今日同蔡蔡msn, 突然之間想去沙灘同想起蔡蔡想去, 咪向佢提議下, 跟住佢就馬上答應, 最令蔡蔡估唔到的係怕曬同怕熱的我都會去.
我哋先預定係6月10日,因為去沙灘要玩全日麻! 之後咪講去邊個沙灘, 分別有有石澳,赤柱,淺水灣,深水灣,清水灣,咖啡灣,黃金海岸,蝴蝶灣,龍鼓灘, 多到我都唔知去邊,加上我勁耐冇去過沙灘, 當然唔知啦! 當蔡蔡同我講我哋f.7有去過石澳後, 我先至記得,我唔係提早老人痴呆? 不過算啦!之後記得咪得. 果日除左沙灘玩外,也會有BBQ, 想起都正呀!
我去沙灘果日maybe會穿三點式, 唔知蔡蔡會唔會同我一樣? 我驚大家見到我後, 會好驚嚇! 希望唔會啦!
於是我哋分別搵人去, 我先問左eva同liz先, eva都表示有興趣去, 至於liz就唔知係咪太忙, 最後未有答覆, 不過唔緊要,之後confirm哂所有野先再搵你!
welcome to my world...
My beautiful life
My model life since Nov 09~
My sweet life w/ bf joejoe since Dec 09^^
My model life since Nov 09~
My sweet life w/ bf joejoe since Dec 09^^
我都唔知前世係咪欠左d男人, 今世要還. 我唔係迷信,而係我成日會遇到d奇奇怪怪的男仔, 仲要二個一同黎!不過估唔到的係連msn都唔例外. 但由於我而家仲同呢二個男仔一直都在msn傾計,便不透露姓名.
有一個在我初同佢講野時, 佢已經唔比我睇佢張相, 我曾經問過佢攞, 但佢一係話公司電腦冇相, 一係就轉移話題, 但都算啦!只要大家好傾咪得, 之後都發覺佢幾好傾, 我哋咩野都傾,好似好鬼熟, 佢仲成日話自己好型仔, 但又一直唔見佢張相!?
唔知係咪男女之間太熟會有誤會, 今日同佢講開愛情呢個話題, 佢竟然講左句 :你唔會愛上我吧! 吓!!!??我連你個樣都未見過, 把聲又未聽過, 我哋傾計只限msn,最重要的係佢有gf!!又怎會愛上你呢?我先唔會做第三者!!就算係講笑都唔係太好. 其實佢之前已同我講d瞹眛的說話: 如講開按摩, 佢就話如果只有你同我就好, 我咪講笑話邊個做按摩那個,佢竟然話佢!! 但佢次次都用講笑就算, 雖然我有時同佢講笑, 但都唔係呢d野呀!
仲有一個我都係近期先認識, 佢在大陸工作, 之後見佢都好似幾好傾咪傾左幾句, 在開頭已經又係我在msn之中最常見的二招 :
(1)先話你ok美女, 叫你send張相比佢, 佢仲問我有冇bf, 如果冇就叫我去大陸, 介紹比我認識, 我先唔cheap牙, 唔駛佢這樣做
(2)話我勁好傾, 好like同我傾計. 係咩?我都唔太覺. 但佢講完之後冇耐, 就話想更了解我! 天啊!我哋認識不足二個星期, 唔係太熟, 做咩要了解大家? 我明白做朋友要互相了解, 但都不用講到出口? 況且比個剛相識的男仔這樣講, 會有d毛管"動".
唉!點解我又遇到呢d男仔, 真係唔知點算(雖然都係做普通朋友多), 總之就順其自然吧啦!!
大家唔好心邪, 唔係果d唔正經的野, 就算有都唔會放上來呢度講啦!費時比人話我渲染色情, 這就無謂啦! 而係關於工作上的事..., 今日都係第一次試.
我哋公司自從上年有二個大客, 佢毎年總共都要成四十幾份audit report, 單單聽到呢個數都死啦!影印, binding都有排啦, 仲有個客簽名仲唔簽到手軟咩.不過呢樣唔重要, 最重要的係..以上所有功夫, 除左簽名外, 全部都由我一手包辦, 加上我公司二個同事都出哂job, 只有我一個, 真係想死. 所以由今日開始, 所有msn的回音非常之慢, 請大家見諒!
幾經辛苦, 全部工序已做完, 怎知我哋公司個執業會計師(CPA)簽完名後竟叫我幫佢蓋個只屬於佢自己個印, 那一個係個鋼印. 我都係第一次見到同摸到, 本來都有D開心, 但一想到要蓋成五十幾份就想死. 起初用呢個印都幾有自豪感, 但後來便吸累左, 但都冇得休息, 那時我就想扔左個印, 整到隻手不知幾痛! 最後當然做完啦!唔係會比D老闆話死, 同時我也有一個想法, 做CPA不但辛苦,又要考牌,又要實習; 連蓋個印都辛苦過人, 都係咪預我啦!!!
再上個星期六發生左件唔愉快的事, 相信各位睇過呢個blog的人都知, 我唔想再提, 但今日在呢度要同我妹道歉先. 同埋多謝各位老友記用msn, 或者在呢個blog留言支持同安慰我, 再次多謝各位先, 尤其係蔡蔡, veron, eva & polly.
我也因為呢件事嬲左我妹, 令佢覺得唔開心. 其實私應該先問佢唔幫我原因先, 後來我用好重的語氣問左佢, 佢話當時根本唔可以即刻想到去第二間買衫, 同埋佢見到我同sales有推撞而嚇到呆左, 我聽到後都非常後悔, 為什麼我不聽解釋而嬲佢,成件事佢都係受害者, 始終佢年紀仲細(雖然佢剛成年), 未知人生險惡, 有呢d想法同行為係正常,我應該為佢設想下. 可能自私的係我自己, 因為自己受委屈而怪責他人, 我始終唔係個好家姐, 但我會盡力改善, 做到最好(tvb slogan?). 同埋我其實在上星期五已原諒佢, 希望之後我哋會更了解對方, 不過就唔好用吵架呢個方法啦!
星期日又冇街去, 最好當然在屋企打機啦! 加上琴日大出血, 而且落大雨, 仲出街咩! (懶就懶啦, 好多藉口).
今日終於爆左nds隻ff12啦, 佢完成所有任務, 再加全部人升到lv 99會有隱藏結局. 但我只有做任務得96% -81個任務之中只有三個冇做, 激死人啦! 只係差少少, (隻game)又唔比埋人, 哈, 都係講笑! 於是我咪升到70幾level 咪算. 跟住有一樣野仲抵死, 就係睇ending畫面竟hang機! 天啊!我係咪同呢隻game有仇?算啦!我惟有玩psp獅子戰爭.
之後玩獅子戰爭, 怎知佢仲難玩! 可能我平時甚少玩戰棋game, 成日都game over, 我真係想死! 好在我弟同佢gf -cc到左屋企, 我弟不但幫私玩左一關, 而且仲show出自己個爆機save加隱藏人物, 最令我驚訝的係有ff7男主角cloud!好想用佢, 同埋要我弟個save!!!!(>_<) 怎知我弟叫我自己努力玩, 同埋升高d level, 第時可同佢做共同任務!唉~~!!第時先算! 食完晚飯後, 我弟同我妹玩monster hurter 2, 其實最重要係幫我妹打材料整裝備, 最後我妹有齊成套裝備, 太好了! 而我呢? 我睇住cc玩應援2, 其實我想dl 好耐, 但因為最近公司好忙而唔記得左, 直至見到cc玩後先記得, 我見到d版仲難玩, 但d歌都ok好聽, 希望可快d dl 到同練熟d, 同cc合作一同玩!
同埋蕉蕉send左個sms話下星期五去食晚飯. 好啊!我哋, 包括eva, veron好耐都冇見, 就約實你啦! 總之不見不散. 仲有....唔知阿蕉有冇睇我呢個blog呢?
今日又要返工啦! 不過都唔緊要,除左可以同fd 玩msn外, 又可以寫blog等, 唔駛左避右避老闆,都不知幾正! 但最重要的係可以行街去買衫! 順便幫蔡蔡睇埋d衫的款式同價錢, 因為下星期六我哋又可以一同行街.
但公司真係好多野做, 要下午2:00先從公司出發, 首先去左旺中買鞋先, 我都買左一對拖鞋同一對露趾高跟鞋, 二對都係銀色. 由於我那對鞋個跟太高, 加上已有少少破, 所以穿住對新的高跟鞋再行花園街! 個sales 仲比左個袋我拿走對舊鞋, 真係超有禮貌同正呀!
行到花園街, 其實都唔知買咩衫, 甚麼小背心, tee, 連身裙, 恤衫等全部都有得買, 都唔知興咩衫, 總之見到多店舖賣的衫就買個d. 首先我睇見一件小背心, 之後睇中一條紅色點點的連身裙, 加埋係一件恤衫, 可以當衫同外套穿也可以. 最後當然三件買哂, 因為三件都like. 仲有而家又出返工人褲, 但在街上好少見人穿就冇買.
今日買左二對鞋, 三件衫, 算豐富了吧?
我爸勁愛釣魚, 多數都釣到魚毛仔, 但今次同大陸個親人 -表叔去釣魚, 竟然釣到二條大魚! 於是決定同表叔和佢個女(表妹)出去食飯.
由於佢哋三個要由東涌過返黎屋企, 所以我, 我媽同姑姐要在屋企等佢哋先去食飯, 那時我已經非常肚餓, 而且我哋大陸好多親人, 又少見面, 根本都唔會認得, 本來想唔去, 但見我爸好少釣到大魚, 就去一次食飯.(我好似好勉強!?) 我媽打電話比妹, 問吓佢去唔去, 我妹已到左地鐵站, 費時坐小巴返來, 於是話唔去.
等左大約半小時, 我爸終於返到屋企, 我第一眼見到表妹, 佢一頭捲髮, 穿四個骨褲唔知點解覺得佢有D串, 可能係佢在加拿大留學返來香港同屋企有錢. 唉!總之我不太like 呢d有錢女, 所以我由屋企行去酒家都冇同佢傾過一句計, 只係同姑姐傾我琴日冇得去海洋公園同睇加勒比海盜, 跟住佢就搭訕講句先至同佢講一句野. 可能你哋都覺得我自以為是, 做咩對人好cool, 但我覺得第一印象好緊要, 如果我唔太like 那個人, 我真係可以一句野都唔同佢講, 可能係性格, 但我都會去改. 我只可講句, 我真係接受唔到d好串的人.
去到酒家後, 我姑姐再打比我妹,問佢會唔會到, 最後佢都有去, 仲買左本漫畫, 那時我先記得我今日買個本fairy tale, 死啦! 老人痴呆又發作! 食完飯後, 我爸車表妹返佢旺角宿舍.
由於之前天文台"話"落雨, 原定約好同蔡蔡去海洋公園的計劃泡湯, 又冇得睇加勒比海盜, 咪自己一個人在屋企打機. (呢日假真係浪費~~哭!)
大約在中午12:00到, 阿媽打電話話比我知二個表姐同阿婆在4:00會到我哋屋企. 不如我先介紹下佢哋先: 一個已同老公定居hk, 已經有一個女叫做翠兒, 而家讀緊小二, 之後仲生多個女叫tiffany; 另一個表姐在英國來港, 同埋佢個仔叫brian(好似這樣串!?), 仲係bb 來的, 可能來左hk唔習慣呢度天氣, 病左二次, 好可憐! 我知道佢哋會來屋企, 勁開心啊! 因為好耐冇見過佢哋. 於是我立刻收拾東西同迎接佢哋 .
真係大約4:00到, 佢哋都來到屋企, 表姐抱住brian, 我媽抱住tiffany, 二個bb 在哭, 佢哋真係好cute, 我即刻拿部相機同佢哋影相. 但我從來冇抱過bb, 驚整傷佢哋, 唔敢抱. 惟有tum下佢哋笑. 跟住我問我媽應叫二個bb咩稱呼, 我媽竟然答我, 佢哋叫你表姨, 我就叫表姨生!? 吓!? 做咩叫到我好似好老? 但按照習俗係這樣, 冇計!
之後二個表姐同二個bb, 翠兒去左碧堤半島探佢哋親人, 而我阿媽同外婆落去我屋企附近行下, 又只有我一個在屋企, 由嘈雜變回寧靜, 突然有d唔慣, 可能平時好少親人來我屋企, 所以我喜歡熱鬧掛!? 佢哋夜晚返到黎屋佐後, 我媽連忙煮飯, 而我同表姐, 阿婆傾計, 當中我婆問我有冇bf? 我都被呢個問題嚇一嚇, 我相信好多冇bf的朋友都會幾唔like比親人這樣問, 當然我都唔例外, 但阿婆問到冇理由唔答, 咪只好話咩公司冇男同事, 好過遇到個衰男仔等等呢類說話.
同阿婆傾完計後, 見到tiffany拿我在杭州買個把遮玩, 把遮個size同tiffany差唔多, 都幾襯. 玩得累了, 就在我房間訓教, 仲用左在杭州買那個pillow. 唔知係咪我哋屋企冇開冷氣, tiffany 全個頭都係汗, 在客廳訓. 至於brian就好百厭, 成日搶tiffany 個奶嘴, 而且仲阻住tiffany訓教, 最後由大表姐分開佢哋. 食完飯後佢哋就走了, 有d唔捨得, 惟有有時間就去探佢哋...呢日真係好開心(^_^) 
對於琴日個篇文章, 我先要講句sorry先, 其實一早已知多數fd睇完我個blog後都唔會留言, 可能係佢哋太忙吧, 又或者只要知道我近況就算(其實我都有d屬於後者), 不過無論係用咩心情睇我個blog, 我都非常開心, 起碼會有人關心我, 在呢度要同所有睇過我blog的人講聲多謝先.
尤其係要多謝我最好的朋友 -蔡蔡, 佢在我最唔開心的時候, 用msn或用呢個blog打好多好多說話來安慰我, 同我傾計. 在呢一刻, 我真係非常感動, 原來一個了解自己的朋友的安慰原來真係好重要.總之以後大家有咩唔開心都互相安慰大家(^_^). 仲有你要小心保重身體呀! 同埋快d好返.
除此之外, 仲有都要多謝eva, 佢冇安慰過我, 不過佢的事也令我覺得自己原來一直忽略身邊朋友的苦況. 佢在生日時已經開始唔舒服, 之後都仲未好返, 同時佢一直被佢公司個同事點佢做好多野, 打好多文件, 但最後佢個同事成日都話佢打錯,又要再打. 我聽到呢度,我都鄧eva可憐, 仲要日日對住個衰同事, 而個同事一d都冇體諒佢, 同我星期六個件事相比, 簡直係小毛見大毛, 我何必再為呢d小事嬲,最多咪唔去個間衰舖買衫. 既然我都冇去理解人, 都唔好奢求人理解我. 在呢度也希望eva快d好返, 我哋會同你補祝生日, 食返餐正~!!
仲有仲有, 要同嘉華講聲生日快樂先, 祝日日都美, 身體健康, 同埋日日開心
究竟咩叫做朋友呢? 睇戲同劇集中都知為朋友兩協刀, 會為朋友喜而喜, 泣而泣. 但呢d只係虛構情節, 這麼現實中呢? 我覺得係完全相反.
自從星期六那件不愉快的事打左上blog 後, 都唔知係咪根本冇人睇, 連一個留言也沒有, 究竟佢哋係真正忙碌, 定係根本對我的事不聞不問, 我真係唔知道. 但呢個不是最重要, 我在msn 中打左句野 : "一件衫都唔及姐妹情, 心淡了! "呢類傷心的說話, 但竟然冇一個人慰問下我, 我仲可以同佢哋傾自己唔開心的事嗎? 惟有自己一直屈在心中, 只有自己唔開心. 那麼msn有甚麼用? 不如唔好on 9好過!
所以我有時想, 佢哋係咪真係唔重視我? 就連我生日也唔知道, 至於傾心事呢? 既然我有唔開心的事都冇人慰問, 又怎會去聽我的心事? 唔係我太偏激, 而同事實真係這樣, 那麼, 朋友真係有咩作用? 就連我自己也不知道.
琴晚終於結局左!我指係我星期一至五都仆返屋企睇的[春天後母心], 個結局我就覺得ok, 講個單親媽媽終於完成佢自己同佢死左的老公阿德的心願, 把五個小孩養大成人, 最後五個子女幫媽媽賀壽都幾感人. 不過我其中like的一個角色 -趙剛係咪因為殺人而判死刑(因為佢殺左個大惡霸), 套劇冇交代到, 激死我啦.
其實那個角色 -趙剛, 我只like佢d性格 :佢除左沉迷賭錢外(最後都戒左), 佢重義氣; 考順; 喜歡小孩; 用情專一(即使女主角唔喜歡佢), 都唔會變心, 仲一直守護佢; 正直(唔等如蠢), 都係我喜歡的性格類型. 即使佢不太型仔, 具備呢d性格已經非常好, 因為外表會隨年齡改變, 但性格即使老左都仲存在, 而且型仔與否因人而異, 所謂情人眼裡出西施麻! 可惜我冇遇到呢類男人, 有的話也希望佢like我, 唔係一世都冇希望(鬼叫佢專一咩, 冇計) (^_^)......不過劇中佢成日欠人錢而比人打, 我都有d心痛(喂!我已有布甸!)
等到我妹取完身份証後, 先去葵涌廣場行街. 唔知係咪耐冇行, 定係而家D衫少款?覺得好似少左衫賣, 我哋行完葵涌廣場後, 在個度買左二件白糖榚後就去下一站 -荃灣, 也都係悲劇的開始.
起初行荃灣都好似平常買野一樣 -有美衫買, d sales 好有禮貌個隻, 我阿妹都買左一件外套, 一條裙. 我妹仲行到口乾, 佢去左買珍珠奶茶. 我見佢仲想買衫, 咪想買完衫先買下午茶. 怎知悲劇真係開始.
我哋去左行荃豐中心, 我相信大家有行過的話, 都知地下有漫畫, 遊戲機..賣, 上層係賣衫, hair cut. 我哋咪去果度買衫, 我妹見到有一間賣bra, 背心的店舖內有佢都幾喜歡的小背心, 咪問個sales 價錢, 那個sales 沒理會我哋二個, 仲比面色我哋睇,於是咪去第二間度睇, 怎知已經冇呢類店舖. 講到呢度先, 你覺得一個正常人仲會去個間舖買衫嗎? 我就一定唔會, 但我阿妹竟去個度買!我只好死死地氣, 叫個妹再問下價, 個死人sales先講個價, 仲要語氣極差, 但對其他人懶有禮貌, 明眼人都知佢唔like 我哋(講真, 我都唔知why), 所以我已暗示我妹, 叫佢唔like就唔好要, 怎知佢竟然話要, 但都唔見個sales有反應, 我咪叫佢跟下我哋件衫, 佢勁大聲話 : "在入面, 自己入去拿", 我果陣已開始嬲, 但見我妹好似like咪入去.
一個普通人買衫, 見到件衫用bag入住都會叫sales拆開睇下, 我咪已經忍住怒火, 有禮貌叫佢拆開, 怎知佢大聲叫我自己拆之餘, 最後仲唔比我, 不過最致命都係個sales 竟講 : 我而家唔賣比你! 我聽完呢句都終於按不住怒火, 咪話佢 : 係係咪做生意架, 好鬼串! 我就很怒離開. 但我阿妹始終一句都冇幫過我, 好似我買衫多過佢買.
之後我妹仲抵死, 去左第二間近門口的呢類舖, 居然都有睇中, 如果你一早到呢間睇衫, 我就唔駛受氣, 你又可以買到衫啦!呢間個sales 勁好, 除左話比我哋知邊d衫係一百元四件外, 仲話邊d好衫睇d, 真係一個天堂, 一個地獄! 佢服務好d不突止, 仲有一對應該係二母女又睇中二件背心(我妹都要左二件), 我咪同佢哋講我哋一同買, 佢哋都話好, 剛好有四件, 太好了! 我比左$50佢, 最後那個老婦人笑住仲同我講再見. 幫人原來都幾開心, 同時又可幫自己, 如果唔係有頭先件事, 可能仲開心!
我回到家中, 一直心想: 究竟係個勁串的sales衰, 定係一個見到家姐比其他人欺負, 都唔去幫家姐, 自私的妹妹衰? 定係甚麼事, 唔理合唔合理都就個妹的家姐衰? 經過呢件事後, 我先真正知道我妹的自私, 如果佢一早講: "家姐, 我哋去第二處地買, 唔好幫親間串野"; 又或者去第二間買, 我呢個家姐跟本唔駛受氣. 我自問我對佢唔算太差, 我有時比錢佢買衫, 一買左psp借比佢玩, 自己都未玩過, why 佢可以這樣對我? 想到呢度, 我都心淡了~~!!
在五月後, 我個個星期六都要返工. 但今日我就要去IVE交表(5月21日截止報名), 所以冇返工. 我當然去最近我屋企的葵涌分校, 但因為之前從未去過, so 咪要周圍去搵, 終於都比我搵到, 但去到交表時, 佢竟然只話收佢分校所辦的課程!即係葵涌分校只收葵涌課程表,不是吧? 我搵左半個鐘, 竟然食白果? 最後只好去返青衣分校交. 我睇睇地圖, 再去青衣分校, 我見到近葵芳地鐵站, 於是咪去問下有冇小巴去, 最後都比我搵到, 仲要係$3.2一程, 即係應該不太遠? 我便懷緊張的心情上車.
經過十五分鐘車程後, 終於到左青衣分校, 個度都幾大同幾美, 有D"發現新大陸"的感覺, 我去左交表後, 都要問人在邊度坐車返葵芳, 原來就在隔離的美景花園.我坐車到葵芳後, 就返左工廠去等我妹取完身份証後去行街.
大家唔知有冇睇無線10:45個套"謎"呢?佢大約係講一d普通人不能理解的事,例如麥田園圈, 把棺木吊起半山等等奇怪事, 本來套劇內容都幾吸引人睇, 但二個主持,加一個"謎"女郎咪死, 都唔知佢哋三個做咩? 二個主持又成日做d白痴post, 不過都唔夠個迷女郎, 成日無端端死出來, 又唔講野, 真係唔知佢做咩. 可能個女仔先係個"謎", 最後先比我哋知!
其中有個網民的好笑評語, 好笑的不妨笑下:
謎...... 點解今時今日仲係到講埋啲舊聞呢！好多題目我哋都聽到睇到爛啦！仲 有乜好講呢？
謎...... 究竟兩條主持係到做乜鬼呢！佢哋係到做緊主持定係做精神病患者呢？佢哋隻手有乜問題呢？
謎...... 秋官點解今次咁失準呢？點解要人叫佢做Adam鄭呢？
謎...... 阿李慧誼又究竟係到做乜鬼呢？啲高層因乜事咁玩佢呢？
謎...... 咁攪法！究竟啲觀眾捱唔捱到之後個廿集呢？
謎...... 點解係咪都要講個"呢"字呢？
(下次補貼二個"7"人相)
等我睇下ive表格先, 除左墳表同知付款方法外, 仲要d咩資料先."吓?不是吧?要會考同A Level 成績表?"你哋可能覺得我好白痴, 心內實想:"連呢d都唔知?" 又或者"你做咩大驚少怪?你d成績唔見得人咩?"其實二樣都唔係, 而係我....唔見左呢二張成績表!?
我不斷在屋企搵都搵唔到, 連我媽都睇唔過眼去幫我搵都搵唔到, 總之全間屋都搵哂, 唔知去左邊.於是我打比姑姐, 問下佢有冇見過我二張成績表, 佢話一早已比返我, 令到我更加驚. 於是咪打定輸數, 上去考試局個網度睇下補領幾多錢. 哇~~!!只係去申請都要$105, 個別成績表成$315一張. 痴線!太貴啦, 鬼叫我唔見左咩, 真係抵死! 我上網download張表格返屋企填.
怎知事情有所轉機, 竟然比姑姐在麻麻屋企搵返, 真係勁開心~!!(^_^)可以慳返入八百幾元, 同時也都比我一個教訓 : 以後要好好保存自己重要的物品!!
今日在lunch之前已經把個度D工作做完, 食埋飯後會去九龍塘間IVE(李惠利)去取 part-time 課程的單張同報名表, 如果報到名就唔駛再悶落去.(因為之前半工讀, 所以平時都會好忙, 但讀完個hi-dip後冇野讀, 咪覺悶).至於讀咩課程? 咪係我一直想讀的數碼圖像設計.
其實呢個course我一早想讀, 但因為在hk好少發展數碼科技, 一定會難搵工, 故只好讀住會計先, 起碼易d搵工. 但讀完會計, 再加上我而家都係會計文員, 我都對會計冇興趣, 可能呢d就叫做 : "做個行, 厭個行"
所以讀完會計後想讀其他野, 總之唔係會計就得, 於是我想起讀呢個course.
係咪我太耐冇去過李惠利, 竟然唔識行去, 咪問左個郵差, 佢勁好人, 很有耐性教我呢個路痴, 我照佢指示行去, 加上當時真係好熱, 行到周身汗, 最後終於到啦. 但個度都幾大, 我又要周圍搵先搵到大門去取表格. 我在個度先睇左有冇我想讀的course同涼一陣冷氣, 之後咪又要行到好遠的地鐵站, 坐地鐵返公司(哭)
我哋公司其中有一個客, 間公司好鬼大間, 年年除左在年尾stock take 外, 仲要我哋公司二個同事幫佢做核數, 都幾誇下~! 當然今年都唔例外, 定左在後日就去, 有見及此, 我要提早去葵興入數. 其實我都係星期六先知, 因為只顧剪髮同太突然, 冇話到比我d msn 朋友知, 先講句sorry先, 最多我盡快返黎同你哋傾計!!
望到頸都長埋, 終於到左星期六! 但由於公司多野做, 又要返工啦(>_<). 其實今日本來唔想返, 因為我去我屋企附近剪髮, 唔想走來走去, 但我姑姐話最好返, 唔係第時趕唔到工作進度會比人話, 惟有死死地氣返去. 做左2-3個鐘野, 終於走得啦!
我"一支箭"標去荃灣, 因為我好少去果度剪(多數會去慈雲山剪, 因為果度次次剪得美, 但車程太遠), 所以今次咪去荃灣. 最近好鬼窮的我, 當然先周圍問吓價先 -好多店舖咪在出面寫染髮係$15x, 其實呢個價係男仔短髮之費用, 我哋女仔就唔止, 起碼要二百幾至三百, 視乎顏料brand而定, 加埋洗剪吹, 最平都要$260, 我當然唔制, 惟有走去第二間剪.
果然皇天不負有心人, 終於搵到一間染髮連洗剪吹只係$213, 價錢都ok, 於是開始比佢剪. 洗完頭後, 個男仔髮型師(都幾鬼型) 同我講染咩色, 佢先比染髮顏料brand 我睇, 個間其實只有二隻, 有一隻仲係都幾貴的"黑人頭", 我當然choose平d個隻. 跟住就叫我染髮加hi-light! 我只係想染髮, 唔想hi-light, so 我拒絕左佢.
染完頭髮後, 個型仔髮型師就開始同我剪髮, 我估佢唔多like我個前長後短髮look, 成日問我去邊度剪, 之後仲同我剪哂前面d頭髮, 同剪左斜陰, 加埋染左淺橙色, 同用定髮膠為我個頭定型, 我個頭完成啦! 男髮型師仲比左佢張咭片我, 希望第時可以再搵佢幫我剪(^_^)
琴日我仲十五十六, 唔知剪個咩頭, 但今日已有決定啦~! 都係唔好電捲住, 因為夏天好鬼熱(近排仲二十九度, 發溫!), if 要塗髮尾油, gel, d頭髮"痴立立", 好鬼煩.加上一次過電同染勁傷, 都係唔好電捲住, 留返冬天先算.
所以呢次只係染髮, 同埋修一修個髮型就算, 因為我而家呢個髮型前面長, 後面短, 夏天都幾正架, 起碼唔會比後面頭髮蓋住條頸, 而且我d頭髮好薄, 都幾涼爽~!總之快d到聽日, 可以轉新look啦(^_^)
冇得同蔡蔡msn, 惟有上網睇下野啦, 我去左個日本網站, 見到有d女仔個頭都幾美, 唔認識日文都唔緊要, 可以click入去睇下d相 :
也因為如此, 令到我想係呢個星期六剪髮, 有二個頭都幾like, 於是用msn問下liz, eva, edwin 對呢二個頭的睇法同比建議, 多數人(包括我)較like 長髮個look, 但佢又染又電, 一定勁傷. 加上我d頭髮又少又薄, 似乎電呢個有d難度, 但剪得太短, 又好難留返長, 都唔知剪唔剪好, 但我真係想剪返個美d的頭, 真係唔知怎樣, 惟一sure的係我會染淺橙!!
蔡蔡今日(如果記錯day唔好介意)話佢公司個server唔知係咪死左, 一直都上唔到網同msn, 所以話之後未必可同我傾計. 吓!? 唔係掛, 其實之前都知你部腦short, 但今次真係short 得過火, 冇得傾計會好鬼悶, 加上我哋已經少左見面, 有d好似回復我返學個陣時的悶生活, 我才不要!! 惟有希望你個server 快d整返, 可以再同你傾.
我今個lunch 起要幫我姑姐做功課, 吓?我姑姐為什麼做功課? 其實佢而家讀緊一個會計加電腦的programme. 佢份功課就係....設計網頁!? 如果有時間都幾好玩, 可以把自己的漫畫, CDs, game 碟 post 上網, then 做個網站去sell 自己物品.
至於背景, 背景音樂, 畫面等其他軟件網站都有提供, 唔駛寫程式, 勁方便. 如果你唔like 網站的畫都唔緊要, 可以自己upload 上去. 而我幫佢做的係資料搜集, 搵各漫畫等出處, 同幫佢寫內容, 但真係寫到我死, 成十篇!!! 至於d畫, sorry, 第時學graphic design 先畫, 同埋要我做網頁, 我會死的!!
在中學認識我的都知我多數fd都係女仔, 就算有男仔fd都比較少睇, 佢哋話同我講打機好過, 不過今日msn有d男仔話睇過我個blog!? 其中一個更係我之前在呢個blog 話過的男仔 -edwin. 我當時有d吃驚, 心想:(死啦! 唔知佢會唔會嬲我?), 於是我即刻問佢同埋say sorry, 好在佢話唔緊要, 之後我哋又好似以前傾計.
除此之外, 其實佢之前同我講佢四月因為工作忙, 有二個同事走左, 仲要教新請個同事而唔能夠同我傾計, 而家佢比較得閒, 日日都搵我傾計. 姑且唔講佢有冇講大話, 但佢打e-mail 話比我知佢的近況都ok, 同埋係朋友麻, 就信下佢一次吧~!!
我覺得我公司有樣野好, 就係星期六完全唔駛返工, 除非你真係好多野做, 或者要盡快出核數報告比客同稅局. 而家開始要幫客人上report去稅局, 同埋為佢哋計稅, 之後會好忙, msn 的各位朋友不用擔心, 我可能會少左hi你, 但我盡量會同你哋傾, 我估會持續到今年12月到, 而家只好快d趕完工作.
星期六要返工的人都知, 多數呢日都會冇心機工作, 返去多數傾下計或上下網(我以前星期六都要返, 呢d係我經歷), so 今次我都唔例外, 今日去左you-tube 聽下avril lavigne 的歌同睇mv, 之後蔡蔡就hi我, 我哋一同討論佢邊首歌好聽, 其中我較like 佢首 " girl friend", 仲有佢的快慢歌都好聽, 連我呢個只聽日文歌的人都like
之後蔡蔡同我講avril已經結左婚, 仲send 左d相比我睇(我借左你一張相來post在度, 唔好介意^_^;), 佢真係好美, 而個老公好似FF12入面同公主結婚個男仔!? (真係打機short 上腦) 跟住蔡蔡同我講好羨慕avril, 有事業同愛情, 好幸福. 還慨嘆自己二樣都冇. 其實我都係同你一樣, 又係二樣都冇, 惟有在工作上大家一同努力, 至於愛情就....隨緣啦....
今日蔡蔡在msn同好激氣, 佢只係話佢公司有個客好無理取鬧, 但冇講詳情. 後來我睇返佢個blog, 先知個客幾痴線, 蔡蔡只係循例問下個客人住在邊, 作為記錄, 乘知比個客鬧佢, 問佢有咩企圖. 天啊!? 呢個係咪人黎架, 你屋企有寶咩? 有咩唔話得比人知, 真係服左佢, 比我都會同蔡蔡一樣, 會用差語氣話佢, 但比佢個同事話佢唔成熟.
雖然我哋都知d客唔得罪得, 無論個客怎樣無理取鬧都好, 都要一直忍耐. 但人都有情緒, 有時要嬲也control 唔到, 加上我同蔡蔡份人較直, 情緒會show在個臉上, 但始終出黎工作, 有時只好啞忍同在msn 呻下..同埋希望我哋可以成熟d
我平時不太喜歡睇劇集, 尤其係要追連續劇仲煩, 除左以前套[賭場風雲]外, 都冇追過劇. 但近排亞視星期一至五7:30有一套叫[春天後母心]就完全改變我對連續劇的觀感, 仲令我狂追.
其實我冇睇到頭十幾集, 只係見我媽日日都睇我先睇, 大約係講個女人叫沈秀娥, 已結過二次婚, 但二個老公都死左, 自己養活自己仔女外, 還要照顧正室的仔女的故事.佢之前有個前丈夫叫德哥, 佢常常幫助人, 對朋友極有義氣, 很多人很尊重佢, 但因病去世, 佢有一個知己叫趙剛, 其實佢一早已喜歡秀娥, 但秀娥因一早結婚而拒絕佢愛意....總之就好鬼好睇, 整到我日日一早放工返去睇~~!!
其實我冇睇到頭十幾集, 只係見我媽日日都睇我先睇, 大約係講個女人叫沈秀娥, 已結過二次婚, 但二個老公都死左, 自己養活自己仔女外, 還要照顧正室的仔女的故事.佢之前有個前丈夫叫德哥, 佢常常幫助人, 對朋友極有義氣, 很多人很尊重佢, 但因病去世, 佢有一個知己叫趙剛, 其實佢一早已喜歡秀娥, 但秀娥因一早結婚而拒絕佢愛意....總之就好鬼好睇, 整到我日日一早放工返去睇~~!!
先祝我妹18歲生日快樂先, 終於係成年人, 思想要成熟d啦~!!
今日係我妹生日, 也都係佢返工的日子, 但由於佢要夜晚8:00先放工, 所以我只比左$100佢買野算數, 遲d先同佢食正野(佢應該like食日本野!?) 至於阿媽比左封利是佢, 阿爸就...唔知啦! 總之一定會補返比佢. 而家只好借住部psp 比佢玩先!
呢日終於到啦~!! 我哋先做好準備 -去atm 拿現錢, 費時要碌咭, 都係比現錢好d. 我同蔡蔡一早到左信和中心門口, 之後eva 打來會同佢個fd會遲d 來, 而佢個fd 又想買nds. 好野! 有多一個人去買, 多d人開心d.
之後我咪同蔡蔡行住先, 睇左我哋部psp價格先. 哇~~!! 一部機連4gb 咭要二千幾元, 都幾貴! 後來問左shop 內的人, 話玩download 有d game 要開機碟, 仲要個叫做OEA3.10的軟件, 真係煩, 但為左玩正game冇計, 尤其係而家最多男仔(或者係女仔)玩的"monster hurter 2", 同埋"tales of" 系列.
冇幾耐eva就打電話比我, 問我哋在邊度, 想join 返我哋. 大家集合後先互相介紹, eva個fd 叫cindy, 佢係同eva 一樣讀poly u, 互相認識後就開始去格價. 行哂全個信和中心後, 發覺d價錢都差唔多, 於是是但去一間買吧!
最後都係去返我哋集合地方個間買, 我哋多人買咪同間shop講價, 最後我同蔡蔡分別買左白色同黑色psp, 只送一條dl 線; eva 買粉紅色nds, 多一支nds 筆; eva fd 就部白色nds 平$10. 真係離譜, 四個人去買都得好少優惠, 有d激氣, 但各自有心頭好就算數. 之後我同蔡蔡, eva 買完機套後, 我同蔡蔡去老麥食野, eva 同佢個fd 搵渡假村住, 大家分別離開.