦....有時不驚意比人影下都唔錯^^

在避雨地方附近的三色堇, 真係幾靚呢~ (上: 阿聯, 中: fantasy, 下: 波特)

呢張一睇都知, 當然係阿聯幫我影啦, 好少有佢影相時認真個樣, 做得好啊, good job^^

話明係花卉展, 當然係以影花為主啦~再次多謝各位同學用心去影花, 大會實在太多花, 唔知影咩好, 雖然只係部分, 但已經好靚啦~

小菊花, 黃色都幾靚~好過拜山果d好多....(上: 阿聯; 下:波特)

呢兩隻唔知係咩花黎呢? 加上雨水在花上, 真係好靚呀~ (上:fantasy, 下:波特)

紅色的太陽花, 估唔到都幾靚~(by 波特)

靚到好似假的鬱金香. 我哋起初以為係假, 點知見到有蜜蜂飛過, 先知係真架~! (by :文迪)

除左花之外, 今年也係北京奧運, 花展點可少得果五隻奧運吉祥物. 唔知係咪大陸設計唔係太合我地香港人品味, 我覺得除左隻panda晶晶之外, 其他都好鬼核突....

晶晶實在太得意啦~我, 文迪及winnie都去佢附近影相^^


其他角色呢~我都唔記得佢個名, 雖然佢係purple, 但個樣就.....我覺得唔得意囉(純粹個人意見, 若得罪佢fans就唔好介意..)

當中仲有好多有奧運特色的物品, 包括五彩環.....所以我覺得成個花展都好有朝氣, 而且多數都好靚, 可惜個天成日落雨, 都冇機會影太多, 只係影左部分比大家睇啦~

本來想影團體照, 但真係太大雨, 我哋只好快快離去. fantasy見我仲在遮雨地方就等埋我, 佢邊行邊唱歌添, 都係佢至愛果幾首情歌, 可惜我哋唔係二人一把遮, 唔係一定好浪漫. 但我已經好開心~之後我哋去左hmv度避雨及試聽歌曲, 文迪及波特都各自買左cd, 跟住去食飯, 大家仍然有講有笑, 而且fantasy比以前話得我仲勁, 成日激到我打佢!!

食完野之後, 各同學陪文迪去睇鋼琴, fantasy就要去幫人影受洗, 在旺角搵返朋友;至於我呢, 我對音樂真係冇興趣, 一早返去打機算數. 結果我同fantasy一齊坐地鐵走